Kwamamaza

Huye: Abarimu 150 bahuguriwe ku gutoza abato gutinyuka ikoranabuhanga

Yanditswe kuya 27-09-2016 saa 07:28' na Prudence Kwizera


Abarimu barenga 150 bigisha mu bigo by’amashuri abanza n’ayisumbuye mu karere ka Huye bongerewe ubumenyi ku ikoreshwa rya mudasobwa no kugira ngo bazafashe mu ishyirwa mu bikorwa ry’umushinga wo gutoza abana bato gukurana umuco wo gukoresha ikoranabuhanga.

Aya mahugurwa y’iminsi ibiri yabaye kuva kuwa Gatandatu taliki ya 24 kugeza kuya 25 Nzeri 2016, by’umwihariko yibanze ku gukora porogaramu za mudasobwa, ibizwi nka ’code and programming.’

Jean Pierre Dusingizemungu, Umuyobozi w’ishyirahamwe ry’ababyeyi bagamije guteza imbere uburezi no guhugura, APEF (Association des Parents pour l’Education et la Formation), yasobanuye ko aya mahugurwa yateguwe hagamijwe gufasha mu ishyirwa mu bikorwa rya gahunda ya Leta y’u Rwanda yo gukoresha ikoranabuhanga mu burezi.

Ati “Aya mahugurwa ari guhabwa bamwe mu barimu bo muri Huye bavuye mu mirenge yose, kugira ngo bahugurwe ku bijyanye na porogaramu za mudasobawa (Coding and Programing), kuko murabizi ko muri iki gihe Leta y’u Rwanda hari politike yemeje irebana no gukoresha ikoranabuhanga mu burezi”.

Iri shyirahamwe APEF risanzwe rifite ishuri ryisumbuye ryitwa Cefotec, rikaba rigiye gutangiza Kaminuza izibanda ku kwigisha ikoranabuhanga, inyubako zayo zikaba arizo zatangiwemo amahugurwa.

Dusingizemungu yasobanuye ko aya mahugurwa yashyizwe mu bikorwa ku bufatanye bw’abafatanyabikorwa batandukanye barimo umushinga Africa Smart Code week wazanye abarimu, sosiyete icuruza mudasobwa za Positivo (Africa Smart Investment Distributor) yazanye mudasobwa zo kwigiraho, ndetse na APEF, yatanze ishuri ryo kwigiramo hamwe n’Akarere ka Huye kahamagaye abahugurwa.

Dusingizemungu yakomeja avuga ko biyemeje kuba abafatanyabikorwa mu gusakaza ikoranabuhanga mu Rwanda kuko bateganyije ko Kaminuza yabo izigisha amasomo yibanda ku ikoranabuhanga, kandi ngo biteguye no kuzakorana n’izindi kaminuza zo mu Rwanda no hanze mu bijyanye n’ikoranabuhanga.

Uhagarariye umushinga Africa Smart Code week mu Rwanda, Afrodis Mutangana, akaba n’umwe mu bagize uruhare muri aya mahugurwa, yasobanuye ko barie gutegura icyumweru cyahariwe kwigisha abana mudasobwa no gukora porogaramu zayo.
Abana bato bafite hagati y’imyaka umunani na 12 bakaba bazahugurwa muri icyo cyumweru kizatangira taliki ya 15 kugeza kuya 30 Ukwakira 2016.

Mutangana yagize ati “Turi guhugura abarimu kugira ngo bazadufashe guhugura abana bato. Ikigamijwe ni ugufasha abana bato gukurana umuco w’ikoranabuhanga, gukura babona ko mudasobwa ari igikoresho bashobora kwifashisha mu mikorere yabo ya buri munsi”.

Nk’uko byagarutsweho, ngo abana bato bazigishwa no gukora porogaramu za Mudasobwa ndetse n’ibindi byabafasha kumenya iboranabuhanga nko gukora imbuga za Internet,film y’ibishishanyo (dessins animés) n’ibindi.

Mu Rwanda, iyi gahunda yo gutoza abana bato gutinyuka Mudasobwa izabera mu turere twa Huye, Rwamagana, Nyamasheke, Muhanga no mu mujyi wa Kigali, naho muri Afurika yose izakorerwa mu bihugu 30, aho biteganyijwe ko hazahugurwa abana bagera ku bihumbi 150.

Clement Ndagije Iduhaye, Umukozi ushinzwe iterambere n’ibikorwa mu kigo gishinzwe gukwirakwiza Mudasobwa zikorererwa mu Rwanda za Positivo (Africa Smart Investment Distributor), yasobanuye ko uruhare rwabo muri iyi gahunda, ari ugufasha abanyeshuri bo mu mashuri abanza n’ayisumbuye ndetse n’abarezi babo kubona mudasobwa ku buryo bworoshye.

Yasobanuye ko umunyeshuri cyangwa umwarimu bashobora kumuha mudasobwa akayishyura mu gihe cy’imyaka ibiri, aho azajya yishyura amafaranga y’u Rwanda 500 ku munsi cyangwa akishyura mu cyumweru kimwe ibihumbi bitandatu bitewe nuko yifite.

Ibi ngo bizafasha mu ishyirwa mu bikorwa rya gahunda ya Leta y’ikoranabuhanga mu burezi, kuko umunyeshuri azoroherezwa akabasha gutunga mudasobwa ye, bityo ibyo yiga akabishyira mu ngiro.

Bamwe mu barimu bahuguwe bemeza ko iyi gahunda izagirira abana bato akamaro by’umwihariko mu kwigurira mudasobwa bakiga bazifite kuko aho bigisha nta mudasobwa zihagije zihari, bikaba bituma isomo ritagenda neza.

Ikindi ngo ni uko bizafasha abana bato gukurana umuco wo kwihangira imirimo bakoresheje ikoranabuhanga.

Dusingizemungu akaba yasabye ababyeyi n’abarezi gushyigikira gahunda ya Leta y’ikoranabuhanga mu burezi, bagurira abana babo mudasobwa kugira ngo bazitinyuke.

Abarimu bo mu Mirenge 14 igize Akarere ka Huye bahuguwe ku kwigisha abana porogaramu za mudasobwa
Clement Ndagije, umukozi ushinzwe iterambere n'ibikorwa mu kigo Smart Africa Investment Distributor
Jean Pierre Dusingizemungu, Umuyobozi wa APEF
Mudasobwa zikorerwa mu Rwanda za Positivo zashyizwemo porogaramu zifasha abana gutozwa ikoranabuhanga

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved