Kwamamaza

Abiga mu mashuri abanza n’ayisumbuye bagiye kwemererwa telefone ku ishuri

Yanditswe kuya 11-09-2016 saa 17:16' na Niyonsenga Schadrack


Mu myaka itatu, Abanyeshuri biga mu mashuri abanza n’ayisumbuye bazaba bashyiriweho gahunda yo gukoresha telefone mu rwego rwo kwihutisha ikoreshwa ry’ikoranabuhanga mu bushakashatsi.

Gahunda ya Leta y’u Rwanda igamije gukuraho inzitizi ku ikoranabuhanga mu Rwanda yatewe inkunga na Koreya y’Epfo mu gihe cy’imyaka itatu izafasha abanyeshuri kubona ibikoresho by’ikoranabuhanga nka mudasobwa na telefone zigezweho, muri icyo gihe abanyeshuri bakazemererwa kujyana ku ishuri ibyo ibikoresho.

Izi telefone zizashyirwamo porogaramu yitwa ‘Open Sources’ izafasha abanyeshuri mu myigire yabo nk’uko The East African dukesha iyi nkuru yabyanditse.

Kugeza ubu muri Koreya y’Epfo abanyeshuri bose bemererwa kujyana telefone ku ishuri icyakora ziba zirimo uburyo bufasha abarimu kuzifunga zigakoreshwa mu gukora ibintu bimwe na bimwe nko guhamagara nimero z’ubutabazi cyangwa kohereza ubutumwa bugufi.

Umunyamabanga Uhoraho muri Minisiteri y’Uburezi, Dr Celestin Ntivuguruzwa, avuga ko kwemerera abanyeshuri gukoresha ibikoresho by’ikoranabuhanga bizabafasha kwiyungura ubumenyi mu buryo bworoshye.

Yagize ati “Gahunda ya Koreya y’Epfo ijyanye n’iyacu yo kugira abantu bazobereye mu ikoranabuhanga, telefone zizemerwa mu mashuri nk’ibikoresho bisanzwe by’uburezi, ntabwo zizaba ari izo kwinezeza.”

Umwarimu muri Kaminuza ya Pai Chai akaba n’impuguke mu kigo cy’Ububanyi n’Amahanga cya Koreya y’Epfo, Prof Jong-Dae Park avuga ko ikoranabuhanga ari ryo rirangaje imbere igihugu cye, bityo ibi bikoresho bizahabwa abanyeshuri bizaba birimo aho gushakira amakuru yose.

Yongeyeho ko izi telefone zizahabwa abana bo mu Rwanda zizaba zirimo imfashanyigisho z’uburyo bashobora gutegura amasomo.

Kujyana telefone bishobora gufasha abanyeshuri kwiyungura ubumenyi mu buryo butandukanye burimo nko gukoresha internet mu masomo yabo, abiga iby’ubumenyi bw’Isi bakaba bamenya uko inyenyeri n’indi mibumbe bimeze mu kirere, iby’imyuka yangiza ikirere n’inyenyeri n’ibindi.

N’ubwo leta y’u Rwanda yemeye iyi gahunda, izi telefone ntabwo zizatangirwa ubuntu, ibi bishobora kuzabera inzitizi abana b’abakene.

Dr Ntivuguruzwa avuga ko leta yoroherereje abanyarwanda bose by’umwihariko abanyeshuri kubona mudasobwa z’uruganda rwa Positivo BGH rukorera mu Rwanda ndetse na One laptop per child.

Iyi gahunda ijyanye kandi n’iyo leta y’u Rwanda yiyemeje mu nama y’abaminisitiri yabaye ku wa 27 Mata 2016 yo kwigisha ikoranabuhanga. Mineduc ivuga ko gahunda y’uburezi iriho kuri ubu ari uko muri 2020 hazaba hakoreshwa ikoranabuhanga rigezweho mu mashuri yose.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved