Kwamamaza

Ibyo wamenya kuri Scanner, icyuma gikoreshwa mu gucunga umutekano

Yanditswe kuya 29-08-2016 saa 11:13' na Mukaneza M.Ange


Ibibuga by’indege, hotel, ibigo by’amashuri, amaguriro, amasoko n’ahategerwa imodoka ni hamwe mu hakunze kwibasirwa n’ibitero by’iterabwoba n’ibindi bikorwa by’ubugizi bwa nabi, ahanini kubera ko haba hahuriye abantu benshi kandi b’ingeri zitandukanye.

Mu bitero byagiye bihitana abantu benshi twavuga nk’icyo muri Kaminuza ya Garissa muri Kenya cyaguyemo abagera ku 148 n’aho abandi 75 bagakomereka n’igiherutse kugabwa ku kibuga cy’indege cya Ataturk muri Turikiya cyahitanye 41 abandi benshi na bo bagakomereka.

Uku kwiyongera kw’iterabwoba nibyo bituma uko bwije n’uko bukeye hashakishwa ikoranabuhanga mu gusaka abantu hirindwa ko hagira uwinjirana intwaro atabifitiye uburenganzira.

Mu buryo bukunze kwifashishwa mu gusaka harimo imbwa zinukiriza ibikapu ngo zumve niba nta biturika cyangwa imbunda zirimo, utumashini twumva niba umuntu nta cyuma yitwaje (metal detector) hari kandi n’abakoresha intoki.

Ku bibuga by’indege cyangwa ahandi hantu hakomeye ariko usanga bakunze gukoresha imashini zifite ubushobozi bwo kwerekana ishusho igaragaza igice cy’umuntu cy’imbere y’imyenda ku buryo habaye hari ikintu yahishe kitemewe nk’intwaro cyangwa ikindi cyuma bihita byigaragaza. Iyi mashini bayita (Full body scanner).

Scanner kandi ishobora no gukoreshwa bashaka kureba ibintu biri imbere mu muzigo cyangwa igikapu bitabaye ngombwa ko gifungurwa.

Scanner ntizigaragaza ubwambure bw’umuntu ahubwo abazikoresha baba bagamije kureba niba nta ntwaro yitwaje cyangwa ikindi gikoresho gishobora guhungabanya umutekano rusange w’abantu. Uyikoresha abona uri gusakwa nk’igishushanyo gusa.

Ese Scanner zikora gute?

Scanner zikoreshwa mu gusaka abantu ziri mu bwoko bubiri aribwo Millimeter-wave na X-ray, nubwo zose zikora akazi kamwe, zitandukanira ku ikoranabuhanga zikoresha mu kwerekana ishusho.

Kugira ngo umuntu abashe kumva neza imikorere ya scanner ni uko abanza kumenya neza X-ray isobanurwa nk’ubwoko bw’urumuri umuntu atabasha kubonesha amaso rwisubiramo inshuro nke ariko rwifitemo ingufu nyinshi ari na zo zituma rubasha guhinguranya ikintu no kwerekana imiterere yacyo y’imbere.

Uru rumuri ni narwo rukoreshwa muri X ray scanner hagaragazwa ishusho y’umubiri w’umuntu ariko atambaye imyenda.

Backscatter na Transmission nizo scanner zikoresha X rays, itandukaniro hagati yazo akaba ari uko imwe yohereza uru rumuri ku kigero cyo hasi ku buryo rutabasha kurenga uruhu rw’umuntu ngo rwinjire imbere.

Ni mu gihe kuri Transmission scanner ho X ray zibasha kwinjira zikarenga uruhu ku buryo zishobora kwerekana ikintu umuntu yamize cyangwa yabitse imbere mu mubiri.

Millimeter-wave scanner zo ntizikoresha X-ray ahubwo zikoresha ingufu karemano (natural radiation) zituruka ku mubiri w’umuntu zikabasha kugaragaza niba nta ntwaro afite.

Ese guca muri scanner bigira izihe ngaruka ku buzima?

Abahanga mu bumenyi bavuga ko iyo umuntu agize aho ahurira na X-Ray hari ingufu umubiri we wakira, zipimwa hakoreshejwe icyo bita ’Sievert (Sv)’, igipimo gikoreshwa mu kureba ingaruka urumuri rushobora kugira ku mubiri w’umuntu.

Bitewe n’ingaruka izi ngufu zigira ku buzima zirimo gutera indwara zigendanye n’amaraso,cancer y’uruhu ndetse n’ubuhumyi umuntu ntakwiye kurenza mSv imwe (1mSv).

Nkuko twabisobanuye hejuru, Backscatter scanner zikoresha X rays ziri ku rugero rwo hasi ku buryo kuzicamo nta ngaruka bigira ku mubiri w’umuntu kuko nk’uko bigaragazwa n’urubuga GreenFacts umuntu uyicamo byibura inshuro eshatu ku munsi mu gihe cy’umwaka azinjirwamo n’izi ngufu zingana na 0.3 mSv gusa.

Transmission Scanner zo ariko zishobora kugira ingaruka kuko umuntu uyicamo byibura inshuro eshatu ku munsi ingufu zituruka kuri X rays zizamwinjiramo zenda kugera kuri 3mSv.

Biragoye kwemeza ko uburwayi runaka bwaturutse kuri scanner zikoreshwa mu gucunga umutekano kuko ingaruka zazo zigaragara ku muntu wazinyuzemo kenshi kandi nyuma y’igihe kirekire.

Nta ngaruka kandi guca muri scanner bigira ku mugore utwite cyangwa umwana uri munda kuko ingufu zikoresha ziba ziri hasi ugereranyije n’izishobora kumwangiza.

Urubuga Babycenter rugaragaza ko ingufu zituruka kuri X-ray zigira ingaruka ku mwana zingana na Millisievert 500 kandi nta bwoko na bumwe bwa scanner bushobora kuzigezaho ku mwaka.

Scanner zifite ubushobozi bwo kureba niba umuntu yitwaje intwaro cyangwa ikindi gikoresho gishobora guhungabanya umutekano

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved