Abanyamakuru bandika batsinze abakoresha amajwi mu kwizihiza umunsi w’ubwisanzure bw’itangazamakuru

Yanditswe na Manzi Rema Jules
Kuya 3 Gicurasi 2017 saa 08:19
Yasuwe :
0 0

Umukino wahuje abanyamakuru bandika inkuru z’imikino batsinze bagenzi babo bakora mu binyamakuru bikoresha amajwi n’amashusho ibitego bitatu kuri kimwe mu mukino wabaye kuri uyu wa Gatatu.

Uyu mukino wabereye ku kibuga cya Ferwafa mu rwego rwo kwizihiza umunsi mpuzamahanga w’ubwisanzure bw’itangazamakuru uba tariki 3 Gicurasi buri mwaka.

Ibitego bya Imanishimwe Sammy wandikira Kigali Today, Nshimiyimana Richard wa Kigalihits na Peter Kamasa wa The NewTimes nibyo byahesheje ikipe y’abanyamakuru bandika, intsinzi y’ibitego 3-1 icy’abanyamakuru bavuga kikaba cyatsinzwe na Jado Max wa Radio 10.

Ni umukino wagaragayemo ishyaka ku mpande zombi, gusa ikipe y’abanyamakuru bakoresha amajwi n’amashusho ikaba yayoboye umukino cyane binyuze ku nkingi zayo nka Jah d’eau Dukuze, Mihigo Saddam na Imanishimwe Sammy washakaga ibitego.

Uyu mukino wateguwe n’urwego rw’Abanyamakuru bigenzura (RMC) ku bufatanye n’urwego cy’igihugu gishinzwe imiyoborere (RGB) wari mu rwego rw’ubusabane n’umwanya wo kuganira ku ntambwe itangazamakuru rimaze gutera mu Rwanda nk’uko IGIHE yabitangarijwe na Mbanda Gerald ushinzwe itangazamakuri muri RGB.

Yagize ati "Ni umukino wateguwe rwego rwo kugaragaza ko bishimye kandi bafitanye ubufatanye haba mu bavuga ndetse n’abandika. Gusa gukina ni kimwe ariko ikiruta byose ni ibiganiro bagirana bareba uko bahagaze ndetse bakungurana ibiteterezo ku buryo bakoresha itangazamakuru mu kugira uruhare mu guteza imbere igihugu."

"Turizihiza uyu munsi twishimira ko hari amategeko yavuguruwe ariko n’ubwiyongere bushimishije bw’ibitangazamakuru. Ibyo byose ni ibintu bitari bihari mu myaka yashize kandi ni intambwe abantu bakwiriye kwishimira."

Yakomeje avuga ko nubwo itangazamakuru ari urwego rurimo gutera imbere hakiri ibibazo by’iterambere mu ikoranabuhanga no gutanga amakuru uko bikwiye bikaba bituma n’inyungu irivamo ikiri ntoya.

Uyu muyobozi avuga ko igisubizo ku bibazo bikigaragara mu itangazamakuru ari uko abashoramo imari bagana itangazamakuru rikorera kuri internet kuko ari ryo kuri ubu riri imbere ku Isi abandi na bo bagahindura imikorere batanga amakuru yizewe kandi akabonekera ku gihe.

Bony Mugabe(No 10) wandikira Ferwafa yari agiye gutsinda mu izamu rya Habyarimana Frodouard
Nshimiyimana Richard(ufite umupira) wandikira KigaliHits, ni we watsinze igitego cya kabiri
Mazimpaka Jean Pierre wa IGIHE yitegura kujya mu kibuga
Junior wa Kigali Today acenga Augustin Bigirimana wa Isango Star
Jah d'Eau Dukuze wa Ruhago Yacu yari yazonze ikipe y'abanyamakuru bakoresha amajwi n'amashusho
Peter Kamasa wa The New Times amaze gutsinda igitego cya gatatu
Mbanda Gerald ushinzwe itangazamakuru muri RGB, aganira na Butoyi ukorera RBA

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza