Ikoreshwa rya ‘smartphones’ zirimo gutangwa muri Connect Rwanda rizakurikiranwa rite?

Yanditswe na Evariste Nsengimana
Kuya 11 Mutarama 2020 saa 04:59
Yasuwe :
0 0

Ku wa 20 Ukuboza 2019 nibwo MTN Rwanda yatangije ubukangurambaga bwiswe Connect Rwanda Challenge, aho ibigo n’abantu ku giti cyabo bakomeje kwiyemeza umubare runaka wa telefoni zigezweho bazatanga zigahabwa abadafite ubushobozi bwo kuzigurira hirya no hino mu gihugu.

Muri iyi gahunda igamije kuzamura no kwihutisha ikoreshwa ry’ikoranabuhanga mu Rwanda, abantu batangiye gutanga izi telefoni ndetse umuntu agasaba undi ahisemo kugira icyo yiyemeza, bigakorerwa kuri internet cyane cyane ku mbuga nkoranyambaga.

Icyiciro cya mbere cy’ubu bukangurambaga ni ukwiyemeza gutanga telefone zigezweho, aho intego yacyo ari ukugira ngo uruhare rwa buri muntu rugaragare mu kugeza ikoranabuhanga ku batarifite hatangwa smartphones.

MTN Rwanda igaragaza ko by’umwihariko hagati ya Werurwe na Ukuboza 2019 yari imaze gucuruza Smartphone zizwi nk’Ikosora zirenga ibihumbi 50 ariko hakigaragara icyuho mu gufasha Abanyarwanda gutunga telefone zigezweho, aho bakiri munsi ya 20% kuko mu baturage basaga miliyoni 12, abafite smartphone basaga miliyoni 1.7.

Umuyobozi wa MTN Rwanda, Mitwa Kaemba Ng’ambi, yabwiye CNBC Africa ko ubukangurambaga bwa Connect Rwanda ari igitekerezo cyaje mu kureba uburyo inzego zitandukanye zagira uruhare mu kongera umubare w’abafite telefone zigezweho, kugira ngo boroherwe no kuzifashisha muri gahunda z’ishoramari.

Kuva ubu bukangurambaga butangijwe, abantu n’ibigo bitandukanye bamaze kwiyemeza gutanga Smartphones zisaga ibihumbi 50.

Ng’ambi yavuze ko MTN Rwanda yahisemo gufatanya na Minisiteri y’ikoranabuhanga na Inovasiyo muri ubu bukangurambaga kugira ngo zizagezwe ku bo zigenewe kandi babikwiriye.

Ati “Ku bufatanye na Minisiteri y’ikoranabuhanga na Inovasiyo hashyizeho uburyo bugaragaza neza uburyo bizakorwa, abantu bose badafite smartphones, bazi neza abafite n’abadafite smartphones.”

Yasobanuye ko na Minisiteri y’Ubutegetsi bw’igihugu isanzwe ifite imibare y’ingo zifite n’izitafite telefone zigezweho, ikazaba ariyo igenderwaho hatoranywa abazahabwa izigera ku bihumbi 50 zamaze kwiyemezwa n’abantu n’ibigo bitandukanye.

Ati “Impamvu turimo gukora ibyo ni ukugira ngo twizere ko smartphones izahabwa umuntu koko utayitunze uyu munsi kugira ngo twizere ko bijyanye n’intego muri rusange ariko nanone no kureba abantu batabasha kubona serivisi z’ikoranabuhanga.”

Icyiciro cya mbere cy’ubu bukangurambaga cyatangiye mu Ukuboza 2019 hagati biteganyijwe ko kizashyirwaho akadomo mu byumweru bitatu bya mbere bya Werurwe 2020.

Uretse gukusanya smartphones zizatangwa muri iyo gahunda no kuzishyikiriza abagenerwabikorwa, MTN Rwanda izanafatanya na Minisiteri y’Ikoranabuhanga na Innovasiyo mu gushyiraho integanyanyigisho y’uburyo abaturage bazajya bakoresha porogaramu zizashyirwamo no kubakangurira kuri serivisi zitandukanye z’ikoranabuhanga zakwifashishwamo.

Ng’ambi yakomeje ati “Tuzakomeza no gukurikirana kugira ngo twizere ko umuntu wayikoresheje ejo hashize azanayikoresha ejo hazaza, tunarebe niba hari icyuho mu kuzikoresha, tubabaze niba bibanogeye cyangwa niba hari ubundi bufasha twabaha.”

Yavuze ko inyigo zitandukanye zagaragaje ko mu gihe umubare w’abakoresha telefone wiyongereye, bigira uruhare mu kongera umubare w’abakoresha ikoranabuhanga ndetse n’umusaruro mbumbe w’igihugu ukiyongera.

Ati “Ku ruhande rwanjye icyo niteze ni uko bazakomeza kuzikoresha bagakomeza kugerwaho na serivisi zitandukanye batabonaga mbere. Nk’uko nabivuze, serivisi nyinshi za Guverinoma zirimo gutangwa hifashishijwe ikoranabuhanga ariko abantu bazibona baracyari bacye kubera ko badakoresha ibikoresho bizitangirwaho.”

“Ikindi mbona nk’amahirwe ni ubucuruzi buciriritse kuko mbere yo gutangiza ubu bukangurambaga, twaganiriye n’abantu benshi mu byaro tubabaza ‘Ese uwaguha smartphone ni iki wayikoresha?’ nk’abahinzi batubwiye ko hari amasoko ya kure y’aho batuye batabasha gucuruzamo ariko ko ‘bafite smartphone bashobora gufotora ibicuruzwa bakabishyira kuri internet bakaba babigura, bakabishyura nko kuri MTN Mobile Money n’ibindi.”

Yavuze ko hari n’abantu bakora n’abacuruza porogaramu za telefone batandukanye usanga batabasha kubona isoko ryazo rihagije kubera umubare muto w’abakoresha smartphone bazikenera, bityo uko bazagenda biyongera ari nako isoko rizaguka.

MTN Rwanda iteganya ko abantu bose bazahabwa izi telefone muri ubu bukangurambaga bazahabwa na Sim Card iriho na 1GB ya Internet mu gihe cy’amezi atatu ya mbere, mu rwego rwo kugabanya imbogamizi ku bantu bazitirwa no kubura internet.

Si ibyo gusa kuko inateganya uburyo na nyuma yazabagabanyiriza igiciro cya internet ku buryo batazajya bagorwa no kubona serivisi z’ikoranabuhanga no gukomeza gushaka smartphone zidahenze, ku buryo abantu bashobora no kuzigurira.

Biteganyijwe ko porogaramu 12 zizabanza gushyirwa muri izi telefoni zizatangwa muri #ConnectChallenge, zizaba ziri mu ndimi eshatu ari zo Ikinyarwanda, Icyongereza n’Igifaransa, bisobanuye ko abaturage bazihitiramo ururimi bakoresha.

Izo porogaramu zirimo Irembo, Serivisi za banki, iz’ubuzima, uburezi, kwishyura ifumbire bakoresheje Smart Nkunganire, amakuru ajyanye n’iteganyagihe n’ibindi.

Smartphones zitezweho korohereza ubuzima abaturage bo mu cyaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza