Udushya tw’urubyiruko mu ikoranabuhanga tugaragaza ko u Rwanda rubasha kwishakamo ibisubizo

Yanditswe na Tombola Felicie
Kuya 3 Gicurasi 2017 saa 07:52
Yasuwe :
0 0

Guhanga udushya ni gahunda ya Leta y’u Rwanda igamije gufasha abanyarwanda ubwabo kwishakamo ibisubizo ku bibazo biriho muri sosiyete hadategerejwe ak’imuhana kaza imvura ihise.

Ibyo bituma Leta ishishikariza abanyeshuri gucukumbura no gushakisha gahunda zakwifashishwa mu guteza imbere igihugu kuko n’ab’ahandi ariko bakize.

Hirya no hino mu mashuri usanga gahunda yo guhanga udushya igenda igerwaho cyane mu mashuri y’imyuga n’ubumenyingiro.

Ibyo bigaragaza ko udushya duhangwa nidushyirwa mu bikorwa igihugu kizajya kibasha gukemurwa ibibazo byinshi byugarije abaturage byari gutwara amafaranga menshi.

Iyi nkuru iragaragaza udushya twakorewe hirya no hino mu mashuri umuntu yakwita ko ari ibisubizo bigenda biboneka bishatswe n’abanyarwanda ubwabo.

IPRC Kigali: Icyuma gicuruza amata n’igare ry’abafite ubumuga rya Android

Abanyeshuri biga muri IPRC Kigali bakoze icyuma gicuruza amata n’igare rifasha abafite ubumuga rikoreshwa na Android, bikaba barabimuritse mu imurikagurisha rya Made in Rwanda Expo.

Mugiraneza Olivier wakoze imashini icuruza amata yise ‘Kozaho Ushire Inyota’ yavuze ko ikoze mu buryo umuntu wese ashobora kujya kugura amata igihe icyo ari cyo cyose akishyura akoresheje ikarita cyangwa se agashyiramo ibiceri, ubundi agahabwa amata ahanywe n’amafaranga yishyuye.

Ati “ Hari igihe umuntu akenera amata abayacuruza batashye cyangwa se ugasanga amafaranga ufite ntahwanye n’ibiciro byashyizweho. Kuri iki cyuma ariko isaha iyo ariyo yose n’amafaranga waba ufite yose ushobora kubona amata yo kunywa.”

Irindi koranabuhanga ryakorewe muri IPRC Kigali ni igare ry’abafite ubumuga rigenda ndetse rikabasha guhindura ibyerekezo hakoreshejwe Android.

Uwarikoze yemeje ko rizatuma hadakenerwa umuntu wo kugenda arisunika kuko urigendaho ni we uryerekeza aho ashatse,akarihagarika cyangwa se akariyobora.

Singhgad: Hakozwe ibyapa by’ikoranabuhanga bitamara umuriro

Abanyeshuri biga muri Kaminuza ya Sinhgad yigisha ikoranabuhanga, batangije uburyo bwo gukora ibyapa by’ikoranabuhanga ku buryo butamara umuriro kandi bugezweho.

Simbi Arsène, umunyeshuri wiga mu mwaka wa kane mu bijyanye n’amashanyarazi (Electrical Engeering) mu ishuri rikuru rya ‘Sinhgad Technical Education Society’ yagize ati “ Led sign board’ ni ibyapa by’ikoranabuhanga twatangiye gukora bikoresha udutara dutoya kandi bitamara amashanyarazi kuko bikoresha umuriro muke cyane.”

Simbi avuga ko bajya gutekereza gukora ibyo byapa babanje bagasuzuma bagasanga nta hantu bikorerwa mu Rwanda, ababifite babitumiza hanze ndetse bakabona ko ari ibintu bikenewe dore ko ibyapa bisanzwe kugira ngo byake nijoro bikenera kuba bizengurutswe n’amatara menshi kandi atwara umuriro.

Ati “Twabanje kureba ibyiza by’ibyapa bigezweho Leta yifuza, dusanga uretse isuku bitanakoresha umuriro mwinshi.”

Tumba College: Umunyeshuri yakoze pogaramu yo gukebura abaganga

Mu muhango ngarukamwaka wo kugaragaza udushya twagezweho mu Ishuri rikuru ry’Ikoranabuhanga rya Tumba wabaye umwaka ushize, umunyeshuri Uwambajimana Ange w’imyaka 22 yamuritse porogaramu izafasha abaganga kwita ku barwayi cyane cyane abafite serumu.

Ati “Gukora ubu buryo bw’intabaza cyangwa se bwibutsa muganga ko umurwayi uyu n’uyu serumu igiye kumushiramo nabutekereje ndwaje musaza wanjye muri CHUK hamwe bavurira indembe. Nabonye ingaruka byamugizeho ubwo serumu yamushiragamo muganga adahari .”

Porogaramu uyu mukobwa yakoze, ifite intabaza ishyirwa kuri serumu y’umurwayi yaba yenda gushiramo hari ubutumwa bugufi ihita yoherereza muganga kuri nimero ye ya telefoni imubwira nimero y’igitanda umurwayi ukeneye ubufasha aherereyeho.

Umuyobozi wa Tumba College Eng. Gatabazi Pascal yatangaje ko nk’ishuri ry’ikoranabuhanga abanyeshuri n’abarimu bakora ubushakashatsi bwo guhindura ubuzima bw’abaturage kandi na bo bukababyarira inyungu.

IPRC East: Porogaramu yo muri telefoni ifasha mu guteka

IPRC East yo yakoze agashya ka porogaramu ifasha umuntu guteka yibereye mu kazi cyangwa ku rugendo.

Rukundo Jean Claude, umwe mu bakoze iryo koranabuhanga, yatangaje ko umuntu yifashishije internet, azajya atangira guteka akiri ku kazi, ku buryo agera mu rugo ibiryo byahiye ahita arya akikorera ibindi.

Yagize ati “Twakoze uburyo bwo guhuza mudasobwa ikoresha internet n’amashyiga akoresha amashanyarazi ku buryo ayo mashyiga umuntu ashobora kuyatsa cyangwa akayazimya yifashiishije mudasobwa cyangwa se telefoni ye igendanwa igihe irimo internet.”

Hari udushya twinshi tugenda duhangwa imbere mu gihugu haba mu bigo by’amashuri no mu nganda bikaba bigaragaza ko biramutse bikoreshejwe neza byahindura ubuzima bw’abaturage.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza