00:00:00 IGIHE NETWORK KN KINYARWANDA EN ENGLISH FR FRANCAIS

RICTA imaze guhugura abahanga barenga 500 mu ikoranabuhanga

Yanditswe na Akayezu Jean de Dieu
Kuya 1 Ugushyingo 2021 saa 09:49
Yasuwe :
0 0

Ikigo gihagarariye abakoresha Ikoranabuhanga no guteza imbere Indangarubuga y’u Rwanda .RW, RICTA, gitangaza ko kugeza ubu kimaze guhugura abahanga mu by’ikoranabuhanga barenga 500, bo mu bigo bitandukanye birimo ibya Leta n’ibyigenga.

Ni ibyatangajwe ubwo hasozwaga amahugurwa yabaye hagati ya tariki 25-29 Ukwakira 2021, aho abayitabiriye bigishijwe uburyo bwo kugenzura ihuzanzira rya internet n’uburyo bwisumbuye bwo kuyihereza abantu benshi.

Aya mahugurwa y’iminsi itanu yatanzwe na RICTA [Rwanda Internet Community and Technology Alliance], ifatanyije na Kaminuza y’u Rwanda ndetse n’abandi bafatanyabikorwa barimo Umuryango w’Abadage wita ku Iterambere, GIZ.

Umuyobozi wa RICTA, Ingabire Grace Mukarago, yabwiye IGIHE ko mu gutegura aya mahugurwa asanzwe aba buri mwaka, haba hagenderewe gutanga ubumenyi ku benjeniyeri bo mu Rwanda by’umwihariko abakora mu ikoranabuhanga.

Ati “Ikoranabuhanga rihora rihinduka buri munsi, bisaba ko abantu bakomeza guhugurwa, ni yo mpamvu tuba tugamije gukomeza kuzamura ubumenyi bw’abahanga mu ikoranabuhanga mu Rwanda.”

Kuva ibikorwa byo guhugura abakozi mu bigo bitandukanye birimo ibya leta, abakora muri za banki, amashuri n’ibindi bigo bitandukanye. Kugeza uyu munsi abarenga 500 ni bo bamaze guhugurwa.

Ingabire ati “Ikintu tuzi ni uko akenshi dusigarana imyirondoro y’aba bantu, tukamenya no gukurikirana niba ubumenyi twabahaye babujyana kububyaza umusaruro mu bigo byabo.”

Yakomeje agira ati “Icyo bagenda batugaragariza ni uko bifuza ko aya mahugurwa atakomeza kuba rimwe mu mwaka ahubwo twajya tuyatanga kenshi. Bitugaragariza ko hari umusanzu dutanga ndetse n’aba bahanga iyo bageze mu bigo byabo bagerageza kuzana impinduka.”

Bamwe mu bitabiriye aya mahugurwa baganiriye na IGIHE, bagaragaje ko ubumenyi bungukiye muri aya mahugurwa biteguye kububyaza umusaruro haba mu kazi bakora umunsi ku munsi cyangwa no kuba bafasha abo mu bindi bigo.

Kankundiye Jessica ukorera Ikigo kiranguza internet ya 4G mu Rwanda, Korea Telecom Rwanda Networks (KTRN), yavuze ko yize byinshi bizamufasha kunoza ibyo akora mu kazi ke ka buri munsi.

Ati “Ushobora gusanga internet ihari, irakora wenda ukanaha abakiliya internet ariko hano twize uburyo ushobora gutanga internet mu buryo bunoze, ukamenya ngo abo nyiha ndabaha ingana gute, baramutse bagize ikibazo nabafasha gute n’ibindi.”

Yakomeje agira ati “Nkatwe muri KTRN duha internet abantu barenga 1000 ku munsi, urumva dukeneye kumenya uko tuyibashyirira mu ngo zabo cyangwa aho bakorera, tukayibaha mu buryo budashobora kubateza ibibazo.”

Aya mahugurwa azwi ku izina rya RWNOG [Rwanda Network Operators Group], kandi afasha abayitabiriye kugira ubumenyi buhambaye mu by’ikoranabuhanga bijyanye n’uburyo rigenda rihinduka umunsi ku munsi.

Abayobozi batandukanye bitabiriye umuhango wo gutanga impamyabushobozi ku barangije amahugurwa atangwa na RICTA
Hatanzwe impamyabushobozi ku barangije amahugurwa atangwa na RICTA
Abarenga 500 bamaze guhugurwa na RICTA
Umuyobozi wa RICTA, Ingabire Grace, yavuze ko abitabira amahugurwa atangwa n'iki kigo batanga umusaruro mu bigo byabo aho bakora
Kankundiye Jesca ukora muri KTRN yashimye amahugurwa atangwa na RICTA ku mikoreshereze y'ikoranabuhanga

Amafoto: Irakiza Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .