Ububiko bw’amakuru y’ikoranabuhanga bwa Leta bugiye kuyuzurana

Yanditswe na Evariste Nsengimana
Kuya 27 Nyakanga 2017 saa 08:59
Yasuwe :
0 0

Leta y’u Rwanda irakangurira abashoramari batandukanye kuyishora mu bijyanye no kubaka ububiko bw’amakuru y’ikorabuhanga, bizwi nka ‘Data Center’ kuko ubwo yubatse bugiye kuzura mbere y’igihe yari yarateganyije.

Mu 2012, u Rwanda rwubatse ububiko bw’amakuru y’ikoranabuhanga rufite icyizere ko byibuza bushobora kuzageza mu 2020 bugifite ubushobozi bwo kuyabika ariko
Minisitiri w’Urubyiruko n’ikoranabuhanga, Jean Philbert Nsengimana, yatangarije RBA ko bigaragara ko buzuzura icyo gihe kitaragera.

Yagize ati “Hari ibyakozwe, hari sosiyete z’ubucuruzi zikora iby’ububiko abafite amakuru bakajya kubitsa, hari ububiko bwubatswe na Leta ariko navuga ko ububiko bw’amakuru muri rusange, ntushobora kuvuga ngo ufite ubuhagije. Iyo ugiye kuvuga ngo ufite ubuhagije buhita burangira.”

Yakomeje agira ati “Nk’ubu ubwo Leta yubatse mu 2012, twabonaga ko bushobora kutugeza nko muri 2020. Kugeza uyu munsi burenda kurangira. Tugomba kongera gushora indi mari mu bubiko. Dukeneye abashoramari mu bubiko bw’amakuru.”

Ubushakashatsi buheruka gushyirwa ahagaragara n’Ikigo nyarwanda mu ikoranabuhanga (Ricta), bwagaragaje ko imbuga zirenga 54% zikoresha ikirango cy’u Rwanda ‘.rw’ zibika amakuru yazo muri Amerika ya Ruguru, 18% zikoresha ‘.co.rw’ ziyabika mu Rwanda naho izindi zirenga 53% ziyabika hanze.

Impuguke mu by’ikorababuhanga zisobanura ko kuba ibiciro by’ikoranabuhanga na Internet biri hejuru mu Rwanda ugereranyije no ku isoko mpuzamahanga ariyo ntandaro yo kuba ibigo byinshi n’abikorera babika amakuru yabo mu mahanga, zikemeza ko iki kibazo kibonewe umuti byarushaho kuba byiza nk’uko Neza Nice Fabrice wumvikanye cyane kuri Radio Salus akora ibiganiro by’ikorabuhanga, abisobanura.

Yagize ati “Muri iyi minsi abantu benshi bajya kubitsa amakuru yabo y’ikoranabuhanga hanze y’igihugu kubera ibyerekeranye n’amafaranga. Baravuga bati ‘niba ngiye gushyira amakuru yanjye, nkajyana ahandi hose bashobora kuba bayabika, ni uko baca amafaranga make. Barahari usanga baca amdorali 10 cyangwa 20 mu mezi atandatu cyangwa n’umwaka. Waza mu gihugu ugasanga abayabika baraca aruta yayandi.”

Minisitiri Nsengimana yemera ko ibiciro byo kubika amakuru y’ikoranabuhanga mu Rwanda bikiri hejuru, akavuga ko hari ibiri gukorwa ngo bigabanuke.

Yagize ati “Impamvu imwe yari itubareye ingorane mu myaka ishize aho umuriro w’amashanyarazi wari uri hejuru, ariko Leta y’u Rwanda yiyemeje guha umwihariko ububiko bw’amakuru kugira ngo igiciro cy’amashanyarazi kigabanuke n’ububiko bw’amakuru bwagurwe. Aho kigabanukiye, tubona abashoramari nabo bagabanya ibiciro nubwo bitaragera hamwe twifuza.”

Ububiko bw’amakuru y’ikoranabuhanga muri rusange bujyana n’umutekeno wayo. Raporo y’umuryango mpuzamahanga mu by’itumaraho, ku bijyanye n’umutekano mu by’itumanaho ya 2017, Cyber Security Index, yashyize u Rwanda ku mwanya wa Kabiri muri Afurika mu gucunga umutekeno w’amakuru yarwo y’ikoranabuhanga, rukaba urwa 36 ku Isi.

Minisitiri w'Urubyiruko n’ikoranabuhanga, Jean Philbert Nsengimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza