Mu Rwanda hatangijwe isomero rya mbere ryo kuri internet

Yanditswe na Uwishyaka Jean Louis
Kuya 14 Nzeri 2016 saa 09:45
Yasuwe :
0 0

Mu rwego rwo guteza imbere ubumenyi n’umuco wo gusoma mu Rwanda, ku bufatanye bwa Minisiteri y’Uburezi(MINEDUC) n’Ikigo gikora ibijyanye n’Ikoranabuhanga (Innovation Village),Isomero Rusange rya Kigali ryaguye umurongo ryakoreragamo ritangiza isomero ryo kuri internet( digital library).

Iri somero rifasha abantu kugera ku bitabo birenga 800 biri kuri internet n’ibyo wasoma mu buryo bw’amajwi (Audio Books) birimo ibyo mu mashuri, iby’ubushabitsi(business), ubukungu, ibirimo inkuru ndende, iby’ubumenyi, ibyagufasha mu buryo butandukanye ndetse n’ibindi.

Bimwe muri ibyo bitabo byashyizwe kuri internet n’iri somero tariki ya 13 Nzeri 2016 mu rwego rw’igerageza ry’amezi atatu, abanyamuryango baryo bashobora kubisanga ku rubuga www.kplonline.org, mu gihe abatari abanyamuryango bashobora gushakisha urutonde rw’ibitabo biri muri iri somero( Library catalog) no kwiyandikisha kuri interineti kugira ngo babashe kubona uburyo bwose bwo kubigeraho.

Abakozi b’Isomero Rusange rya Kigali bazajya bayobora abantu ari na ko batanga ubufasha mu bya tekiniki ku banyamuryango n’abarisura, ndetse banafashe mu gukura kuri internet(Download) porogaramu ya telefoni ifasha mu gusoma ibitabo(Soma’s mobile application).

Vital Kalinganire,Umuyobozi mu bya tekiniki mu kigo Innovation Village, yagize ati “ Abanyamuryango bashobora gutira ibitabo bitatu mu gihe kimwe bakabimarana iminsi 14, kandi iri somero ryo kuri interineti rizanye uburyo butuma abarikoresha bagaragaza uko hashyirwaho ubundi buryo bushya byakorwamo, gutanga ibitekerezo byafasha mu iterambere ry’ahazaza h’uru rubuga,uko ibitabo byakusanyirizwa hamwe,ndetse tuzajya tugenzura intambwe igenda iterwa mu mezi atatu.”

Yavuze ko isomero ryo kuri internet, riri mu rwego rwo gutuma ibitabo n’ibindi bikoresho byifashishwa mu myigire bigerwaho hakoreshejwe ikoranabuhanga ngendanwa, kandi ko iri somero rigamije gukomeza guteza imbere umuco wo gusomera kuri internet nk’uburyo bunafasha mu kwiga abantu baganira, mu rwego rwo gufasha ibigo by’amashuri n’abanyeshuri binyuze mu bufatanye na za kaminuza na za koleji mu gihugu, kimwe no guhuza abaturage mu buryo butandukanye n’ubwari bumenyerewe.

Isomero rusange rya Kigali ryasinyanye amasezerano y’ubufatanye na Kaminuza ya Kigali, bituma ribona abanyeshuri 2000 bayo nk’abanyamuryango b’iri somero, ndetse ribona uburenganzira bwo kugera ku nyandiko zo kuri internet z’iyi kaminuza mu gihe cy’igerageza.

Isomero Rusange rya Kigali rirateganya kwagura ubufatanye nk’ubw’ibindi bigo bitandukanye byo mu Rwanda nyuma y’igerageza ry’amezi atatu ryihaye.

Kugeza ubu iri somero rivuga ko ryakusanyije ibitabo birenga 19,000 bitari kuri internet n’ibindi 800 biyiriho. Biteganyijwe ko hazajya hongerwaho ibigera ku 1000 buri mwaka kugira ngo ribashe guhaza abasomyi baryo banyuranye.

Abantu Isomero ry'Igihugu bashyiriweho ubundi buryo bwo kubona ibitabo basoma kuri internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza