00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Babangamiwe no kudakoresha telefone zabo kubera kutagira umunara hafi

Yanditswe na Hakizimana Jean Paul
Kuya 20 Ukwakira 2021 saa 04:51
Yasuwe :
0 0

Abaturage bo mu Karere ka Bugesera mu Murenge wa Ruhuha baravuga ko babangamiwe no gutunga telefone ariko ntibabashe kuzikoresha kubera kutagira umunara hafi bituma bakurura uwo mu Burundi.

Iki kibazo gifitwe n’abaturage bo mu Kagari ka Bihari mu Murenge wa Ruhuha mu Karere ka Bugesera, aka Kagari kakaba gaturanye n’igihugu cy’u Burundi muri telefone zabo usanga hiyanditsemo umunara wo muri iki gihugu ku buryo badashobora guhamagara cyangwa ngo bahamagarwe.

Bamwe mu baturage baganiriye na IGIHE bavuze ko kutagira umunara hafi yabo ari byo bitera iki kibazo bikaba bituma bahomba ibintu byinshi birimo kutamenya amakuru no kudakoresha telefone icyo baziguriye.

Ahishakiye Monique utuye mu Mudugudu wa Rugarama mu Kagari ka Bihari mu Murenge wa Ruhuha, yavuze iki kibazo gikunze kugaragara kuri telefone nini ngo uduto nibura rimwe na rimwe tugera aho tugakora.

Ati “Dufite umunara hakurya mu Burundi utuma tudashobora gukoresha telefone nini, iyo duhamagaye batubwira ko nimero duhamagaye tudashobora kuyibona ariko bikavugwa mu Kirundi, dufata umunara wa Intercell wo mu Burundi ku buryo tudashobora guhamagarana.”

Ahishakiye yavuze ko kudakoresha umunara wo mu Rwanda bibagiraho ingaruka zitandukanye zirimo kutamenya amakuru no kudakoresha telefone icyo baziguriye.

Ati “Nk’ubu mfite telefone nini navugana n’abavandimwe nkanakoresha imbuga nkoranyambaga nkamenya amakuru ariko kubera uwo munara wo mu Burundi dukurura bituma tutamenya amakuru.”

Yasabye Leta kubafasha bakabona umunara ushobora kubafasha gukoresha telefone zabo ngo kuko iki kibazo kimaze igihe kirekire kizwi ariko ngo nta kirakorwa.

Gasana Jean Pierre utuye mu Mudugudu wa Rwanzunga muri aka Kagari ka Bihari we avuga ko iki kibazo kimaze igihe kirekire kizwi bakaba barategereje ko gikemuka bagaheba.

Ati “Ingaruka bitugiraho ni uko duhamagara ntibikunde naba nshaka guhamagara abo mu Kagari kacu cyangwa abo mu yindi mirenge ntibikunda pe, nk’ubu nshobora kugira ikibazo nashaka gutabaza ubuyobozi ntibikunde kubera ko telefone yanjye iba isa nk’aho itariho.”

Umuyobozi w’Umudugudu wa Rwanzunga, Ntakirutimana Anastase we yavuze ko iki kibazo bagerageje kukivuga mu myaka ibiri ishize ngo kuko kibangamiye abaturage benshi, ubuyobozi ngo bwari bwabijeje ko bugiye kugikemura ariko ngo kuva COVID-19 yaza ngo bahise babigendamo gake.

Yasabye Leta kubafasha iki kibazo kikabonerwa umuti ngo kuko kibangamiye abaturage benshi batabasha guhamagara cyangwa guhamagarwa kandi bafite telefone ngendanwa.

Umuyobozi ushinzwe ibigo by’Ikoranabuhanga muri RURA, Charles Gahungu, yabwiye IGIHE ko iki kibazo bakizi aho ngo kiri mu Kagari kamwe ka Bihari, yavuze ko mu mwaka ushize bashyize umunara umwe mu mirenge ibiri ya Ngeruka na Nyarugenge aho bari bizeye ko wanagera kuri aba baturage ariko ngo ntibyashobotse.

Ati “Uyu mwaka rero twashyizeho ingengo y’imari yo kubaka umunara muri aka Kagari ka Bihari, ubu tuvugana imirimo yo kubaka yaratangiye ukwezi k’Ugushyingo kuzarangira umunara wararangiye. Imirimo nikomeza kugenda neza ntihabeho imbogamizi rwose turabizeza ko Ugushyingo kuzarangira ikibazo cyabo gikemutse.”

Yasabye abaturage kuba bihanganye muri iyi minsi abizeza ko bidatinze ikibazo bafite kizakemuka burundu bagakoresha telefone zabo neza.

Abatuye mu Bugesera barasaba ko bakubakirwa umunara kugira ngo babone uko bakoresha telefone zabo
Abaturage bavuga ko bakurura umunara wo mu Burundi bigatuma batabasha guhamagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .