Kwamamaza

U Rwanda ni ikimenyetso cy’icyizere cya Afurika- Bai Chunli

Yanditswe kuya 21-11-2016 saa 08:48' na Jean Pierre Tuyisenge


Umuyobozi mukuru w’Ikigo Mpuzamahanga giteza imbere Ubumenyi, The World Academy of Sciences (TWAS), Bai Chunli, ashimangira ko akurikije aho u Rwanda rugeze mu iterambere hamutera kuvuga ko ari ikimenyetso cy’icyizere cy’umugabane wose wa Afurika.

Ibi yabitangarije mu nama ngarukamwaka ya 27 y’iki kigo yahurije hamwe intumwa z’ibihugu 52, kuva ku wa mbere tariki ya 14 Ugushyingo 2016, i Kigali.

Avuga ko ibyo abishingira ku buryo u Rwanda rwahungabanye ndetse rugasubira inyuma cyane, ibikorwaremezo bigasenyuka n’abantu bagapfa abandi bagahunga kubera Jenoside yakorewe Abatutsi, ariko mu myaka 22 gusa rukaba ruri mu cyerekezo cyiza.

Yagize ati “Mu myaka 22 ishize, mu 1994 habaye Jenoside yakorewe Abatutsi yahitanye abasaga Miliyoni. Igihugu cyarasenyutse, ibigo by’ubumenyi n’uburezi biba bityo, amashuri yarasenywe bikabije, abarimu n’abahanga barahunga abandi barapfa. Inama yacu hano i Kigali ni ikimenyetso cy’icyerekezo cyiza cya Perezida Kagame n’imbaraga z’ibindi bihumbi by’abaturage bakoranye umurava kugira ngo basane igihugu. Ni ikimenyetso cy’ubudatsimburwa bw’Abanyarwanda."

Bai yakomeje avuga ko nubwo u Rwanda ari igihugu gito, ariko cyikemuriye ibibazo byacyo gishyira imbaraga mu bumenyi n’uburezi. Yavuze ko nk’ikigo ayoboye bishimira ko u Rwanda rwimakaje ubumenyi (Science) mu myigishirize yarwo.

Mu iyo nama, Perezida Kagame yavuze ko kuva kera abantu bagiye bifashisha ubumenyi kugira ngo bagere ku bisubizo by’ibibazo babaga bafite.

Ati “Ku bihugu biri mu nzira y’amajyambere by’umwihariko, ubumenyi bugira uruhare rukomeye mu guhindura imibereho y’abaturage n’ubukungu, binyuze mu gufasha kuziba icyuho hagati yacu n’ibihugu biteye imbere kuturusha. Ibyo nibyo byatumye u Rwanda rwita cyane ku bumenyi n’ikoranabuhanga mu myaka 20 ishize. ’’

Perezida Kagame kandi yavuze ko kugira ngo icyerekezo cy’igihugu icyo aricyo cyose kigerweho bisaba ishoramari mu nzego n’ibikorwaremezo by’uburezi, ubufatanye hagati y’abahanga mu bumenyi n’inzego zifata ibyemezo n’abashakashatsi nubwo hari aho bitaratezwa imbere.

Umuyobozi Mukuru wa TWAS yavuze ko ibihugu bya Afurika byose bihuje ingorane mu rwego rw’ubumenyi, ariko ko u Rwanda ari ikimenyetso cy’icyizere cya Afurika biturutse ku gushyira imbaraga mu guteza imbere ubumenyi, ikoranabuhanga no guhanga udushya. Agasaba ko ibyo bikwiye kuranga Isi muri rusange.

Bai yavuze ko u Rwanda rwageze ku ntsinzi yakunze kugaragara nk’igoye ibihugu byo ku mugabane wa Afurika, ariko ko n’ibindi bihugu bikwiye kwigira ku Rwanda kugira ngo bateze Isi imbere.

Yavuze ko ubwo Jenoside yakorewe Abatutsi yabaga, abanyeshuri ibihumbi 50 ari bo bigaga mu mashuri yisumbuye mu gihugu hose, ariko ko ubu bikubye inshuro 10, ndetse n’amasomo ya Siyansi akaba ari yo yashyizwemo imbaraga.

Mu mashuri ya Kaminuza ngo higaga abanyeshuri ibihumbi bitatu mbere ya Jenoside, ariko mu mwaka wa 2015, higaga abasaga ibihumbi 86, ibintu avuga ko bigaragaza intambwe idasanzwe u Rwanda rwateye.

Muri iyo nama Perezida Kagame yahawe igihembo cyo guharanira iterambere rishingiye ku bumenyi n’ikoranabuhanga mu Rwanda no muri Afurika, n’umwarimu muri Kaminuza y’u Rwanda, Prof Jean Bosco Gahutu, ahabwa umudali wa TWAS bitewe n’ubushakashatsi ku mirire yakoze.

Bai Chunli avuga ko ukurikije aho u Rwanda rwavuye n'aho rugeze, ibihugu byo muri Afurika bikwiye kurwigiraho
Muri iyi nama, Perezida Kagame yahembewe guteza imbere ubumenyi n'ikoranabuhanga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved