Ubu ntibikiri ngombwa gushaka umukozi ushinzwe ikoranabuhanga BSC ihari

Ubu ntibikiri ngombwa gushaka umukozi ushinzwe ikoranabuhanga BSC ihari


Yanditswe kuya 2-06-2012 - Saa 09:20'

Umuyobozi w’ikigo nyarwanda cy’umurongo mugari wa internet (Broadband System Corporation), Antoine Sebera arahamya ko bitakiri ngombwa gushaka umukozi ushinzwe ikoranabuhanga mu kigo gitoya gishobora kuba gikoresha mudasobwa zitarenze 10 ndetse bitakinagomba gukoresha imigozi kugira ngo ubone umurongo wa internet.

Ibi ni ibyo uyu muyobozi w’isosiyete nshya nyarwanda y’ikoranabuhanga yatangaje ubwo yahaga abanyamakuru ibisobanuro bihagije ku bijyanye n’iyi sosiyete, icyo ikora n’icyo iteganya gukora mu minsi izaza.

“Twebwe tuzanye uburyo bushya bworohereza abantu gukoresha ikoranabuhanga rya mudasobwa. Akarusho dufite ni uko abantu batugana bakora ibikorwa byabo nk’uko umuntu yakoresha gmail. Ntabwo ari ngombwa ko umuntu yigurira Servers, twebwe turabafasha kubika amabanga yabo bakoresheje “servers” zacu, tukanabashyirira ibikorwa ku murongo, byose bitwaye umwanya muto n’ikiguzi gito, kurusha uburyo bwari busanzwe.”

Mu gufasha abantu gusobanukirwa neza imikorere ya BSC ni icyo aricyo, Sebera avuga ko BSC ari ikigo nyarwanda kandi kigenga ijana ku ijana kije mu rwego rwo gufasha abakora ibikorwa bya internet banini bo ku rwego rwo hejuru, bakabahuza na buri muntu ku giti cye ku rwego rwose ariho, ndetse n’ibigo bito, umuntu wese akabasha kubona icyo yifuza, agakora icyo ashaka bimworoheye.

Sebera avuga ko nta muntu ubu wagapfanye igitekerezo kubera kubura ubushobozi bw’amafanga ngo abashe kugishyira ku isoko cyangwa ahagaragara.

“Ntawe ugomba kuba afite igiterekerezo kiza cy’umushinga ngo avuge ko yabuze ubushobozi bw’amafaranga. Ufite igitekerezo atugane tubimufashemo kugeza igihe azabasha gushyira ibintu bye ku isoko, tubone gutangira kugira icyo twamwishyuza nabwo gito ariko twamufashije.”

Bimwe mu bikorwa BSC igeza ku Banyarwanda ndetse n’abanyamahanga, harimo; koroshya imikoresherezwe ya mudasobwa na Internet (Cloud Computing), kubikira ababishaka amabanga n’inyandiko kuburyo bibibona igihe babyifurishe (Data Services center), korohereza abafite imbuga za internet no guteza imbere ikoreshwa rya internet mu buryo bugezweho.

Kuri ubu BSC ifite abakiliya bagera kuri 500 bose bakoresha umurongo mugari. Aba bakiliya baragenda biyongera umunsi ku munsi ari nako BSC yongera ubushobozi bwayo bw’umuyoboro yongera ikurikije abayigana. Kuri ubu irakoresha Megabyte 600.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO