Yashinori wavumbuye imikorere idasanzwe y’utunyangingo yahawe Prix Nobel

Yanditswe na Jean Pierre Tuyisenge
Kuya 5 Ukwakira 2016 saa 08:43
Yasuwe : XX
0

Umuyapani Yoshinori Ohsumi wigisha amasomo y’ubumenyi bw’ibinyabuzima muri kaminuza y’ikoranabuhanga ya Tokyo, yahawe Prix Nobel nyuma yo kuvumbura ko utunyangingo two mu mubiri w’umuntu twangirika, ibice byatwo bikongera bikikoramo utundi tunagira umumaro ukomeye mu mubiri.

Yoshinori Ohsumi w’imyaka 71, yahawe igihembo gifite agaciro k’bihumbi 718 by’ama-Euro, amaze kuvumbura iyo mikorere y’utunyangingo (Cells) izwi ku izina rya autophagy.

Autophagy ni ijambo rituruka mu rurimi rw’ikigereki risobanura Kwirya. Bisobanuye ko iyo utunyangingo twapfuye twirunda ahantu hamwe tukongera tukavamo utundi tuzima ndetse icyo gikorwa kikaba kigira uruhare mu kurwanya udukoko n’izindi ndwara nka Diyabeti na Kanseri.

Gusa nk’uko uyu mushakashatsi abivuga, ngo imikorere mibi y’iki gikorwa ishobora gutera indwara ikanatuma haba imihindagurikire idasanzwe mu mubiri.

Ubwo yaganiraga n’itangazamakuru i Tokyo, Ohsumi yagize ati “ Iki gihembo cyari mu nzozi, gusa ubwo natangiraga ubu bushakashatsi bwanjye, nahise numva mbyikuyemo."

Yavuze ko yifuje kwibanda ku buryo utunyangingo dusohora imyanda mu mubiri kuko yashakaga gukora ikintu gitandukanye n’iby’abandi.

Juleen Zierath, umwe mu bagize komite itanga ibihembo bya Prix Nobel aganira na the Guardian dukesha iyi nkuru yagize ati “ Buri munsi dukenera gusimbuza hagati y’intungamubiri 200 na 300 mu mubiri wacu, turya garama hafi 70 buri munsi ariko ibi ntibihagije kugira ngo twite ku bikenewe ngo hakorwe izindi. Bitewe n’iyi mikorere ubu twakwizera ko izo dufite zongera zikisubiza ubuzima”.

Prof. Giovanna Mallucci, wigisha ubumenyi bw’indwara zo mu mutwe muri Kaminuza ya Cambridge yavuze ko ubushakashatsi bwa Ohsumi bwari buri guharurira inziza uburyo bushya bwo kurwanya indwara nka kanseri n’imikorere itanoze y’ubwonko.

Yagize ati “Ndatekereza ko ari ingenzi ko ubu bumenyi butahuwe, icy’ingenzi hano ni uko hari ibimenyekanye mu ndwara. Biharuye inzira yo kuvura zimwe mu ndwara”.

Umwaka ushize iki gihembo cyasangiwe n’abahanga batatu barimo Umushinwa Tu Youyou wavumbuye imiti ya Malaria , Satoshi Ōmura umuhanga wakoze ubushakashatsi ku bijyanye n’udukoko two mu butaka dutera indwara akaba abarizwa muri Kaminuza ya Kitasato yo mu Buyapani na William Campbell wo muri Kaminuza ya Drew muri Leta ya New Jersy imwe muri 50 zigize Leta Zunze Ubumwe za Amerika akaba yarakoze ubushakashatsi ku by’inzoka zo mu nda umuntu avukana nyuma yo kuvumbura uburo bufasha abaganga kuvura Malaria n’izindi ndwara ziterwa n’inzoka nto.

Komite ishinzwe gutegura ibi bihembo yatangaje ko abatsindikiye ibishingiye k’ubugenge (Phyisics), Ubutabire (Chemistry) no guharanira amahoro (Peace price) bazatangazwa mu mpera z’iki cyumweru, mu gihe abatsindiye iby’Ubukungu bateganyijwe gutangazwa ku itariki 10 z’Ukwakira 2016.

Umuyapani Yoshinori Ohsumi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE