00:00:00 IGIHE NETWORK KN KINYARWANDA EN ENGLISH FR FRANCAIS

Uburyo bworoshye bwagufasha kumenya ko waciwe amande na Polisi mu muhanda

Yanditswe na Muhonzire Sylvine
Kuya 3 Kamena 2021 saa 11:12
Yasuwe :
0 0

Hari abantu benshi bafite ibinyabiziga cyangwa bakora akazi ko gutwara abantu cyangwa ibintu, utabaza ngo ikinyabiziga cyawe gifite ideni ry’angahe ngo abimenye. Hari n’igihe benshi bisanga bafungiwe ibinyabiziga byabo kubera ko bafite umwenda mwinshi nabo ubwabo batazi.

Hari umuntu ufite ikinyabiziga RA.. 305 H, ashobora kuba atazi ko afite umwenda w’ibihumbi 300 Frw, yandikiwe na camera ku wa 1 Kamena. Ni cyo kimwe na RAE400… wandikiwe ibihumbi 25 Frw ku wa 2 Kamena ku bwo kutubahiriza ibyapa.

Ubwo twandikaga iyi nkuru, twagiye ku rubuga rwa Irembo, tukajya dutomboza Pulake tutazi ba nyirazo. Ugerageje nk’icumi, usangamo nibura eshatu zifite umwenda zitarishyura.

Ibyo biterwa n’impamvu nyinshi. Imwe muri zo ni uko umuntu ashobora kuba ari mu muhanda, wenda camera ikamwandikira kubera amakosa runaka, hanyuma ntahite abona ubwo butumwa kuri telefoni ye. Ibyo bishobora gutuma amande aba menshi ariko we ntabimenye.

Ubusanzwe ibihano bihabwa uwakoze amakosa yo mu muhanda bishyirwaho mu rwego rwo kwirinda impanuka zihitana ubuzima bwa benshi ndetse zikanangiza.

Mbere iyo Polisi yaguhagarikaga mu muhanda wakoze amakosa yakwandikiraga agapapuro, ukakajyana muri banki, bakagufasha kwishyura.

Kuva aho ikoranabuhanga riziye, ubu umuntu akora akosa mu muhanda, akakira ubutumwa bw’amande aciwe kuri telefoni ye bitewe n’ikosa yakoze, buriho uburyo ashobora kwishyura, ku buryo ibyo kujya kuri banki bitakibaho.

Kubera ko ubutumwa bw’amande bwoherezwa kuri telefone, hari benshi baba batazi umubare w’amafaranga barimo bitewe n’uko hari igihe ikinyabiziga kiba kitabanditseho cyangwa rimwe na rimwe yaba yafashwe na camera yo mu muhanda ubutumwa ntibuze.

Kubera izo mbogamizi zose, Polisi y’u Rwanda yashyizeho uburyo umuntu ufite telefoni ngendanwa igezweho ‘smartphone’ cyangwa mudasobwa ashobora kwirebera umubare w’amafaranga ikinyabiziga cye gifite yifashishije urubuga rwa Irembo, atiriwe ajya kubarisha cyangwa se ngo abimenye kuko polisi yahagaritse ikinyabiziga cye.

Kimwe nk’izindi serivisi za leta zose, kureba amande [Contravention] urimo ujya ku rubuga rwa Irembo www.Irembo.gov.rw ukamanuka hasi ukareba umutwe w’amagambo wanditseho ‘Polisi’ , haba hariho serivisi nyinshi zihatangirwa.

Iyo uhageze ubona interuro ya kabiri yanditseho ngo ‘Kwishyura Konterevasiyo’ ukayikandaho, hakaza imbonerahamwe nto iriho ibisobanuro by’uko iyo serivisi ikoreshwa, ubundi ugakora ahanditse ngo ‘Saba’ mu mabara y’ubururu.

Iyo umaze kuhakanda ureba mu mbonerahamwe, ugakanda ahanditse ‘Nimero ya Pulaki’, munsi yaho ukandikamo izo nimero ukagakora ku ruhande ahari ibara ry’ubururu. Ako kanya uhita ubona amafaranga ikinyabiziga cyawe kirimo, iyo ntayo gifite nabwo bakubwira ko ntayo.

Ibyo ni ukureba umubare w’amafaranga ikinyabiziga cyawe kirimo, ariko ushobora no kwishyura amafaranga unyuze muri iyo nzira. Ku ruhande rw’ahanditse ‘Nimero ya Pulaki’ handitseho ngo ‘Nimero ya Tike’, urahakanda maze munsi yaho ugashyiramo izo nimero ubundi ugakurikiza amabwiriza.

Nubwo hari bamwe binubira amande bacibwa mu muhanda, ni iby’ingenzi ko umushoferi utwara imodoka akwiriye kwitwararika ntarenge ku mategeko yo mu muhanda hato adatanga amafaranga atari yateganyije azize amakosa yari kwirinda bigashoboka.

Hari abantu benshi bandikirwa amande ku muhanda, ariko ntibahite babimenya ngo bishyure
Uyu afite amande ahera muri Gicurasi uyu mwaka, bisobanuye ko yishyura ashyizeho amande

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .