Byinshi kuri Drones zitegerejwe mu Rwanda nyuma y’imyaka 100 zibayeho

Yanditswe na Ferdinand Maniraguha
Kuya 30 Nyakanga 2016 saa 11:12
Yasuwe :
0 0

Indege zitagira abapilote[Drones] zifashishwa mu mirimo itandukanye, mu ntambara, mu butasi, gufata amashusho n’ibindi, zakorewe bwa mbere mu Bwongereza mu 1916 zifashishwa mu ntambara ya mbere n’iya kabiri z’Isi.

Byasabye imyaka 78 kugira ngo hakorwe Drones zitandukanye n’izari zimenyerewe mu bikorwa by’intambara.

Mu 1994 nibwo hakozwe Drones zifasha mu bikorwa by’ubugiraneza [Drones Humanitaires], zikorewe muri Leta Zunze ubumwe z’Amerika.

Abanyamerika kandi bazwi mu bihugu bikunze gukoresha Drones mu bikorwa byo guhangana n’abanzi, aho ziyoborwa n’ikoranabuhanga zikagenda zirasa kubo babahanganye.

Mu ntangiriro za 2017, mu Rwanda hategerejwe Drones zifashishwa mu bikorwa by’ubuzima, zigeza imiti, inkingo n’amaraso mu bitaro biri mu bice bigoye kugera vuba.

Biteganyijwe ko Drones Zipline zakozwe na sosiyete ya Zipline International yo muri Amerika ari zo zizabanza kugezwa bwa mbere mu Rwanda.

Iyo sosiyete yasinyanye amasezerano na Leta y’u Rwanda yo kuzihageza, nyuma yuko irangije kuzisuzuma mu ngendo zakoreye mu misozi miremire ya Californie muri Leta Zunze Ubumwe z’Amerika.

Ingano , uburemere n’ingendo zikora

Ubusanzwe Drone ishobora gutwara ibiro 150 kumanura, ku bijyanye n’ingendo zimwe mu zifite imbaraga zifashishwa n’Abafaransa mu ntambara ishobora kugenda kilometero 700 mu isaha, ku butumburuke ikaba ishobora kugeza kuri metero 3000 ivuye ku butaka.

Izo mu bwoko bwa Zipline zizakoreshwa mu Rwanda, imwe izaba ifite uburemere bw’ibilo 10, ishobora gukora urugendo rwa kilometero 120 mu kirere ifite n’ ubushobozi bwo kwikorera ibifite uburemere bw’ikilo kimwe n’amagarama 300[1.3 kg].

Akarusho kazo ni uko ikoreshwa n’ikoranabuhanga rihambaye mu byo kuyobora (GPS) ku buryo niba irangiwe ko ijyana imiti ku bitaro bya Kabgayi igomba kuyihageza, nta kuyoba na guto kubayeho.

Urugendo imodoka ikora amasaha ane, irukoresha iminota 35

Izo ndege zizagabanya igihe byatwaraga ngo umurwayi wari bugerweho n’imiti mu gihe cy’amasaha ane ngo ayibone. Kuko aho imodoka yashoboraga kugenda ayo masaha, Drones zizajya zihagera mu gihe kitarenze iminota iri munsi ya 35.

Drones ziza mu Rwanda zizajya zikoreshwa mu bikorwa byo gutwara ibikoresho by'ubuvuzi

Izo ndege zizakoresha iyo minota 35, mu kugeza imiti y’ingenzi kuri miliyoni 11 z’Abanyarwanda. Iyo miti izajya igezwa mu bice 100 by’igihugu buri munsi.

Ni gute Drones zizajya zigeza iyo miti ku bayikeneye?

Ibitaro runaka bikeneye imiti cyangwa amaraso, bizajya byohereza ubutumwa bugufi(SMS) cyangwa hifashishwe E-mail. Bizajya bihita byoherezwa aho bikenewe hifashishijwe ikoranabuhanga rihambaye mu byo kuyobora (GPS).

Mu minota ibiri mbere yuko iyo ndege igera aho ijyanye iyo miti abagomba kuyifata bazajya babimenyeshwa.

Drones izajya ikoresha umutaka w’indege ishyire imiti hasi iri mu kirere yongere isubire ku bibuga byabo byavuzwe ko bizubakwa mu karere ka Muhanga.

Umuyobozi mukuru w’ishami rya Loni rishinzwe ubuzima (OMS) yavuze ko izo ndege zizagira akamaro kanini cyane, kuko zizaziba icyuho cy’ibikorwa remezo bikenewe mu korohereza ubuvuzi mu Rwanda no mu bindi bihugu bitandukanye.

Umushinga wo kubaka ibibuga bya Drones mu Rwanda, uzashyirwa mu bikorwa n’ikigo Foster + Partners cyo Bwongereza, gifite ubunararibonye mu kubaka ibibuga by’indege n’imiturirwa ku bufatanye na Afrotech, Ikigo cy’Amasomo ya Tekiniki cya Lausanne mu Busuwisi na Norman Foster Foundation.

Amabwiriza ya Minisitiri w’Intebe yo ku wa 26 Mata 2016 arebana n’iby’indege za gisiviri zitagira abapilote, agena ko indege zitagira abapilote zizakorera mu Rwanda zitagomba kwikorera ibilo birenze 25 kandi zikaguruka mu kirere uziyoboye abasha kuzireba, kandi ko zitagomba kuguruka mu kirere kirinzwe uyiyoboye atabifitiye uburenganzira.

Mu ngendo zikora, umuvuduko wazo ntugomba kurenza kilometero 160 ku isaha, kandi ntizigomba kurenga metero 100 hagati y’ikirere n’ubutaka. Zigomba kandi gukora gusa mu masaha ari hagati y’igihe izuba rirasira n’icyo rirengeraho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza