Minisitiri Nsengimana yihanangirije ibigo bicuruza internet igenda gahoro bikanayihenda

Yanditswe na Herve Ugirumukunda
Kuya 16 Ugushyingo 2017 saa 06:33
Yasuwe :
0 0

Minisitiri w’Ikoranabuhanga, Nsengimana Philbert yavuze ko Leta ishaka ko Umunyarwanda aho ava akagera abona internet ihendutse nk’uko abona amazi yo kunywa, akebura ibigo biyicuruza ihenze kandi ikagenda nk’akanyamasyo.

Yabivugiye mu nama ya Rwanda Internet Governance Forum 2017 yahuje inzego zifite aho zihuriye no gucuruza no guteza imbere umuyoboro mugari wa internet kuri uyu wa 16 Ugushyingo 2017.

Nsengimana yavuze ko kuri ubu u Rwanda ruri ku muvuduko ushimishije wa internet, kuko rukoresha 4G LTE ari nayo igezweho ku isi muri iki gihe. Runitegura kuzana 5G izaba ari agahebuzo kurushaho.

Yanenze cyane ibigo bicyamamaza kandi bigacuruza internet igenda gahoro cyane, iri munsi y’igipimo cya Megabytes ebyiri ku isegonda 2Mbps.

Ati “Mwa bantu mwe mutanga internet mucyamamaza serivisi ziri munsi y’igipimo cy’umurongo mugari nshaka kubabangamira. Ndashaka kuburira umuntu wese ugicuruza internet iri munsi ya 2 Mbps mwibutsa ko adusubiza inyuma mu ntego dushaka kugeraho.”

RURA igaragaza ko ibigo nka Liquid Telecom bicuruza internet ikoresha umugozi igenda gahoro cyane kandi igahenda kuko ifite umuvuduko wa kilobytes ku isegonda (kbps) 64 zingana na mbps (0.064) ku mafaranga y’u Rwanda 50 150 ku kwezi.

Ibigo bimwe by’itumanaho nabyo bishyirwa mu majwi ku gucuruza amapaki amwe afite internet igenda gahoro cyane ku buryo no gusura urubuga cyangwa kumanura ifoto bitapfa gushoboka.

Henshi mu Rwanda hageze internet ariko kuyikoresha biracyari ikibazo
Minisitiri Nsengimana yagarutse kuri gahunda Leta yatangiye yo kugeza umuyoboro mugari wa internet kuri buri kagari, buri kigo cy’ishuri, buri sitasiyo ya polisi cyangwa ibiro by’umurenge.

Yasobanuye ko icyo gikorwa kitazagorana kuko ubu umuyoboro mugari wa internet wageze mu bice bitandukanye by’igihugu uretse ko udukoresho dutuma abaturage batangira kuyikoresha tutaragera hose.

Ati “Mperutse kujya iwacu mu cyaro, ndeba umuvuduko wa internet 4G ndi gukoresha nsanga uri hejuru na mbps 90 hose internet ariko abaturage ntibabizi icyo bakeneye ni ibikoresho bituma bayibona muri telefoni cyangwa mudasobwa n’amafaranga.”

Yashimye akarere ka Rwamagana kashyize mu mihigo kugeza internet kuri buri kagari ndetse nawe ubwe akaba yariyemeje kuyigeza mu tugari dutatu muri ako karere.

Ikigo ngenzuramikorere RURA kivuga ko internet yagiye itera imbere ku muvuduko utangaje kuko mu myaka 20 ishize, u Rwanda rwari rugikoresha satellites zatwaraga akayabo.

New Artel ni cyo kigo cy’ikoranabuhanga cyacuruje internet bwa mbere mu Rwanda mu 2004, MTN na ISPA bikurikiraho muri 2006, Tigo iza muri 2008. Uko umuvuduko wa internet wagiye uzamuka, hajeho ibindi bigo nka 4G Networks, BSC, AIrtel Rwanda, Axiom, KTRN n’ibindi.

Abayobozi n'abakora ubucuruzi bujyanye na internet basabwe gutanga internet igezweho kandi ihendutse
Abitabiriye inama ya 'Rwanda Internet Governance Forum 2017' yahuje inzego zifite aho zihuriye no gucuruza no guteza imbere umuyoboro mugari wa internet
MInisitiri w'Ikoranabuhanga, Nsengimana Philbert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza