Kwamamaza

Habonetse igikoresho cyafasha polisi kurwanya umuvuduko ukabije mu muhanda

Yanditswe kuya 2-09-2016 saa 14:44' na IGIHE


Rimwe na rimwe impanuka zo mu mihanda ziterwa n’umuvuduko ukabije w’abashoferi nubwo hari n’amategeko abihana;kuri ubu havumbuwe ikoranabuhanga rishobora kunganira polisi mu gukemura ikibazo kugira ngo ubuzima bw’abantu bukomeze kubungabungwa.

Ishuri Rikuru ryigisha Imyuga n’Ubumenyingiro mu Ntara y’Iburasirazuba ryagaragaje udushya turimo n’icyakemura iki kibazo n’impanuka zikaba zagabanuka.

Ni mu imurikagurisha ryateguwe n’Intara y’Uburasirazuba aho abanyeshuri bagaragaje uburyo bushobora gufasha polisi kubona amakuru y’abadakurikiza umuvuduko wagenwe bityo bakabihanirwa n’ubuzima bw’abantu bukarengerwa.

Uko ubwo buryo bukora,hari akuma gashyirwa mu modoka gatanga amakuru mu buryo bw’ubutumwa bugufi (automatique sms),aho umushoferi urengeje umuvuduko wagenwe ako kuma gahita kohereza ubutumwa bugufi burimo nimero iranga imodoka, itariki ndetse n’isaha n’aho byabereye.

Ibyo byafasha kwirinda impanuka kuko abashoferi bazajya bitwararika kurenza umuvuduko mu gihe bazaba bazi ko amakuru ahita atangwa binyuze mu ikoranabuhanga, bitarindiriye gutegereza abapolisi bashinzwe umutekano wo mu muhanda.

Akandi gashya kamuritswe n’iri shuri ni uburyo bwo gukora amakaro hifashishijwe amabuye yo mu bwoko bwa marble ndetse n’ibikoresho biboneka mu Rwanda.

Ayo makaro ashobora gukoreshwa incuro irenze imwe kuko ushobora gusenya inzu ukazongera ukayakoresha akiri mazima.Ibi byerekana ko gahunda yo guteza imbere ibikorerwa mu gihugu ishoboka kuko abanyarwanda na bo bashoboye gukora ibikomeye kandi biramba.

Umuyobozi wa IPRC East,Ephrem Musonera avuga ku bijyanye n’udushya twamuritswe yagize ati ’’ Ni inshingano zacu guhanga udushya mu buryo buhoraho, hari ibikorwa byinshi dusanzwe dukora kandi hari n’ibindi tuzakora kugira ngo abanyeshuri biga hano bakomeze guhanga udushya tujyanye no gukemura ibibazo by’aho iri shuri riri ndetse n’iby’abanyarwanda muri rusange.’’

Abanyeshuri bamuritse ibyo bikorwa bavuga ko nta bwoba bafitiye isoko ry’umurimo kuko baba bizera ko ibitekerezo byabo byavamo imishinga ibyara inyungu.

Ishimwe Eric urangije umwaka wa gatatu w’ubwubatsi muri kaminuza, akaba ari na we wazanye umushinga wo gukora amakaro yagize ati ’’Mu byo twiga harimo no kwihangira imirimo, ubu nta bwoba mfite kuko uyu mushinga wo gukora amakaro wambyarira inyungu. Ndateganya gukorana n’ikigega BDF gitera inkunga imishinga ibyara inyungu, maze uyu mushinga ukazanzanira amafaranga aho kwirirwa nshakisha akazi.’’

Umuyobozi wa IPRC East yijeje ko ku bufatanye n’akarere ka Ngoma hazashyirwaho ikigo kizajya gifasha abanyeshuri bafite ibitekerezo n’imishinga ibyara inyungu kubishyira mu bikorwa bityo bakaba ba rwiyemezamirimo.

Mu imurikagurisha ry’Intara y’i Burasirazuba ryabaye kuva tariki ya 18-kugeza tariki ya 29 mu karere ka Rwamagana rikaba ryarasoje IPRC–East yegukanye umwanya wa kabiri mu bamuritse neza.

Umunyeshuri asobanura uko iki gikoresho cyohereza ubutumwa bugufi mu gihe umuvuduko warenze uwagenwe
Aya makaro akorerwa mu Rwanda yerekana ko gahunda ya 'Made in Rwanda' ishoboka
Ubukanishi bw'imodoka ni kimwe mu byigwa muri IPRC East

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved