Zimwe mu ngaruka za internet ya Wi-Fi ku binyabuzima n’uburyo wazirinda

Yanditswe na Ishimwe Israel
Kuya 19 Nzeri 2016 saa 05:11
Yasuwe :
0 0

Mu gihe Isi irushaho gutera imbere ni nako abahanga mu by’ikoranabuhanga barushaho kwagura inzira zo guhanahana amakuru binyuze mu buryo butandukanye.

Muri iyi minsi Wi-Fi ni uburyo bugezweho bukoresha internet idasaba ihuzanzira ry’imigozi icomekwa ku mashini (wireless connection), ni imwe mu nzira zikoreshwa na benshi mu kwihutisha ibyo bakora na serivisi batanga.

Gusa ubu bwoko bwa internet kuva bwahangwa mu mwaka wa 1997, abashakashatsi batandukanye bagaragaje ko hari ingaruka bushobora kugira ku buzima rusange bw’abantu n’ubwo mu mutwe bayihora iruhande, cyane cyane abana bakiri bato bitewe n’imbaraga zitagaragara ziba zibakikije.

Ku itariki ya 7 Gicurasi 2008, hasohotse inyandiko yiswe “Mind Control by Cell Phone” yakozwe n’abahanga b’Abanyamerika bayobowe na Fields, R. Douglas isobanura ingaruka za internet nziramugozi (Wi-Fi) ku bwonko bw’umuntu.

Ikinyamakuru Global Healing Center cyashyize ahagaragara zimwe mu ngaruka umuntu ukoresha Wi-Fi ashobora guhura nazo.

- Itera indwara yo kubura ibitotsi

Izo nyandiko zagaragaje ko iyo umuntu aryamye mu nzu irimo internet nyinshi nziramugozi ishobora gutuma bikuza ibibazo byo kubura ibitotsi. Abo bahanga kandi bagaragaje ko kubura ibitotsi ari intangiriro y’umunaniro udasanzwe n’umuvuduko ukabije w’amaraso.

- Idindiza imikurire y’umwana

Nkuko izo nyandiko zakomeje zibigaragaza, ngo guhora ahantu hari Wi-Fi bishobora gutuma habaho idindira ry’imikurire y’utunyangingo mu mubiri.

Izi nyandiko zuzuzanya n’ubushakashatsi bwakorewe muri Autriche muri 2009.

- Ingaruka mu mikurire y’utunyangingo

Itsinda ry’abahanga bo muri Denmark bakoreye ubushakashatsi ku bimera bagira ngo barebe ingaruka za Wi-Fi ku mikurire y’utunyangingo ku binyabuzima.

Aba bashakashatsi bashyize telefoni n’agakoresho kifashishwa mu gusakaza iyi nziramugozi (Router) bifite Wi-Fi hafi y’igiti cyari kiri kumera, banashyira telefoni na Router zidafite Wi-Fi ku bimera; icyagaragaye ni uko ibimera byegerejwe telefoni na Router bifite Wi-Fi bitigeze bikura.

- Ituma ubwonko budakora neza

Ubushakashatsi bwakozwe n’Ikigo cy’Abanyamerika cyiga ku buzima bw’imikurire y’ubwonko mu mwaka wa 2007 bwagaragaje ko abanyeshuri bo muri Denmark bigaga mu mashuri yisumbuye nyuma yo gutangira gukoresha internet nziramugozi mu mashuri yabo, batangiye kwibagirwa no kudashyira umutima kubyo bakora.

-  Yangiza n’intanga z’abagabo

Mu nyigo yasohotse mu kinyamakuru Journal Fertility and Sterility , mu kwezi kwa Mbere kwa 2012 muri nimero yacyo ya 97, ku rupapuro rwa 39–45 yagaragaje ko gushyira mudasobwa, telefone cyangwa ibindi byuma birimo internet nziramugozi ya Wi-Fi ku bibero bigabanya ubushobozi bw’uburumbuke ku bagabo.

Ibi byemejwe nyuma yo gukorera ubushakashatsi ku bakorerabushake 29, bafata make mu masohoro yabo bakayashyira hafi na internet ya Wi-Fi, nyuma y’amasaha ane, 25% y’intanga zabo zari zamaze kwangirika. Ibi bikagira ingaruka zo kutabasha gutera inda.

- Ishobora kubuza abagore amahirwe yo gusama

Mu nkuru yasohotse mu kinyamakuru Sunday Mirror, tariki ya mbere Mata 2004, Kaminuza ya Karolinska yigisha iby’ikoranabuhanga muri Suède, yaburiye abagore batwite cyangwa bitegura gusama, kwirinda kwegera ibikoresho bifite internet nziramugozi kuko ngo ishobora gutuma badasama.

* Wakora iki ngo wirinde ingaruka ziterwa na internet nziramugozi?

Ntibyoroshye guhagarika ubukana bw’imbaraga ziva kuri Wi-Fi, ariko abahanga b’Abanyamerika bo mu kigo Mpuzamahanga cyita ku buzima, Global Health Center bavuga ko abantu bakwiye kujya birinda kwiyegereza ibikoresho byamaze gufata internet ya Wi-Fi, ndetse bakazimya ibikoresho bifite Wi-Fi mu gihe batari kuyikoresha. Basabwa kandi kwirinda gusinzirira mu cyumba irimo.

Aba bahanga kandi bavuga ko hari utwuma umuntu ashobora gushyira kuri ibyo bikoresho tukagabanya ubukana bwa Wi-Fi ku buzima bw’umuntu.

Utu dukoresho dushyirwa ku kirahure cya mudasobwa cyangwa telefoni, mu rwego rwo kugabanya ubukana bw’imirasire iyiturukamo.

Hari n’igifuniko cyitwa Belly Blanket cyangwa Nursing Cover, gikoreshwa n’abagore batwite barambika ku nda cyangwa bakagitwikiriza abana kugira ngo ubukana bwa Wi-Fi butabagiraho ingaruka.

Internet nziramugozi ya Wi-Fi ikoreshwa muri serivisi zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244