U Budage bwahagaritse amasaha agezweho y’abana ashobora gukoreshwa na ba maneko

Yanditswe na Herve Ugirumukunda
Kuya 18 Ugushyingo 2017 saa 06:08
Yasuwe :
0 0

Ubuyobozi bw’u Budage bwahagaritse igurishwa ry’amasaha agezweho yagenewe abana nyuma yo gusanga ari ashobora kwifashishwa nk’ibikoresho by’ubutasi.

Ikigo cy’igenzura, Federal Network Agency, FNA cyari giherutse no guhagarika ubwoko bw’ibipupe byitwa My Friend Cayla nabyo bikekwaho gukoreshwa na ba maneko cyangwa abagizi ba nabi.

FNA yasabye ababyeyi baguriye abana babo ayo masaha kuyasenya. Ni umwanzuro watumye batangira gutekereza ku bikoresho bimwe bikenera internet bishobora kwinjirirwa n’intasi.

Impuguke mu ikoranabuhanga, Ken Munro, yabwiye BBC ko ibikoresho birimo internet bidafite ubuziranenge bw’umutekano bishobora gutuma ubuzima bwite bw’abantu bujya mu kaga.

Hari nk’igihe umujura ashobora gukoresha ikoranabuhanga rya GPS akamenya aho umuntu ashaka kwiba cyangwa gushimuta aherereye bitamuruhije.

Ati “Ubushake buke bwo kugenzura ibikoresho byifashisha internet butuma abacuruzi baduhangika ibintu bidafite umutekano nibidahagarikwa bizashyira ubuzima bw’abana bacu mu kangaratete.”
Ayo masaha yahagaritswe yatumaga umubyeyi yumva ibiri kubera aho umwana ari ntihagire ubimenya, nk’igihe umwana ari mu ishuri, umubyeyi yumvaga ibyo mwarimu yigisha.

Yari yaragenewe abana bari hagati y’imyaka itanu na 12, arimo simukadi, avugwaho kubika amakuru adafitiwe ubwugariro (encryption) ku buryo buri muntu yayabona.

Bituma abagizi ba nabi bashobora gukurikirana umwana bakamuhohotera bagendeye ku merekezo ayo masaha aberetse.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza