Imishinga itatu yahize indi yitezweho ibisubizo birimo kugabanya igihe abagenzi bategereza imodoka

Yanditswe na Evariste Nsengimana
Kuya 2 Ukwakira 2018 saa 10:17
Yasuwe :
0 0

Imishinga itatu y’urubyiruko yahize iyindi mu gutanga ibisubizo ku bibazo byugarija abatuye mu mujyi hifashishijwe ikoranabuhanga, buri umwe wahawe amadolari ibihumbi bitatu ndetse abawuteguye bemererwa amahugurwa y’amezi atatu, hagamijwe kubafasha kuyinoza kurushaho.

Ni mu marushanwa yasojwe kuri uyu wa Mbere, yateguwe na Minisiteri y’ikoranabuhanga, Ikigo cy’Igihugu gishinzwe ikoranabuhanga mu itumanaho n’isakazabumenyi, RISA, Ikigo cy’iterambere mu byerekeye Inganda, NIRDA n’Ikigo cy’Abadage cyita ku iterambere (GIZ).

Iyo mishinga irimo uwakozwe n’itsinda ry’abanya-Nigeria ‘SkyRocket’ uzafasha abantu kugabanya ingano y’inkwi zicanwa bakifashisha Gas.

Abawuteguye beretse akanama nkemurampaka ko ari ingirakamaro kuko ahenshi mu byaro no mu mijyi muri Afurika usanga bacana inkwi n’amakara, bikangiza ikirere n’ubuzima bw’abantu.

Mu 2017, ikigo cy’igihugu gishinzwe kurengera ibidukikije mu Rwanda cyerekanye ko 67% by’abatuye mu cyaro, batekesha inkwi n’amakara.

Umwe mu bagize wa SkyRocket, Oluwatabi Oyinlola, yabwiye IGIHE ko bitewe n’uko abantu kubona Gas bibagora, iryo koranabuhanga rizajya ribafasha kubageraho byoroshye.

Ngo rizajya rifasha abakoresha Gas kumenya ingano y’isigaye mu gicupa, rinamenyeshe abayiranguza ko yashizemo, bayigemure. Yavuze ko bifuza ko yazagera kuri 90% by’abanyarwanda.

Undi mushinga ni uw’itsinda ry’abanyarwanda ‘Binary Earth’ wateguye ikoranabuhanga ryitwa ‘Gerayo’, rizajya rifasha kugenzura umubare w’abagenzi bategereje imodoka ku cyapa muri Kigali.

Umwe mu bariteguye witwa Shema Arbin, yagize ati “Ni uburyo bwo kuzajya umenya abantu bari ku cyapa bategereje imodoka ukoresheje ibyuma bifata amafoto, ukaba wakoherezayo imodoka.”

Ngo rizanagabanya umwanya imodoka yataga ihagaze ahantu hatari abagenzi, ahubwo yihutire kujya aho bayitegereje ari benshi.

Umushinga wa gatatu wahembwe ni uw’itsinda STES, ryakoze Porogaramu yitwa ‘BazaFarm’ ifasha abahinzi kugenzura ingano y’amazi ari mu butaka buhingwa, ingano y’ifumbire abahinzi bakoreha n’ibindi hagamijwe kongera umusaruro w’ubuhinzi bukorerwa ku butaka buto.

Izahuriza hamwe amakuru ku buryo buri muhinzi ashobora kuyabona kuri murandasi kandi ikajya imuha amakuru ajyanye n’impinduka zibaye n’icyo yakora.

Umwe mu bayikoze witwa Rutangira Simbi Arsène yabwiye IGIHE ko izajya inahuza abahinzi n’ibigo bitanga amakuru ku buhinzi, bigakuraho urujijo ku bahinzi, wasangaga bugira ingaruka ku musaruro.

Umuyobozi w’ishami rishinzwe guteza imbere udushya n’umurimo muri Minisiteri y’ikoranabuhanga, Irere Claudette, yavuze ko byateguwe hagamijwe gufasha abantu kwerekana ubumeyi bafite mu buryo bufatika, bwafasha mu gukemura ibibazo byugarije umujyi.

Imishinga itatu yatsinze yatoranyijwe mu 10 imaze iminsi itanu yigwa, mu irushanwa ryitabiriwe n’imishinga 150.

Umushinga wabaye uwa kabiri ni uw’itsinda ry’abanyarwanda ‘Binary Earth’ wateguye ikoranabuhanga ryitwa ‘Gerayo’
Abiga muri STES babaye aba gatatu
Itsinda ry’abanya-Nigeria ‘SkyRocket rishyikirizwa sheki ya $3000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza