Amerika yeguriye ICANN ibijyanye na Internet byose

Yanditswe na Uwishyaka Jean Louis
Kuya 5 Ukwakira 2016 saa 12:24
Yasuwe : XX
0

Nyuma y’igihe kitari gito bishyirwa muri gahunda ariko ntibikorwe, ishami rishinzwe ubucuruzi muri Leta Zunze Ubumwe za Amerika, ryashyize rifata umwanzuro wo kwegurira ibijyanye na Internet byose, Ikigo kidaharanira inyungu,ICANN, cyari gisanzwe kigenzura igice kinini cy’ibya Internet.

ICANN (Internet Corporation for Assigned Names and Numbers) yari isanzwe igenzura ibijyanye n’amakuru ajyanye n’imibare n’amazina birebana na Internet.

Mu byo ICANN yeguriwe na Leta ya Amerika ku wa Gatandatu w’icyumweru gishize, harimo n’imashini nini ikoreshwa mu guhindura amazina y’imbuga za internet mu mibare ibasha kumvwa na mudasobwa (Domain Name Server, DNS).

Inkuru ya Cnet ivuga ko nubwo ibi byagezweho, bamwe mu bayobozi bakomeye barimo Senateri Ted Cruz bari barabirwanyije bagaragaza ko bishobora gutuma ibihugu by’abo bise abanyagitugu byigarurira ikoranabuhanga ry’iki gihugu ndetse bikanagenzura ibyo bakora byose.

Cruz yasabye abantu gutekereza uko byaba bimeze mu gihe Internet yaba iyobowe n’ibihugu nk’u Bushinwa cyangwa u Burusiya bidatinya gufunga abanenga politiki yabyo.

Ubuyobozi bwa ICANN ariko bwo bwavuze ko izi mpungenge nta shingiro zifite kuko ahubwo bizatuma Internet irushaho kugira ubwisanzure.

Umuyobozi w’Inama y’ubutegetsi ya ICANN, Stephen D. Crocker yavuze ko bari bamaze imyaka 18 biga kuri uyu mushinga wo kwegurirwa ibijyanye na Internet byose, ashima abantu bo hirya no hino ku isi babigizemo uruhare kugira ngo bigerweho.

Yakomeje avuga ko ari ingenzi cyane kuko kuba imiyoborere igiye kubarizwamo inzego zitandukanye zirimo iz’abacuruzi, abahanga mu bya tekiniki, sosiyete sivile, abakora ubushabitsi n’izindi bizatuma Internet ikomeza kwigenga no kugera kuri bose nk’uko bimeze uyu munsi.

Ihuriro ry’ibigo by’ikoranabuhanga bitandukanye birimo Facebook, Google, Microsoft na Verizon, ryagaragaje ko rinyuzwe n’iki cyemezo ariko rigaragaza ko akazi kakiri kenshi kugira ngo ICANN ikore neza kandi mu mucyo.

Iri huriro ryavuze ko rigiye gufatanya n’abandi bafatanyabikorwa kugira ngo bazafashe iki kigo kugera ku ntego kiyemeje.

ICANN yashinzwe ku itariki ya 18 Nzeri 1998, mu nshingano zayo hakaba harimo kwemeza amazina aherekeza imbuga za internet (domain name) urugero nka .rw, .com n’andi.

Ibya Internet byose muri Amerika byeguriwe ikigo kidaharanira inyungu ICANN

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza