Inzobere yagaragaje uko imibare yaba umuti w’uruhuri rw’ibibazo bya Afurika

Yanditswe na Cyprien Niyomwungeri
Kuya 15 Werurwe 2017 saa 08:15
Yasuwe :
0 0

Muri sosiyete zitandukanye benshi bazi ko kwiga imibare birangirira mu guteranya, gukuba, kugabanya, kumenya inganyagaciro n’ibindi, gusa inzobere muri yo zemeza ko byaba ari ukwibeshya kuko ishobora kuba umuti w’uruhuri rw’ibibazo byugarije ibihugu cyane cyane ibya Afurika.

Inzobere mu mibare yigisha muri Kaminuza ya Essex mu Bwongereza, akaba n’Umuyobozi w’agashami ka UNESCO gashinzwe ubusesenguzi bukoresheje imibare, Professor Maria Fasli, asanga imibare yakemura bimwe mu bibazo bya Afurika birimo ubukene n’inzara.

Ejo kuwa Kabiri nibwo ku cyicaro cy’Ishuri Nyafurika ry’Imibare n’Ubumenyi (AIMS/African Institute for Mathematical Sciences), i Kigali habereye ibiganiro byahuje impuguke mu bumenyi n’abanyeshuri b’iri shuri ngo bigire hamwe uko imibare n’ubumenyi muri rusange bishobora gufasha Afurika gukemura bibazo ifite.

Maria Fasli yagaragaje ko gusesengura ibintu runaka hakoreshejwe imibare bifasha mu byiciro binyuranye by’imibereho, aho nko mu bukungu ari ingenzi cyane.

Yagize ati “Abayobozi bamwe na bamwe bakoresha imibare kugirango bakemure ibibazo byinshi muri Afurika, ntabwo ubumenyi bw’imibare bushobora gukemura buri kimwe ariko bwifitemo amahirwe yo guteza imbere ubukungu.”

Yakomeje avuga ko nko ku mugabane wa Afurika hakunda kugaragara ikibazo cy’inzara, kandi imibare yaba umuti wo kumenya uko cyakemurwa.

Yagize ati “Imibare ntabwo yakemura ikibazo cy’inzara ariko hari byinshi yagufasha, ufite nk’imibare ijyanye n’ubumenyi bw’Isi ku bijyanye n’imihindagurikire y’ibihe, ushobora kumenya niba hazabaho amapfa, ushobora gushaka uko ufasha abaturage, ukabagezaho amazi, ibiribwa [...]. Iyo udakoresha imibare ntushobora kumenya ibyo abaturage bifuza n’abakeneye kwitabwaho.”

Avuga ko ibikorwa remezo byakunze kuba ikibazo ariko ubu kitakiri imbogamizi cyane kuko ikoranabuhanga rimaze gutera imbere kandi rishobora kugira uruhare runini mu ikoreshwa ry’imibare.

Umwe mu banyeshuri biga imibare ku cyiciro cya gatatu cya Kaminuza muri AIMS, Irankunda Alice, yemeza ko ibyo biga bibemerera kujya muri sosiyete bakareba ikibazo runaka gihari, bagakoresha imibare mu gushaka uburyo bugenekereje bushobora kuba bwagikemura.

Yagize ati “Nka hano imibare twiga nshobora kuba najya muri banki nkateganya ngo ifaranga rizamanuka ku kigero iki n’iki haramutse hadakozwe ibi n’ibi, nshobora kujya mu bitaro wenda nka CHUK nkabona indwara nkareba ibiyitera cyane kurusha ibindi, ese iki kintu cyakorwaho iki kugirango ikibazo cy’iyo ndwara kibe cyakemuka.”

Kuwa 3 Mata 2017 iri shuri rifite icyicaro mu Rwanda rizafungurwa ku mugaragaro. Ryigamo abanyeshuri baturuka mu bihugu 10 bitandukanye, biga ibijyanye n’imibare ku rwego rw’icyiciro cya gatatu cya Kaminuza (Masters).

Umuyobozi w’agashami ka UNESCO gashinzwe ubusesenguzi bukoresheje imibare, Professor Maria Fasli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244