Toyota igiye kujya inyuma y’umushinga wo gukora imodoka zizajya zica mu kirere

Yanditswe na Rabbi Malo Umucunguzi
Kuya 14 Gicurasi 2017 saa 03:44
Yasuwe :
0 0

Uruganda rukomeye rw’imodoka rwo mu Buyapani, Toyota Motor Corp. rwatangaje ko rugiye gutera inkunga umushinga wo gukora imodoka zifite ubushobozi bwo guca mu kirere, uri gukorwaho n’itsinda ry’abahanga mu Buyapani.

Igitekerezo cyavutse ubwo mu 2012, Tsubasa Nakamura uyoboye uwo mushinga uri gukorwa n’itsinda ryitwa Cartivator, yatsindaga irushanwa rya ba rwiyemezamirimo bato.

Ba rwiyemezamirimo bishyize hamwe ngo bahindure inzozi zabo impamo, bafashwa na Prof Masafumi Miwa usanzwe ari impuguke mu mikorere y’utudege tutagendamo abapilote n’umwarimu muri Kaminuza ya Tokushima, na Taizo Son washinze ikigo gikora imikino y’amashusho.

Ikinyamakuru Nikkei Asian Review cyatangaje ko Toyota yemeye guha Cartivator miliyoni 50 z’ama- yen zingana na $352,982 ndetse ishyiraho n’uburyo abantu batandukanye babasha gutera inkunga uyu mushinga.

Iyi modoka igomba kuba yamaze gukorwa bitarenze 2018, hagasigara kunozwa irindi koranabuhanga ku buryo izi modoka zizwi nka ‘Skydrive’, zizifashishwa mu gutangiza ku mugaragaro imikino Olempiki izabera i Tokyo mu 2020.

Umuti ku muvundo w’imodoka?

Uyu munsi imodoka ziri kwiyongera ku Isi nyamara imihanda ntiyiyongerane nazo, ku buryo izi modoka nshya nizisohoka, umuntu uzajya abona agiye gukererwa akazi azajya yinyurira iy’ikirere.

Ibi byiyongeraho imyuka yangiza ikirere izi modoka zidahwema gusohora iyo zitangiye gusaza, ku buryo ibisubizo biri mu gushaka imodoka zitwarwa n’amashanyarazi ndetse na zimwe zitwara zidafite abashoferi.

Airbus, uruganda rukomeye rukora indege mu Burayi, ruheruka gutangaza ko uyu mwaka uzashira rukoze isuzuma ry’imodoka ifite ubushobozi bwo kuguruka. Ikigo Uber Technologies Inc nacyo muri Mata cyatangaje ko gifite gahunda y’imodoka zitwara abagenzi zishobora kuguruka.

Biteganyijwe ko mbere y’uko abantu batwara imodoka zinjira mu buryo bw’imodoka ziguruka, bizasaba ko hashyirwaho amategeko agenga ingendo zo mu kirere nk’uko ibinyabiziga byo ku butaka bigira amategeko bigenderaho.

Iyi modoka y’uburebure bwa metero 2.9 n’ubugari bwa metero 1.3 yitwa Skydrive, izaba igendera ku muvuduko wo hejuru wa kilometero 100 ku isaha, muri metero 10 mu kirere, uvuye ku butaka.

Ishusho y'uko imodoka zigendera mu kirere zizaba ziteye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza