U Rwanda mu bihugu bitanu bigiye gufashwa guteza imbere ubumenyi ngiro

Yanditswe na Rabbi Malo Umucunguzi
Kuya 12 Gicurasi 2017 saa 08:48
Yasuwe :
0 0

Ikigo gishinzwe Ubufatanye bushya bugamije iterambere rya Afurika (NEPAD Agency) cyasinyanye amasezerano y’igihe kirekire n’ikigo cy’Ikoranabuhanga, IEEE (Institute of Electrical and Electronics Engineers), agamije guteza imbere uru rwego muri Afurika.

Ni amasezerano yashyiriweho umukono i Kigali, mu gihe u Rwanda ruri kwakira inama ya Transform Africa 2017, azatangirira ku bihugu bitanu birimo u Rwanda, Ghana, Zambia, Kenya na Uganda.

Umuyobozi wa IEEE, Karen Bartleson, yavuze ko bajya kureba ibihugu batangirana nabyo, barebye ibiri guha umwanya uhagije ibikorwa by’ikoranabuhanga na Engineering, ku buryo hari icyizere ko bahashyize imbaraga zabyara umusaruro.

Ni amasezerano agamije guteza imbere ubushobozi bw’abakozi mu bigendanye n’ikoranabuhanga na Engineering, hakazashyirwa imbaraga cyane mu birebana n’uburezi binyuze mu bufatanye na za kaminuza.

Yagize ati “Tuzajya dutegura ibikorwa by’ingenzi kuri uyu mugabane, harimo nk’inama za tekiniki, imyiherero, amahugurwa n’ibiganiro bigamije kwigisha. Turebye cyane mu nzego z’ingufu n’ikoranabuhanga, tuzafasha cyane mu guteza imbere gahunda za NEPAD, guteza imbere ubumenyi bushingiye kuri Siyansi, Ikoranabuhanga, Engineering n’Imibare (STEM).”

Mu bikorwa bateganya kandi ngo harimo no gushishikariza abakobwa kurushaho kwitabira amasomo y’ubumenyi n’ikoranabuhanga, STEM.

Umuyobozi ushinzwe Porogaramu muri NEPAD Agency, Dr Towela Nyirenda-Jere, yavuze ko uyu muryango ushamikiye kuri Afurika yunze Ubumwe, ugomba gufasha ibihugu byose uko ari 55 bigize Afurika, ariko ngo ntabwo byafashwa icya rimwe ariyo mpamvu habaye hatoranyijwe bike.

Yakomeje agira ati “NEPAD ihora ishaka ubufatanye bwatuma guhanga imirimo nk’ikintu abantu bose bari kugarukaho, cyarushaho koroha, cyane ko 70% by’abaturage bacu bafite munsi y’imyaka 35, kandi bagomba kuba bafite ubushobozi bwatuma babasha gutanga umusaruro mu bihugu byabo.”

Karen Bartleson yavuze mu buryo bwo gufasha ibi bihugu guteza imbere ubumenyi no gushishikariza abakobwa kwinjira mu masomo y’ubumenyi bushingiye ku mibare, bateganya kuzajya bifashisha inama zitandukanye.

Yakomeje agira ati “Dushobora gutegura igikorwa nk’abakobwa bagahura n’abandi babatanze muri iyo mirimo itandukanye, hari ugufatanya na za kaminuza zitandukanye, tuzasaba aba Engineers kuza muri IEEE, ikindi ni uko nk’ahari icyuho dushobora gutangamo umusaruro dushobora kukimenyeshwa akaba ariho dushyira imbaraga.”

Umuyobozi Mukuru wa NEPAD Agency, Dr Ibrahim Maiyaki, yavuze ko ubu bufatanye buzakoreshwa mu guteza imbere ubumenyi ngiro mu bya tekiniki, uburezi, gahunda zigamije ubumenyi na Engineering ndetse n’ubushakashatsi.

Yavuze ko NEPAD Agency ubu iri kugerageza kongera uruhare rwo guhanga imirimo cyane cyane mu mishinga y’ibikorwa remezo, aho ivuga ko hakenewe abantu bafite ubumenyi cyane ko mu gihe kiri imbere aribo bazaba bakenewe kimwe n’abashakashatsi, mu kubaka, guhanga, gukurikirana no gusana ibikorwa remezo by’umugabane wa Afurika.

Umuyobozi wa IEEE, Karen Bartleson, aganira n'itangazamakuru
Umuyobozi ushinzwe Porogaramu muri NEPAD Agency, Dr Towela Nyirenda-Jere, asinya ku masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza