Instagram igiye gutangira kuvanga amafoto n’ibikorwa byamamaza

Yanditswe na Mukaneza M.Ange
Kuya 12 Mutarama 2017 saa 05:31
Yasuwe :
0 0

Urubuga nkoranyambaga rwa Instagram rugiye kujya ruvanga ibikorwa byo kwamamaza n’amafoto ashyirwaho mu rwego rwo kongera amafaranga y’inyungu yinjizwa na Facebook ari na yo nyirarwo.

Ku wa Gatatu ni bwo Instagram yatangaje ibijyanye no kwamamaza aho izatangirana sosiyete zirenga 30.

Muri ubu buryo bushya ibikorwa byamamaza bizajya biba bivanze n’ahaba hari amafoto n’amashusho abantu bashyira kuri instagram ariko akamaraho amasaha 24 gusa (Instagram stories).

‘Instagram Stories’ yatangijwe muri Kanama 2016, kuri ubu ikoreshwa n’abagera kuri miliyoni 150 ku munsi; kuyikoresha umuntu yifata ifoto, amashusho cyangwa akandika amagambo, ku buryo abamukurikira babibona ahagana hejuru bagifungura Instagram.

Sosiyete ya eMarketer ivuga ko ibi bizatuma Instagram yinjiriza Facebook miliyari 3.64 z’amadorali binyuze mu kwamamaza ku isi yose, aya mafaranga akaba akubye hafi kabiri ayinjiye mu 2016.

Ibi kandi ngo bizagerwaho kubera 74% bya Sosiyete z’ubucuruzi muri Amerika ziteganya gutangira kwamamaza zikoresheje ubu buryo bushya, zivuye kuri 53% zamamaje ibikorwa byazo mu 2016 zikoresheje Instagram.

Ibi bizatuma kandi Facebook iguma ku mwanya wayo wa kabiri ku bijyanye no kwamamaza, nyuma ya Google ibarizwa muri Alphabet yinjiza amafaranga menshi binyuze ku rubuga rwa Youtube.

Muri sosiyete ziteguye gukoresha ubu buryo bugiye gutangira kugeragezwa harimo General Motors Co, Nike Inc, Airbnb na Time Warner Inc.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza