Telegram yashyizeho uburyo bwo kwimuriraho ubutumwa bwo kuri WhatsApp

Yanditswe na Umwali Zhuri
Kuya 29 Mutarama 2021 saa 01:15
Yasuwe :
0 0

Urubuga rwa Telegram rwashyizeho uburyo bworohereza abakoreshaga WhatsApp kuba bakwimurira ubutumwa bwabo kuri urwo rubuga.

Ubwo buryo bushoboka kuri telefone zikoresha iOS ndetse na Android.
Ibi bibaye nyuma y’aho abantu benshi bimukiye kuri Telegram kubera ubwoba bw’uko WhatsApp ishobora gushyira amabanga yabo hanze.

Umwaka ushize uru rubuga rwashyizeho amabwiriza mashya, asaba abayikoresha kuyiha uburenganzira bwo kuzajya isangiza amakuru yabo n’ikigo cya Facebook, ari na cyo kiyigenzura.

Ni amabwiriza atarakiriwe neza n’abakoresha WhatsApp ku Isi kuko baketse ko iki kigo gishaka kuzajya gitanga amakuru yabo kugira ngo akoreshwe mu kubamamazaho ibintu bitandukanye, nk’uko Facebook isanzwe ibigenza ku bayikoresha. Bamwe batangiye kuyivaho bajya kuri Telegram na Signal.

Uburyo bushya bwo kwimura ubutumwa bw’ibiganiro umuntu yakoreye kuri WhatsApp abushyira kuri Telegram, buje mu gihe uru rubuga ruri kwishimira kugera ku barukoresha basaga miliyoni 500.

Kuba abantu bashobora kwimukana ubutumwa bwabo bajya kuri Telegram, bivuze ko benshi bashobora kuyiyoboka bagatera umugongo WhatsApp.

Ikinyamakuru The Verge cyatangaje ko kwimura ubwo butumwa bishoboka ku bwaganiriwe hagati y’abantu babiri cyangwa ubwabereye mu itsinda (group).

Kuvana ubutumwa kuri WhatsApp ubujyana kuri Telegram, ujya aho waganiriye ubwo butumwa (niba ari mu itsinda cyangwa ari hagati yawe n’undi muntu), ugakanda hejuru ahantu hari utudomo dutatu. Haza urutonde rw’amagambo menshi ukajya ahanditse ‘more’, iyo uhakanze haza urutonde rw’andi magambo ugahitamo ahanditse ‘Export Chat’,.

Haza andi magambo arimo ‘Without media’ na ‘Include media’ (uhitamo hano bitewe n’icyo ushaka, niba ushaka ko ubutumwa wimura haba harimo amafoto n’amashusho cyangwa se ushaka kwimura ubutumwa bwanditse gusa). Iyo urangije, baguha urutonde rwa porogaramu zitandukanye ushobora kwimuriraho ubutumwa bwawe, muri izo porogaramu na Telegram irimo, ukayihitamo.

Ku bagize itsinda (group) iyo wimuye ubutumwa ukabushyira muri Telegram mu itsinda rishya, ubutumwa bwimuwe buba buriho akamenyetso kagaragaza ko bwavuye ahandi hantu, hagaragara kandi igihe bwohererejwe mu itsinda n’igihe bwimuriwe bujyanwa kuri Telegram.

Reba hano uko bikorwa


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .