Hakozwe ikoranabuhanga rishobora gutahura kanseri y’ibere kurusha abaganga

Yanditswe na Habimana James
Kuya 3 Mutarama 2020 saa 02:47
Yasuwe :
0 0

Ikigo cya Google cyakoze ikoranabuhanga karemano rishobora gutahura ko umuntu arwaye kanseri y’ibere kurusha abaganga basanzwe.

Ubushakashatsi bwakoze kuri iri koranabuhanga, bwamuritswe kuwa Gatatu w’iki cyumweru.

Iyi porogramu yahawe ubumenyi bwo gutahura kanseri ikoresheje amashusho amagana iba yafashe mu bagore, yakoreshejwe mu Bwongereza na Amerika. Ubushakshatsi kuri iri koranabuhanga bugaragaza ko rishobora gutanga amakuru kurenza uburyo busanzwe.

Ugereranyije n’abahanga basanzwe bapima kanseri, iyi porogaramu yagabanyije amakuru atariyo ku kigero cya 5.7% ku banyamerika na 1.2% ku Bongereza.

CNN ivuga ko iyi porogramu yizewe cyane mu gutanga amakuru y’ukuri, gusa ikaba ifite inenge yo gukorana no guhana amakuru n’abahanga muri iyi ndwara, urugero nk’amakuru yerekeye umurwayi.

Prof. Ara Darzi, uyobora ikigo cy’ubushakashatsi cyitwa UK Imperial Centre cyo mu Bwongereza, avuga ko atari yiteze kubona ubu buhanga bw’iri koranabuhanga.

Ati “Ubu ni bumwe mu buryo bwavumbuye, bushobora kuzarogoya uko dusanzwe dukora ibipimo mu buryo bwo gutanga amakuru y’ukuri kandi atanga umusaruro.”

Ikigo American Cancer Society kivuga ko uburyo busanzwe bukoreshwa mu gupima kanseri, bukunze kwibeshya ku gutahura kanseri, ibi bikaba ku muntu umwe kuri batanu. Kimwe cya kabiri cy’abagore kandi ngo bahabwa amakuru atari yo kuri iyi ndwara bituma bahabwa ubuvuzi butari bwo.

Dominic King, ukora muri Google Health avuga ko ibyavuye muri ubu bushakashatsi bishimishije, bikaba kandi bigaragaza uko iri koranabuhanga rishobora gufasha mu gutahura iyi kanseri itaragera mu rwego rwo hejuru.

Ishami ry’Umuryango w’Abibumbye ryita ku buzima, OMS, rivuga ko mu 2018 abagore 627,000 ari bo bishwe na kanseri y’ibere.

Muri rusange OMS ivuga ko mu 2018 kanseri zishe abarenga miliyoni 9.6 muri miliyoni 18.1 by’abari bazirwaye.

Mu Rwanda habarurwa abanyarwanda ibihumbi 10 barwaye kanseri zitandukaye muri miliyoni zisaga 12 z’abaturage bose, aho iy’ibere iza ku mwanya wa kabiri nyuma y’ifata inkondo y’umura.

Ikigo cy’ubuzima (RBC) kigaragaza ko mu 2017 abarwayi barenga 500 bivurije kanseri y’ibere hirya no hino ku bitaro.

Google yakoze ikoranabuhanga ryakwifashishwa mu gutahura kanseri y'ibere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza