Australia: Hatangiye iperereza ku makuru y’iturika rya iPhone 7

Yanditswe na Ishimwe Israel
Kuya 24 Ukwakira 2016 saa 12:43
Yasuwe : XX
0

Nyuma y’amakuru amaze iminsi atangazwa kuri telefoni za Samsung Galaxy Note 7, ubu noneho biravugwa ko hari iPhone 7 yaba yaturikiye muri Australia ndetse iperereza rikaba ryatangiye ngo hamenyekane ukuri ku cyateye iyi mpanuka.

Umunya-Australia ukomoka muri Nouvelles-Galles mu Majyepfo y’iki gihugu, ukina umukino wo kugendera hejuru y’amazi, Mat Jones, ahamya ko ku itariki 20 Ukwakira 2016 ubwo yari avuye mu myitozo yageze ku modoka ye akabona irimo umwotsi yafungura agasanga ni iPhone 7 yahiye.

Mu kiganiro yahaye Televiziyo ya 7 News, Mat yasobanuye ko iPhone 7 ye yari amaze icyumweru ayiguze kandi ko atigeze ayitura hasi cyangwa ngo ayishyiremo umuriro adakoresheje umugozi (charger) yabiguranye.

Ati “Nitegereje aho imodoka yanjye nari nayisize, sinabashaga no kubona ikirimo imbere. Ibirahure byari byahindutse umukara. Hari ivu ku ipantalo nari narambitsemo, telefoni nayo iri guhiramo imbere.”

Ubuyobozi bw’uruganda rwa Apple rukora iPhone 7 bwatangarije urubuga Mashable dukesha iyi nkuru ko iperereza ryatangiye ngo hamenyekane ukuri ku cyaba cyatumye iriya telefoni ishya.

Mu minsi ishize nibwo uruganda rwa Samsung ruhanganye cyane na Apple rwafashe umwanzuro wo kuvana ku isoko Galaxy Note 7 kubera ibibazo byo guturika byari byaragiye bigaragara ku bazitunze hirya no hino ku isi.

Apple yatangiye gukora iperereza ku cyatumye iPhone 7 ishya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza