Umuburo ku bato b’u Rwanda internet yategeje ‘poronogarafi’

Yanditswe na Rabbi Malo Umucunguzi
Kuya 15 Gicurasi 2018 saa 12:23
Yasuwe :
0 0

Iyo uteye ijisho ku mubare w’Abanyarwanda basura imbuga z’amashusho y’urukozasoni [pornography/poronogarafi], ugwa mu kantu; bigeze ku rwego imitima ya benshi yatwawe no kureba ibyerekeye ubusambanyi ihugwa gushaka ibifite akamaro.

Mu mbuga za internet 50 zisurwa cyane mu Rwanda, ebyiri muri zo ni iz’amashusho y’urukozasoni. Nta gushidikanya ko benshi mu bazisura bari ahanini mu kigero kiri munsi y’imyaka 40, gusa igiteye inkeke ni uko n’urubyiruko ruri munsi y’imyaka 20 kuri ubu kureba ayo mashusho bimaze gusa n’ibyinjiye mu buzima bwabo bwa buri munsi bitewe n’ukuntu internet igera hose mu gihugu kandi inahendutse cyane ugereranyije n’uko bimeze mu bihugu byinshi ku mugabane wa Afurika.

Kureba izi film hari ibihugu byamaze gushyiraho akadomo, bimwe bigena umupaka ku cyiciro runaka cy’abantu cyangwa bikazifunga bigendeye kuri miterere yazo mu gihe nko mu Rwanda usanga n’abato bafite internet bazireba nta gitangira.

Nyamara ibikorwa nk’ibyo birahanirwa, kuko Igitabo cy’Amategeko ahana ibyaha mu Rwanda, ingingo ya 188 ivuga ko “umuntu wese umurika, ucuruza cyangwa ukwiza indirimbo, inyandiko izo ari zo zose, ibimenyetso, amashusho, ibirango cyangwa ibindi bintu by’ibiterasoni, ahanishwa igifungo kuva ku kwezi kumwe ariko kitageze ku mezi atandatu n’ihazabu ya 100.000 Frw kugeza kuri miliyoni 2.000.000 Frw cyangwa kimwe gusa muri ibyo bihano.”

‘Urukozasoni’ mu Rwanda

Usibye indirimbo z’abahanzi ziri kunyuzwamo bimwe mu bifatwa nk’ibiterasoni cyangwa film, hari imbuga nyinshi zinyuzwaho amashusho y’urukozasoni, ziri mu zisurwa cyane kurusha na bimwe mu bitangazamakuru bikomeye uzi byandikirwa kuri internet ntiriwe mvuga.

Usanga izisurwa cyane mu Rwanda ari imbuga nka Xvideos iri ku mwanya wa 32 ku rutonde rw’imbuga zisurwa cyane mu Rwanda na Xnxx iza ku wa 41, ndetse iyo uzisuye usangaho amashusho y’ubusambanyi arimo n’Abanyarwanda, ugendeye ku rurimi bavuga. Bisobanuye ko kuri ubu Abanyarwanda nabo basigaye barinjiye mu ikinwa rya porono.

Minisiteri ya Siporo n’Umuco iheruka gutera intambwe yamagana “amashusho y’urukozasoni n’andi yerekana ibice by’ibanga by’umubiri anyuzwa muri film, indirimbo, imbuga nkoranyambaga, itangazamakuru cyangwa ubundi buryo bwose” ko “anyuranyije n’umuco Nyarwanda kandi abujijwe.”

Mu itangazo yasohoye ku wa 27 Mata, Minisitiri wa Siporo n’Umuco, Uwacu Julienne, yagize ati “Minisiteri iramagana ibikorwa ibyo aribyo byose bikwirakwiza ayo mashusho, inasaba Abanyarwanda bose n’abafite ibitangazamakuru by’umwihariko, gufasha mu gukumira no kurwanya abagenda babikora.”

Yakomeje igira iti “Kumurika, gucuruza cyangwa gukwirakwiza amashusho y’urukozasoni ni icyaha gihanwa n’amategeko y’u Rwanda.”

Abenshi bononekara uruhongohongo

Guverinoma y’u Bwongereza iheruka gufata umwanzuro ko uyu mwaka uzajyana n’ubwisanzure bwo kureba amashusho y’urukozasoni nka Poronogarafi kuri internet, kugira ngo wemererwe kuyareba ukazajya ubazwa niba ufite imyaka 18.

Ni icyemezo cyashyiriweho kurinda ko abana bagwa mu mutego wo kureba izo film z’urukozasoni zerekana ibikorwa birenze ubwenge baba bagezeho.

Birenga urubibi iyo bigeze kuri film nyinshi usanga abazikina bagaragaza ko bafitanye amasano ya hafi nk’umwana na nyina, umuhungu na mushiki we cyangwa bigakorwa mu buryo bubabaza umubiri.

Bigera no ku zo bakina bafata ku ngufu, ibintu byarakaje Abongereza mu 2013 bakandikira uwari Minisitiri w’Intebe, David Cameron, bamumenyesha ko gukoresha ihohoterwa rishingiye ku gitsina mu “kwidagadura” bibangamiye umuco wabo, bamusaba gukora ibishoboka bigakumirwa.

U Buyapani bwo bwabibonye kare, mu 1999 nibwo bwaciye ikorwa n’isakazwa rya poronogarafi zigaragaramo abana.

Iyo bidakozwe, ngo bituma nk’umuhungu cyangwa umukobwa yishyiramo ko ibyo agomba gukora cyangwa gukorerwa, bigomba kuba bihuye na bimwe yabonye muri film, bikaba byakongeza mu bato virusi itazigera ikira.

Umwarimu muri Kaminuza y’u Rwanda mu by’Imitekerereze ya Muntu akaba n’Umuyobozi w’Ihuriro nyarwanda mu by’imitekerereze [Psychological Society], RPS, Prof Sezibera Vincent, yabwiye IGIHE ko iyo umuntu ahora areba ibintu agera aho akumva ariyo migenzereze ikwiye, ku buryo n’abaryamana bahuje ibitsina bashobora kubyandura.

Yakomeje agira ati “Iyo umuntu ahora areba poronogarafi, bishobora gutangira nawe avuga ngo reka tubigerageze turebe, bigatangira ari ukwimara amatsiko bikazagera aho biba ikibazo gikomeye.”

Yanatanze ingero ko uretse no kuba zangiza abakiri bato baba bataragera ku rwego rwo gutekereza byisumbuye ngo basesengure ibyo babona, usanga hari n’abakuru bashaka gukora imibonano mpuzabitsina bazifashisha.

Prof Sezibera yakomeje agira ati “Iyo bimenyereje za poronogarafi mu busabane bw’abashakanye, ukubonana k’umugabo n’umugore birahinduka ugasanga ni ukubanza kureba porono bakabona kubonana, ugasanga babaye imbata zayo, ntacyo bakwikorera batayifashishije.”

“Ni kimwe n’urubyiruko rwikinisha kubera zo, zangiza ubushobozi bwo gutekereza hamwe n’ibyiyumviro bya muntu, aho kuzishimira uko mugenzi wawe ari kugaragara, bikaba nk’aho muri uwo mwanya ufite abantu batatu kuko uba ufite undi waganishijeho ibitekerezo byawe.”

Iherezo rizaba irihe?

Mu nyandiko zitandukanye, abashaka gusobanura impamvu film z’urukozasoni zikwiye kwerekanwa basa n’ababihuza n’inyigisho zinyuranye zishobora kunyuzwamo zirebana n’ubuzima bw’abashakanye.

Gusa Prof Sezibera avuga ko nta shingiro bifite kuko uburyo zikinwamo ubwabyo bitagaragara igisobanuro cy’urukundo bijyanye n’ibyishimo biba bikwiye kuranga icyo gikorwa.

Avuga ko asanga u Rwanda rudakeneye poronogarafi, ariko ngo zidafunzwe, ikiruta ni uko hashyirwaho uburyo abazireba bagomba kuba barengeje imyaka 18 y’amavuko ifatwa nk’imyaka y’ubukure mu gihugu.

Yakomeje agira ati “Njye navuga nti kuri abo bakeneye porono, guverinoma yaca izo barebera ubuntu noneho izisaba ko wishyura ukoresheje ikarita yawe bakazireka kuko iyo utangira, icya mbere bagira ibyo bakubaza, icya kabiri utanga amafaranga yawe, icya gatatu nushyiramo nimero y’ikarita barabona niba ugejeje ku myaka 18 cyangwa utarayigeza bityo ntiwemererwe kuzireba. ”

Visi Perezida wa Komisiyo y’Inteko Ishinga Amategeko Ishinzwe Imibereho y’Abaturage, Depite Alphonsine Mukarugema, yigeze kubwira IGIHE ko poronogarafi ari ikibazo, gusa ngo kubihagarika bisa n’ibitoroshye.

Yagize ati “Ntabwo tuzahagarika iterambere, ntabwo tuzabuza abantu kujya kuri internet. Ibi kugira ngo ubihagarike keretse ufunze iriya mirongo yose kandi ntibishoboka. Ababyeyi bakwiye kugenzura ibyo abana babo bareba.”

Izi mpungenge zishimangirwa n’abahanga mu ikoranabuhanga, bagaragaza ko iyo habaye gufunga urubuga runaka hari abahimba indi nzira bacamo bakarusura.

U Rwanda rurategura amabwiriza mashya

Umuvugizi wa RURA, Anthony Kulamba, yabwiye IGIHE ko amabwiriza agenzura ibitangazwa mu majwi n’amashusho, harimo ingingo zihariye zibuza isakazwa ry’ibintu bihabanye n’umuco.

Ku birebana na internet ngo harimo gukorwa amabwiriza kugira ngo hakumirwe ayo mashusho y’urukozasoni abashe kurebwa n’abantu bose, ku buryo ibitangazwa bikwiye kuba birinda abana kujya mu myitwarire mibi.

Ati “Izo mpungenge natwe turazifite, niyo mpamvu hari amabwiriza agiye gusohoka kugira ngo tubone uko duhangana n’ibyo bibazo. Gusa hagomba kubaho ubufatanye na sosiyete, ababyeyi bakigisha abana ko n’ugiye kuri internet yirinda ibintu bimwangiza, akareba ibyubaka bishobora kumufasha.”

“Amategeko adufasha kurwanya ibyo bintu no kurinda abana guhura nabyo, gusa uruhare rw’ababyeyi, abarezi, mu kuyobora abana mu muco mwiza ni ngombwa cyane kuko ibibi biri kuri internet ni byinshi, harimo gushukwa, ibiyobyabwenge, icuruzwa ry’abantu n’ibindi byinshi.”

Yavuze ko ayo mabwiriza namara gusohoka hazabaho n’ubukangurambaga kugira ngo ababyeyi n’urubyiruko barusheho kumenya ibyiza n’ibibi bya internet bityo bagire amahitamo meza.

Imibare y’Urwego Ngenzuramikorere (RURA) yerekana ko muri Werurwe 2018, Abanyarwanda batunze telefoni bari 76.61 % bihwanye n’izigera kuri 9 047 087 zabarurwaga muri iki gihugu gituwe na miliyoni 12 z’abaturage, ndetse inyinshi zikoresha internet.

Amaso y’u Rwanda imbere ya Poronogarafi

Imibare IGIHE yahawe mu Ukuboza 2015 n’urubuga Pornhub rufite izindi zigera kuri 40 ziyishamikiyeho zerekana poronogarafi ku Isi yerekana ko u Rwanda ruza ku mwanya wa 29 muri Afurika mu kugira abantu benshi bareba film z’imibonano mpuzabitsina, aho bazireba cyane ku Cyumweru bakadohoka ku wa Gatanu.

Abagore bo mu Rwanda bihariye kureba izi film ku rugero rwa 27% mu gihe ubusanzwe ku Isi hose abagore imbere y’izi film bari ku kigero cya 24%.

Uko Abanyarwanda bareba izi film bigendanye n'ikigero cy'imyaka
Mu Rwanda abantu bakunda kureba Kim Kardashian cyane
Uko mu minsi y'ibiruhuko biba byifashe
Izi film zikunda kureberwa kuri mudasobwa
Uko Abanyarwanda bareba izi film bigendanye n'ikigero cy'imyaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza