WhatsApp yazanye utundi dushya muri iyi porogaramu yigaruriye imitima ya benshi

Yanditswe na Bizimana Jonathan
Kuya 18 Mata 2017 saa 09:05
Yasuwe :
0 0

Uko iminsi yicuma, ikoranabuhanga ryo guhanahana amakuru rirushaho gusakara mu bakuru n’abato, utirengagije abakecuru n’abasaza bamwe b’imvi zabaye uruyenzi, bituma n’ibigo bikomeye binoza imikorere mu gusigasira umubano bafitanye ndetse no gushyiraho uburyo bwizewe bwo gucunga amabanga yabo.

Mu bigo bimaze kubaka izina mu bijyanye n’ihanahana ry’amakuru, WhatsApp iri ku isonga mu mbuga nkoranyambaga zimaze kwigarurira imitima ya benshi, ndetse usanga hari abamara amasaha menshi bayikoresha.

WhatsApp igiye gukora uburyo buzafasha abayikoresha kuri telefoni zifite Android, gusiba ubutumwa bugufi bamaze kohereza igihe basanze bitari ngombwa kubwohereza cyangwa se harimo amakosa.

Independent dukesha iyi nkuru ivuga ko hari application nshya yarangiye gukorwa ariko ikiri kunonosorwa izafasha abantu bakoresha WhatsApp gusiba ubutumwa bwamaze koherezwa ariko ibi bigashoboka mbere y’iminota itanu ubutumwa bwoherejwe, yarengaho umuntu akaba atagishoboye kuba yasiba ubwo butumwa.

Nirangira izorohereza abifashisha uru rubuga mu guhanahana amakuru guhitamo uko ibyo banditse biba bimeze cyangwa se bigaragara.

Mu buryo bwari busanzwe, hari utumenyetso twifashishwaga kugira ngo ibyo umuntu ari kwandika bigire imimerere itandukanye. Iyo washakaga kwandika bisa nk’aho bitsindagiye wakoreshaga akamenyetso k’inyenyeri ukagashyira imbere n’inyuma y’ijambo, nka *gutya* na ho washaka ko bisa n’ibihengamye (italic) ukandika _gutya_ n’ibindi.

Mu rwego rwo korohereza abifashisha uru rubuga, aho kwifashisha turiya tumenyetso, mu minsi iri imbere umuntu azajya akanda ku ijambo yanditse agumisheho maze ahitemo uburyo ibyo yanditse biza kugaragara.

Umubare w’abakoresha WhatsApp ku Isi ugenda wiyongera umunsi ku wundi, ababarirwa muri miliyari na miliyoni 200 bahanahana amakuru bifashishije ubu buryo nkuko bigaragazwa n’ikusanyamakuru riheruka gukorwa muri Gashyantare 2017.

WhatsApp ikunzwe cyane n'abiganjemo abakibyiruka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza