Ibitaro bya Faisal byatangiye gukoresha ikoranabuhanga mu gusuzuma abarwayi

Yanditswe na Mukaneza M.Ange
Kuya 19 Mutarama 2018 saa 08:56
Yasuwe :
1 0

Mu rwego rwo kurushaho kwihutisha serivisi, Ibitaro byitiriwe Umwami Faisal byatangiye gukoresha ikoranabuhanga rifite ubushobozi bwo gufata ibyemezo nk’iby’umuntu (artificial intelligence) mu ishami ryabyo ritangirwamo ubutabazi bwihuse.

Iri koranabuhanga rikoreshwa na internet ryiswe Medikta, ryifashishwa mu buvuzi mu rwego rwo gutanga umusanzu mu gufasha umuganga gufata ibyemezo igihe ari gusuzuma umurwayi, igikorwa kigabanya umwanya byatwaraga ndetse kikananoza serivisi yahabwaga.

Iyo umurwayi aje kwisuzumisha, umuforomo akoresha Medikta mu kumubaza ibibazo bijyanye n’uburwayi bwe. Iyo birangiye iri koranabuhanga rihita rigaragaza bumwe mu burwayi ashobora kuba afite bitewe n’uko yasubije ndetse rikanagaragaza niba akeneye kwitabwaho mu buryo bwihuse.

Aya makuru ahita abonwa n’abaganga ku buryo umurwayi ajya kugera imbere y’umuganga ugomba kumukurikirana, undi yamaze kumenya byinshi byerekeranye n’uburwayi bwe.

Iri koranabuhanga rifata iminota icumi mu kugenzura ikibazo umurwayi afite, ikaba ishobora kugabanuka cyangwa kwiyongera bitewe n’umuvuduko yakoresheje mu gusubiza ibibazo yabajijwe.

Aganira na The Newtimes, Jordi Jane, Umunya-Espagne waje guhugura abanyarwanda ku ikoreshwa rya Medikta, yavuze ko iri koranabuhanga rizafasha urwego rw’ubuvuzi mu Rwanda kurushaho kunoza uburyo bwo gusuzuma umurwayi ndetse bigakorwa mu gihe gito gishoboka.

Yakomeje avuga ko iri koranabuhanga ryamaze gukorerwa igerageza mu mavuriro yo mu mujyi wa Barcelona, Madrid na San Carlos muri Espagne.

Medikta itangira gukoreshwa mu bitaro byitiriwe Umwami Faysal kuri uyu wa 19 Mutarama 2018, ivugwaho gutanga amakuru y’ukuri arebana n’umurwayi ku kigero cya 91%.

Jordi Jane, Umunya-Espagne waje guhugura abanyarwanda ku ikoreshwa rya Medikta, yavuze ko iri koranabuhanga rizafasha urwego rw’ubuvuzi mu Rwanda kurushaho kunoza uburyo bwo gusuzuma umurwayi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza