Rubavu: Hatangijwe ikoranabuhanga ryo guhanahana amakuru y’ubuhinzi hifashishijwe telefone

Yanditswe na Mukwaya olivier
Kuya 30 Ugushyingo 2017 saa 04:58
Yasuwe :
0 0

Ikoranabuhanga rinyuze muri telefoni zigendanwa, rigiye kwifashishwa mu bahinzi bo mu karere ka Rubavu, aho bazajya bahererekanya amakuru ajyanye n’ubumenyi bw’ikirere, imihingire igezweho, amafumbire akwiye, igiciro cy’ibihingwa ku isoko n’ibindi hifashishijwe telefone.

Umuryango mpuzamahanga w’abanyamerika ugamije iterambere ku bufatanye n’abaterankunga banyuranye wamaze guhugura urubyiruko rw’abakobwa 30 bazakurikirana iki gikorwa bakanafasha abahinzi kwinjira muri iri koranbuhanaga.

Iri koranabuhanga rishingiye kuri telefone igendanwa, ryatangiriye mu makoperative ane y’abahinzi b’ibirayi mu mirenge ya Busasamana na Mudende mu karere ka Rubavu , aho abagize ayo makoperative bashyizwe ku rubuga rubahuza, bakajya basangira amakuru agezweho azajya aba yatanzwe na Minisiteri y’Ubuhinzi, aya makuru akabageraho ku buntu kandi buri munsi.

Umuhuzabikorwa w’Urubyiruko wanakurikiranye uyu mushinga Mutangana Emmanuel, avuga ko bizafasha abahinzi kumenya iteganyagihe n’ibiciro byagenwe na leta ndetse n’amafumbire agezweho.

Yagize ati “Abahinzi bazajya bakorana na Minagri aho izajya ishyira amakuru ku rubuga ku buryo buri muturage uzajya uba aruriho azajya ahita abona amakuru nko kumenya ifumbire igezweho,igiciro cy’ibirayi … Leta yashyizeho n’amakuru y’iteganyagihe, bakamenya igihe imvura iri bugwire kuburyo najya gutera agomba kuba azi neza ko imvura iri bugwe’’.

Umuyobozi wa koperative y’Abahinzi b’imbuto mu murenge wa Busasamana, Musabyimana Moussa Mustafa yavuze ko iri koranabuhanga rizabafasha kubera ko bagiye kujya bahinga bazi uko ikirere gihagaze.

Ati’’Dufite inyungu cyane kuko iyo uhinga ushingiye ku kirere cyangwa ku miterere y’ikirere bituma utera imbuto nziza wizeye kuko uba wamenye imvura izaba ihari cyangwa se igihe izuba rizavira ukaba ubizi.”

Urubyiruko rw’abakobwa bagera kuri 30 bose bahuguwe n’umuryango mpuzamahanga w’abanyamerika ugamije iterambere (USAID) ku bufatanye n’abaterankunga banyuranye.

Biteganyijwe ko iyi porogaramu izafasha abahinzi n’aborozi mu byiciro binyuranye, nyuma hakaziyongerah n’amakusanyirizo y’amata, abo bose bakazahabwa igihe cy’umwaka cyo kuba bakoresha iyi serivisi bahabwa amakuru ku buntu, nyuma y’icyo gihe bakajya biyishyurira.

Urubyiruko rw’abakobwa bagera kuri 30 bose bahuguwe n’umuryango mpuzamahanga w’abanyamerika ugamije iterambere (USAID) ku bufatanye n’abaterankunga banyuranye
Umuhuzabikorwa w’Urubyiruko wanakurikiranye uyu mushinga Mutangana Emmanuel
Umuyobozi wa koperative y’Abahinzi b’imbuto mu murenge wa Busasamana, Musabyimana Moussa Mustafa yavuze ko iri koranabuhanga rizabafasha kubera ko bagiye kujya bahinga bazi uko ikirere gihagaze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza