U Rwanda rwaje ku isonga mu guteza imbere Ikoranabuhanga ku isi

Yanditswe na Philbert Hagengimana
Kuya 15 Mata 2015 saa 08:52
45 31

U Rwanda rwabaye urwa mbere ku isi mu guteza imbere ikoreshwa ry’ikoranabuhanga mu nzego zose, bitanga umusaruro ndetse no kuzamura ishoramari ririshorwamo.

Ibi byemejewe n’icyegeranyo cya World Economic Forum cyiswe ‘The Global Information Technology Report 2015’, aho cyashyize u Rwanda ku mwanya wa mbere mu bihugu bisaga 143 byo hirya no hino ku isi.

Muri iki cyegeranyo cyasohotse kuwa Gatatu, tariki ya 15 Mata 2015 u Rwanda rufite amanota 6.2 kuri arindwi (7) rukaza imbere y’ibihugu birimo Leta Zunze Ubumwe z’Abarabu, Singapore, Luxembourg, Qatar, Malaysia n’ibindi.

Perezida Paul Kagame w’u Rwanda ubwo yari ayoboye inama ya 11 ya ITU yabaye muri Gashyantare uyu mwaka yiga ku iterambere ry’umurongo mugari (broadband) ku isi yavuze ko ibyiza by’ikoreshwa ry’ikoranabuhanga ritagarukira mu bucuruzi no muri ba Rwiyemezamirimo gusa ahubwo ko rinanoza uko inzego zitanga serivisi inose; aho ngo umuyoboro mugari)woroshya ibikorwa byo gukorera mu mucyo, kuzuza inshingano, no kumenyekanisha ibikorwa.

Perezida Kagame avuga ko ikoranabuhanga riteza imbere inzego zose mu gihugu

U Rwanda rufata ikoranabuhanga nka moteri mu guteza imbere igihugu cyane mu kugera ku cyerekezo igihugu cyihaye cyo kugira ubukungu bushingiye ku bumenyi, by’umwihariko mu bijyanye no guhanga imirimo mishya kandi myinshi ku rubyiruko.

Mu mpera za Werurwe uyu mwaka ubwo Perezida Paul Kagame yahuraga na mugenzi we wa Malawi Prof Peter wa Mutharika yamwijeje ko u Rwanda rugiye gufasha iki gihugu mu bijyanye n’iterambere ry’ikoranabuhanga.

Perezida Kagame aganira na Perezida Mutharika yagize ati, "Ikoranabuhanga (ICT) ririmo kuba igikoresho cya ngombwa mu iterambere ry’isi, ibi ni byo bisaba ko Malawi na yo ikoresha ubu buryo.”

Mu bindi u Rwanda rwagezeho ni uko ikoranabuhanga ryihutisha iterambere ry’izindi nzego zirimo uburezi, ubuzima, ubukungu, ubuhinzi, imiyoborere n’izindi; u Rwanda rukora uko kandi uko rushoboye ngo rukomeze rubyaze umusaruro ikoranabuhanga mu buryo butandukanye harimo kurikoresha neza mu gutanga serivisi inoze ndetse no kurikoresha mu guteza imbere miyoborere myiza aho abaturage bahabwa ijambo kuri gahunda zibagenewe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE