Kwamamaza

Abari bahangayikishijwe n’idindira rya ‘One Laptop per Child’ baremwe agatima

Yanditswe kuya 8-09-2016 saa 19:14' na Philbert Hagengimana


Nyuma y’ibibazo byagiye bivugwa muri gahunda ya ‘One Laptop per Child’, benshi bari batewe impungenge no kugerwaho kw’intego ya Leta y’u Rwanda yo kugera ku bukungu bushingiye ku bumenyi n’ikoranabuhanga.

Abo bantu barimo guhumurizwa, nyuma y’aho ikigo Africa Smart Investment Distribution (ASID) gitangiriye gahunda nshya yo kugeza mudasobwa ku banyeshuri n’abarimu, buri wese akagira iye ashobora no gukoresha nyuma y’amasaha yo mu ishuri, aho kuyikoreshereza ku ishuri gusa nk’uko byari bisanzwe ku banyeshuri bo mu mashuri abanza.

Mu bukangurambaga bugamije gushishikariza abayobozi b’amashuri n’abahagarariye ababyeyi kwitabira iyo gahunda, kuri uyu wa 8 Nzeri 2016 hari hatahiwe ibigo by’amashuri ya Arikidiyosezi ya Kigali, intego ya ASID ikaba ari uko buri munyeshuri na buri mwarimu nibura mu mashuri yisumbuye na Kaminuza, yatunga mudasobwa ikorerwa mu Rwanda.

Iduhaye Ndagije Clement, ushinzwe kumenyekanisha no gukwirakwiza gahunda za ASID, yatangaje ko mu kwezi gutaha icyo kigo gishobora kuzaba kimaze gukuba inshuro 10 umubare wa Mudasobwak imaze gutanga mu bigo by’amashuri yisumbuye kuva mu kwezi gushize, ndetse kandi ngo icyo kigo gifite ubushobozi bwo guhita kizigeza ku mashuri yose mu Rwanda mu gihe byaba bibaye ngombwa.

Ati “Kuva iyi gahunda twayitangira mu kwezi gushize tumaze gutanga mudasobwa zigera ku 4000 mu bigo by’amashuri yisumbuye, ndetse turizera ko muri uku kwezi tuzaba tumaze gutanga nibura mudasobwa 40,000.”

Ese hari aho iyo gahunda ya ASID itandukaniye na ‘One Laptop Per Child’?

Muri Gicurasi uyu mwaka, ubwo yagezaga raporo y’umwaka wa 2015 ku badepite, Umugenzuzi mukuru w’imari ya Leta, Obadiah Biraro, yerekanye ko mudasobwa zisaga ibihumbi 250 zakwirakwijwe mu mashuri abanza mu gihugu hose muri gahunda ya ‘One Laptop Per Child’, inyinshi zitari zigikoreshwa, ahubwo ko zari zitindikiye mu bubiko.

Ikigo cy’igihugu gishinzwe uburezi (REB), ari na cyo gifite mu nshingano gushyira mu bikorwa uwo mushinga, cyemezaga ko imicungire ya mudasobwa yari iteye inkeke, aha benshi bakabihuza no kuba zarahabwaga ibigo by’amashuri, ababiyobora bakaba ari bo bazicunga.

Ibyo byatumaga hari izibwa n’ubwo REB yakoranaga na Polisi y’igihugu mu gushakisha izibwe no guta muri yombi ababigizemo uruhare.

Mu gukemura izo mbogamizi zose no kwirinda ingaruka zatuma Leta y’u Rwanda itagera ku ntego yihaye mu burezi, ASID muri gahunda yayo, Mudasobwa zizajya zicungwa n’ababyeyi, dore ko ari na bo bazajya bazigurira abana babo, gusa bakoroherezwa.

Izo mudasobwa zikora zite?

Umukozi ushinzwe Tekiniki muri ASID, Iradukunda Alleluya, yatangaje ko izo mudasobwa ziri gutangwa mu mashuri abanza n’ayisumbuye, zikoresha ‘Processor’ ya ‘Intel’, zikagira RAM ya 2GB ariko ishobora no guhindurwa hagashyirwamo iya 4GB cyangwa 8GB.

Ifite kandi ‘Hard Disk’ ya 320 GB, ikaba irimo na Antivirus yo mu bwoko bwa Bitdefender iyirinda mu gihe cy’umwaka wose.

Iyo mudasobwa iba irimo kandi Ms Office 365 yishyuwe na Leta y’u Rwanda, ikaba ifite ububiko bwa Telabite 1, aho ushobora gushyira inyandiko zawe (Documents) cyangwa ibindi ufite muri mudasobwa, ukaba ushobora kubibona aho waba uri hose utagombye kugendana ya mudasobwa yawe.

Ku birebana n’ubushobozi bwa mudasobwa zagiye zihabwa abanyeshuri, ASID itangaza ko mbere yo kuzitanga ibanza kureba uyikeneye n’icyo azayikoresha, bivuze ko buri munyeshuri ayihabwa bitewe n’ibyo azayigiramo.

Ababyeyi baracyatseta ibirenge mu kwitabira

Antoine Rusingizandekwe, Umuyobozi w’urwunge rw’amashuri rwitiriwe Mutagatifu Yozefu w’Umukozi (GS St Joseph Le Travailleur) avuga ko iyi gahunda kuva yatangira mu kigo abereye umuyobozi kugeza ubu ari nta makemwa, gusa ngo izitirwa no kuba ababyeyi batayitabira uko bikwiye.

Ati “Ubwitabire bw’ababyeyi n’abarimu, icyo ni ikibazo gisaba ubufatanye bwa buri wese. Twigeze kubiganiraho n’ababyeyi mu nama, ariko kubyumva ntabwo ari ikintu cyoroshye, hari ikintu cy’amafaranga bikangamo.”

Uwo muyobozi akomeza avuga ko bakomeza kubibasobanurira bifashishije izindi mfashanyigisho zitanzwe na ASID, abanyeshuri bakabishishikariza ababyeyi babo, na bo bakaba bagomba kubyumva vuba bagendeye ku cyerekezo cy’igihugu mu ikoranabuhanga.

Amikoro ashobora kuba inzitizi rukumbi yo ku kugera ku ntego

Bamwe mu babyeyi batangaza ko gahunda nshya yo kugeza mudasobwa kuri buri mwana wese, ubwayo ari nta makemwa, gusa ngo izazitirwa no kuba hari ababyeyi bafite abana barenze umwe, kandi biga mu byiciro by’amashuri bitandukanye.

Muberarugo Jeanne, Umwe mu babyeyi yagize ati “Bitangira ababyeyi ntibabyumvaga, ariko ukurikije uburyo dukwiye kujyana n’igihe, utaguriye umwana imashini ubwo nawe uba uruhira ubusa. Ingorane zigihari ni uko hari ababyeyi b’amikoro make, bakirindiriza ngo barebe ko hari icyo ikigo cyabafasha.”

Ikiguzi cy’izo mudasobwa giteye gite?

Izo Mudasobwa zitangwa mu mashuri abanza n’ayisumbuye, ni izikorerwa mu Rwanda, zigakorwa n’uruganda Positivo BGH, zikazajya zishyurwa bitewe n’ubushobozi bw’uyikeneye.

Uyishaka ngo ayigure ahita yishyura icyarimwe, asabwa kwishyura amafaranga y’u Rwanda 219,900.

Uwishyura mu byiciro, mu mezi atatu, atanga amafaranga 84,081, uzishyura mu mezi atandatu akazajya atanga amafaranga 43.289, mu gihe uzishyura mu mezi 12 we atanga 22 929, n’aho uzishyura mu mezi 25 agatanga amafaranga 12 400.

Icyakora abahisemo kwishyura mu byiciro bose babanza gutanga amafarannga y’u Rwanda 15 000, mu gihe uwishyuriye rimwe nta yandi asabwa.

Hari na gahunda itekerezwa y’uko umubyeyi yazajya azigama amafaranga 500 buri munsi kuri mobile money, akazabasha kwishyurira umwana we mudasobwa, gusa ngo ibi byo ntibiratangira kuko bikirimo kunonosorwa.

Umwarimu uzakoresha Koperative Umarimu SACCO yishyura iyi mudasobwa, azatanga 290 2000 ahabwe na Internet izamara imyaka ibiri, mu gihe udashaka Internet we azishyura amafaranga 215 000.

Umwarimu naba yishyura iyi mudasobwa icya rimwe, azatanga amafaranga y’u Rwanda 219 000, ariko naba azishyura mu byiciro yishyure amafaranga y’u Rwanda 257 000.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved