Ibyo wamenya kuri telefoni ziza ku isonga mu kugura akayabo ku isoko ry’u Rwanda

Yanditswe na Mukaneza M.Ange
Kuya 29 Mutarama 2018 saa 08:25
Yasuwe :
0 0

Samsung Galaxy S8, iPhone X na BlackBerry Key one, ni zimwe muri telefoni zirusha izindi guhenda ku isoko ry’u Rwanda, ku buryo zidapfa kwigonderwa na buri wese.

Ibi bituma abantu benshi bazibazaho byinshi ndetse bamwe ugasanga batiyumvisha ukuntu telefoni igendanwa ishobora kugura amafaranga akabakaba miliyoni imwe y’Amanyarwanda.

Twifashishije imbuga bwite z’inganda zikora izi telefoni ndetse n’izandika amakuru yerekeranye n’ikoranabuhanga nka CNET, twabakusanyirije bimwe mu bintu by’igenzi bizigize, udushya zifite n’ibibi byazo nk’uko byagiye bigaragagazwa na bamwe mu bazikoresha.

Samsung Galaxy S8+

Sumsung Galaxy S8+ ni telefoni yakozwe n’uruganda Samsung rw’abanya-Korea y’Epfo rubarizwa mu Mujyi wa Seoul, ishyirwa ku isoko tariki 21 Mata 2017, kugeza ubu ikaba igura ibihumbi 800 by’Amafaranga y’u Rwanda, ashobora kwiyongera cyangwa akagabanuka bitewe n’aho wayiguriye.

Galaxy S8+ ifite uburebure bungana na santimetero 15.748, ikirahure gikomeje mu mpera, ku buryo nta mfuruka wabona nk’uko bimeze kuri telefoni nyinshi, Camera y’imbere ifite megapixel 8 mu gihe iy’inyuma ari 12 bituma ifata amafoto asukuye. Ifite ubushobozi bwo kubika ibintu bingana na Gb 64 zishobora no kongerwa, ikaba ikoresha ndroid 7.0 (Nougat).

Ibyiza byayo

-  Kimwe mu byo abantu bakundiye iyi telefoni harimo kuba itinjirwamo n’amazi cyangwa ivumbi. Ishobora kumara iminota 30 mu mazi afite uburebure bwa metero 1.5 ariko ikavamo ari nzima.

-  Kuyishyiramo umuriro birihuta, ushobora kubikora bidasabye umugozi (wireless charging).

-  Uretse kuba kuyinjiramo ushobora gukoresha umubare cyangwa ijambo ry’ibanga nk’uko bisanzwe, inafite uburyo bwihariye bukoresha igikumwe (finger print), cyangwa isura yawe (Face Recognition).

Ibinengwa

-  Kuba ari nini biri mu bituma hari abagiye bagaragaza ko bibagora kuyikoresha kuko bibasaba gukoresha ibiganza byombi.
-  Umwanya ushyirwamo igikumwe nawo washyizwe mu gice kiri hafi ya camera y’inyuma, ibintu binengwa kuko bigora cyane uwifuza kuyifungura.

-  Porogaramu ya Bixby yiga umuntu ikamenya ibyo akunda gukora buri munsi ndetse ikaba yanamwibutsa, nayo inengwa kuba isa n’aho ntacyo imaze.

iPhone 8 Plus

iPhone 8+ yakozwe n’uruganda Apple rusanzwe ruzwiho gukora ibikoresho by’ikoranabuhanga byiza, yashyizwe hanze bwa mbere tariki ya 27 Nzeri 2017, ikaba igura hagati $ 699 na $ 949 [asaga ibihumbi 800 Frw] bitewe n’aho wayiguriye.

Ifite uburebure bwa santimetero 13.97 (upimiyiye ku kirahure), camera ya megapixel 12, ubushobozi bwo kubika ibintu bingana na Gb 64, ikoresha Apple iOS 11 (operating system). Imbere n’inyuma hakozwe n’ikirahure.

Ibyiza byayo

-  Ntiyinjiramo amazi n’umukungugu
-  Ifite ikoranabuhanga rituma urumuri rwayo rugenda rwihinduranye bitewe n’aho uri uburyo hasa.

-  Imiterere y’ijisho rya Camera yayo ituma ubasha kongera ubunini w’ifoto (zoom) inshuro 10, mu gihe amashusho wayongera akikuba inshuro esheshatu.

-  Ibasha gusoma igikumwe (finger print scanner).

-  Bateri yayo irambana umuriro kuko ushobora kumara amasaha 32

Ibinengwa

-  Iraremeye kuko ipima amagarama 202

-  Ntigira ahantu ho gucomeka utwumvisho (eacouteur).

-  Ubunini bwayo butuma bitoroha kuyifata mu kiganza.

iPhone X

Iyi n’indi telefoni yashyizwe hanze n’uruganda rwa Apple muri Nzeri 2017, nyuma y’igihe kitari gito yari imaze itegerejwe n’abasobanukiwe ibijyanye n’ikoranabuhanga. Igura $999 na $1 150 [agera kuri miliyoni y’amafaranga y’u Rwanda] .

Iyi telefoni ifite ubushobozi bwo kwakira ibintu bingana na GB 64 (Internal Storage), ikoreshwa na iOS 11. Camera yayo y’inyuma ifite megapixel 12, mu gihe iy’imbere ari zirindwi n’uburebure bwa santimetero 14.732.

Ibyiza

-  iPhone X ifite umwihariko w’uko ifungurwa hakoreshejwe isura y’umuntu (Face ID).

-  Ifite ikoranabuhanga rituma ibasha kukumenya kabone nubwo isura yawe yagenda ihinduka.

-  Porogaramu ya A11 Bionic yongera ingano y’amafoto n’amashusho (augmented reality).

-  Kimwe n’izindi telefoni zikomeje gukorwa muri iyi minsi kandi nayo ishobora gushyirwamo umuriro bidasabye umugozi (wireless charger).

Ibinengwa
-  Irahenze cyane, niyo telefoni ya Apple ihenze kurusha izindi.

-  Umuntu utamenyereye gukoresha iPhone iramugora kuko idafite utumenyetso tworohereza umuntu kwinjira muri telefoni (home button).

-  Ntifite aho umuntu ashyira utwumvisho.

-  Kuba inyuma ari ikirahure bisaba kwigengesera cyane ngo kitangirika

BlackBerry Keyone

Blackberry Keyone ni telefoni yashyizwe hanze n’uruganda Blackberry muri Gashyantare 2017, ikaba igura ibihumbi 600 by’Amanyarwanda.

Keyone n’imwe muri telefoni zakozwe n’uru ruganda zikoresha Android (Android 7.1 Nougat), umwihariko wayo akaba ari uko yo ifite aho bandikira h’imibare n’amagambo (QWERTY Keyboard).

Ifite uburebure bwa santimetero 11.43, camera y’imbere ifite megapixel umunani mu gihe iy’inyuma ari 12. Ifite RAM ya GB 4 n’ubushobozi bwo bwakira ibintu bingana na GB 64.

Ibyiza

-  Aho kwandikira hafite imibare n’inyuguti zigaragara (physical keyboard)
-  Porogoramu zifite ubushobozi bwo kuyirinda ibitero by’ikoranabuhanga

-  Camera ifite ubushobozi bwo gufata amafoto meza

-  Bateri itindana umuriro aho ushobora kumara iminsi ibiri n’igice ku muntu udakunda gukina imikino ya telefoni.

Ibinengwa
-  Ntisohora amajwi neza igihe umuntu yumva umuziki
-  Igihe umuntu ayikoresha ntiyihuta cyane (underpowered CPU).

HTC U Ultra

HTC U Ultra ni telefoni igendanwa yakozwe n’uruganda HTC rwo muri Taiwan, yashyizwe ku isoko muri Gashyantare 2017, icyo gihe ikaba yaraguraga amadolari 750 [asaga ibihumbi 600 Frw].

Ifite uburemure bwa santimetero 14.478, inyuma hakozwe nk’ikirahure ku buryo umuntu ashobora kwireberamo, camera y’imbere ifite megapixel 16 n’iy’inyuma ya 12. Indangururamajwi zisohora amajwi asukuye.

HTC U Ultra ifite umwihariko wo kuba igihe cyose uyifashe mu ntoki ihita ikwereka byihuse abaguhamagaye bakakubura, ubutumwa bugufi bwaje, ndetse n’isaha bitabaye ngombwa ko ubanza kuyicana. Kuba ifite inyuma hajya kumera nk’ikirahure kandi bituma irushaho gusa neza.

Mu byanenzwe cyane kuri iyi telefoni harimo igiciro cyari gihanitse ugereranyije n’ingano yayo, iki giciro ariko cyagiye kigabanuka kuri ubu ikaba iri hagati y’ibihumbi 320-500 by’Amanyarwanda.

HTC U Ultra kandi inengwa kuba itagira ahantu ho gucomeka utwumvisho (Ecouteurs), batiri idatindana umuriro no kuba ishobora kwinjirwamo n’amazi akayangiza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza