U Rwanda ku mwanya wa 13 muri Afurika mu kugira internet ihendutse

Yanditswe na Dufitumukiza Salathiel
Kuya 29 Mata 2021 saa 02:25
Yasuwe :
0 0

Raporo ngarukamwaka ku biciro bya internet, Worldwide Mobile Data Pricing, yerekanye ko mu 2021 u Rwanda ruhagaze ku mwanya wa 70 ku Isi, n’uwa 13 muri Afurika yo munsi y’Ubutayu bwa Sahara mu kugira internet ihendutse.

Iyo raporo ikorwa n’Ikigo cy’Abongereza gikora ubushakashatsi ku ikoranabuhanga, Cable, igaragaraho ibihugu 230 byo hirya no hino ku Isi.

Urutonde rwakozwe hashingiwe ku mpuzandengo y’igiciro cya gigabyte imwe ya internet mu gihugu maze ako gaciro kagashyirwa mu madorali ya Amerika.

Ku Rwanda, hagaragajwe ko gigabyte imwe mu 2021 iri ku mpuzandengo ya 1.133,33 Frw angana na 1,25$ ivuye ku 1,48$ mu 2020, mu gihe mu 2019 yabarirwaga 3,79$.

Ibikorwa remezo nk’iminara na internet ya 4G na 5G zigezweho nabyo byarebweho kuko bishobora gutuma ikiguzi cyiyongera cyangwa kikaganuka.

Raporo iragira iti “Ibihugu bimaze igihe kinini bifite 4G na 5G nshya, byagiye bigaragara ko internet yaho ihendutse. Ibyo biterwa n’uko umubare wa gigabyte abakoresha internet bagenerwa warenze kuba hagati y’imwe na 10, ukagera mu magana cyangwa ugasanga nta n’urugero ntarengwa ruhari. Igiciro cya gigabyte muri ibyo bihugu kizaba kiri hasi cyane.”

U Rwanda ntiruragira 5G ariko mu gihugu hagera 4G ndetse yagejejwe mu mu gihugu mu 2014.

Ku bw’izo mpamvu, iyo raporo yerekanye ko gigabyte ihenze cyane mu Rwanda muri uyu mwaka igura 21.000 Frw (23,1$) naho ihendutse ikaba igura 315,79 Frw (0,35$).

Uretse umwanya wa 70 mu bihugu 230 byo ku Isi byakorewemo inyigo, u Rwanda ruri ku mwanya wa 13 muri Afurika yo munsi y’Ubutayu bwa Sahara, no ku wa kabiri muri Afurika y’Iburasirazuba inyuma ya Tanzania ifite impuzandengo ya 0,75$.

Muri ako karere kandi rukurikiwe na Uganda ibarirwa 1,56$, u Burundi bubarirwa 2,1$ naho Kenya yatangiye gukoresha 5G ni 2,25$.

Ku Isi urutonde rubimburiwe na Israel ifite impuzandengo ya 0,5$ kuri gigabyte imwe, Kyrgyzstan iri kuri 0,15$, Fiji kuri 0,19$, u Butaliyani kuri 0,27$. Guinée Equatorial niyo ya nyuma ku kiguzi cya 49,67$.

Cable yatangaje ko hari ibihugu bitashyizwe ku rutonde kuko amakuru yabyo yagiye abura cyangwa agaciro k’amafaranga bikoresha kukagereranya n’amadorali ya Amerika bikagorana. Ibyo birimo Sudani y’Epfo, RDC, Erythrée, Zimbabwe, Koreya ya Ruguru, Venezuela n’ibindi.

Ibihugu bifite ubukungu buteye imbere nabyo ntibiri mu myanya y’imbere cyane kuko internet igurishwa ku giciro cyo hejuru bijyanye n’uko ababituye baba banashoboye kuyigura kuri menshi nk’uko iyo raporo ibivuga.

Nk’u Bushinwa buri ku mwanya wa 18 n’impuzandengo ya 0,52$, Leta Zunze Ubumwe za Amerika ziri ku wa 155 na 3,33$. U Burusiya bwo buri ku mwanya wa karindwa n’impuzandengo ya 0,29 $ kuri gigabyte.

Kugeza muri Mutarama 2021, habarurwaga ko abakoresha internet mu Rwanda bageze kuri miliyoni 4,12 bangana na 31,4% by’Abaturarwanda, biyongeyeho ibihumbi 806 ugereranyije no mu 2020.

Abakoresha imbuga nkoranyambaga bo biyongeyeho ibihumbi 240 bagera ku bihumbi 850 bangana na 6,5 by’abaturarwanda.

Abatunze telefoni mu Rwanda bo ni miliyoni 9,69 bangana na 73,9%, umubare wiyongeyeho ibihumbi 175 ugereranyije n’umwaka ushize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .