Instagram yiganye Snapchat mu buryo bweruye

Yanditswe na Kanamugire Emmanuel
Kuya 4 Kanama 2016 saa 08:34
Yasuwe :
0 0

Nk’uko byari bisanzwe kuri Snapchat, Instagram yazanye uburyo bushya, Instagram Stories, bwo gushyiraho amafoto n’amashusho ushaka gusangiza inshuti zigukurikira, ariko bikazimira nyuma y’amasaha 24.

Ubu Instagram ifite Camera ebyiri, iyo hasi isanzwe unyuraho ushaka gufata ifoto cyangwa amashusho yo gusangiza inshuti, hakaba n’inshya yagenewe ‘Instagram Stories’, ufungura ukanze mu kaziga karimo agasaraba hagati, gaherereye mu nguni y’ibumoso bwa telefoni.

Uko wakoresha ‘Instagram Stories’

Ku isura nshya y’iyi porogaramu, inkuru wasangijwe ziragaragara zitambitse hejuru y’ibintu byose ufite ku ipaji ya Instagram, buri muntu washyizeho ikintu hakagaragara ifoto ye izengurutswe n’akaziga gatukura, waba wifuza kureba ibyo yashyizeho ukayikandamo.

Bitewe n’ubugari bwa telefoni, iyo umaze kureba ibigaragara imbere bagusangije, ubinyereza ubiganisha ku ruhande rumwe (slide show) hakaza ibishya.

Niba wifuza gusangiza abandi ibyo urimo muri ubu buryo, urakanda muri camera yo hejuru mu nguni ugahitamo iyo ushaka (iy’imbere cyangwa inyuma), wamara gufata ifoto ukabona agakaramu cyangwa inyuguti za ‘Aa’ushobora gukandamo ukandika mu ifoto ijambo ushaka.

Nyuma ukanda akambi gahagaze mu ndiba z’ifoto. Ushaka kureba ibyo wasangije abandi ukanda mu ifoto yawe ihita ijya mu nguni y’ibumoso bw’ahari ibyasangijwe abandi, ukaba wabisiba, ukabibika kuri telefoni cyangwa ukabihindura nka ‘post’ isanzwe.

Imiterere ya Instagram Stories

Instagram yatangaje iti “Hamwe na Instagram Stories, ntabwo ukwiye guhangayikishwa no gushyira ibintu byinshi kuri Instagram, ahubwo ushobora gusangiza ibintu binyuranye inshuti zawe ku munsi, kandi ukabikora mu buryo butandukanye uko ubishaka.”

Niba imiterere ya Instagram yawe warayigize ‘private’, ibyo usangiza abantu muri ubu buryo bushya bibonwa n’abagukurikira gusa, ariko nabyo ubasha kubihindura ikaba ‘public’.

Mu gihe uburyo busanzwe bwa Instagram bugira aho utangira igitekerezo cyangwa aho ukanda iyo wakunze ifoto, kuri ‘Instagram Stories’ iyo hagize ugira icyo avuga ku byo wasangije, biza nk’ubutumwa bugufi bitandukanye na Instagram isanzwe.

Abayikoresha benshi ntibarabasha kuyitandukanya na Snapchat kuko bihuje byinshi birimo uburyo bw’amafoto n’amashusho bimaraho amasaha 24, yewe n’iri zina ‘Stories’ snapchat irarisanganwe. Gusa baragaragaza ko Instagram Stories yoroshye gukoresha kurusha Snapchat.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza