Kwamamaza

Ibyo wamenya kuri ’Black Friday’ na "Cyber Monday", iminsi yizihizwa mu Rwanda

Yanditswe kuya 28-11-2016 saa 12:50' na Mukaneza M.Ange


Kuva mu cyumweru gishize hirya no hino ku mbuga nkoranyambaga cyane ku bamamaza ibicuruzwa bitandukanye, hagiye hagaragara ubutumwa bwerekana ko hari poromosiyo za Black Friday na Cyber Monday aho ibiciro biba byahananuwe.

Jumia Market na Jumia Food, sosiyete zo mu Rwanda zicururiza serivise zazo kuri internet, nazo mu cyumweru gishize zatangaje ko zatangiye kwizihiza Black Friday, zishyiriraho poromosiyo abakiriya bazo.

Wakwibaza uti ubundi Black Fri day na Cyber Monday ni iki? bimaze iki, byizihizwa gute?

Black Friday, ni umunsi watangiye kwizihizwa muri Leta Zunze Ubumwe za Amerika kuva mu 1952 nyuma ya Thanksgiving umunsi wagereranya n’umuganura, uba ku wa Kane wa nyuma wa Ugushyingo. Kuri uyu umunsi usanga amaduka menshi yahananuye ibiciro mu buryo budasanzwe.

Uyu munsi ni umwe mu yo abanyamerika benshi bitabira kujya guhaha dore ko bamwe baba bafite ikiruhuko cya nyuma y’umunsi w’umuganura kiyongera ku minsi ibiri ya nyuma y’icyumweru.

Kubera ubwinshi bw’ababa bifuza guhaha badahenzwe, usanga bimwe mu bicuruzwa byangirika kubera umubyigano, abantu bagakomereka, hari ndetse n’abigeze kurasana muri leta ya Florida bapfa aho guparika imodoka, babiri bahasiga ubuzima.

Mu myaka yashize, mu Bwongereza Black Friday yari ifite igisobanuro gitandukanye no muri Amerika, kuko iyi nyito yakoreshwaga na Polisi n’Ikigo cy’Igihugu gishinzwe Ubuzima (NHS), bagaragaza uwa gatanu ubanziriza umunsi mukuru wa Noheli, ahaba hitezwe akazi kenshi gaturutse ku mubare munini w’abantu baba basinze ku bwinshi n’abandi bakeneye ubutabazi bwihuse.

Biturutse ku magururiro yo kuri Internet nka Amazon, ebay n’andi atandukanye, byatumye uyu munsi ugenda ukwirakwira ku isi ndetse kuva mu 2014 abacuruzi bo mu bihugu bitandukanye birimo n’u Bwongereza batangira kuwizihiza mu buryo budasanzwe.

Bimwe mu bihugu byo ku mugabane wa Afurika nabyo byatangiye kwizihiza uyu munsi, nko muri Afurika y’Epfo, Nigeria, Uganda n’ahandi.

Mu gihe Black Friday ikunze kwitabirwa n’amaduka acuruza mu buryo busanzwe, Cyber Monday wo ni umunsi uba ku wa Mbere w’ikiruhuko gikurikira umuganura, ukaba witabirwa na sosiyete zicururiza kuri Internet.

Uyu munsi wizihizwa kuva mu 2005, watangijwe na Visi Perezida w’Ihuriro ry’abacuruzi muri Amerika, Ellen Davis nyuma y’uko ubushakashatsi bwakozwe n’urubuga shop.org, bugaragarije ko 77% by’abacururiza kuri Internet bahamya ko ku wa mbere ukurikira Umuganura ibyo bagurisha byiyongera.

Guhera mu 2008, Cyber Monday yatangiye gukwirakwira no mu bacuruzi bo kuri Internet bakomoka mu bindi bihugu birimo Canada, Argentine na Iran.

Cyber Monday ariko inagira uruhare mu gutuma abakozi birukanwa bazira kwifashisha ibikoresho by’akazi muri gahunda zabo bwite.

Mu Ugushyingo 2011, muri Amerika 22% by’abakoresha birukanye umukozi azira gukoresha Internet muri gahunda zitari iz’akazi n’aho 54% babuza abakozi kujya ku mbuga zimwe na zimwe.

Kuri 'Black Friday' usanga abantu benshi bazindukiye guhaha ibintu bitandukanye ku giciro cyo hasi
Abaturage baba bitwaje ibikoresho byo guhahiramo kuri uyu munsi
Nubwo biba ari ibyishimo kuri uyu munsi, hanagaragara imirwano hagati y'abagiye guhaha bapfa ibintu bitandukanye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved