Imikorere y’utwuma twambikwa abagororwa tugasimbura gereza

Yanditswe na Ndayikunda Josué
Kuya 3 Ukuboza 2019 saa 02:29
Yasuwe :
0 0

Ikoranabuhanga rikomeje gufata indi ntera ari nako ritanga ibisubizo ku bibazo umuntu ahura nabyo mu buzima bwa buri munsi. Hirya no hino ku Isi, ubucucike mu magereza ni imbogamizi ku iterambere ry’ibihugu.

Mu Rwanda naho ni uko, kuko mu mezi atatu ashize gusa, abagororwa biyongereyeho abarenga 1300 muri gereza zo hirya no hino mu gihugu ndetse ingengo y’imari Urwego rw’Igihugu rw’amagereza rukoresha imaze kugera kuri miliyari 17 Frw, amenshi ni akoreshwa mu biribwa.

Bisobanuye ko mu gihe abagororwa baba ari bake, aya mafaranga ashobora kwifashishwa mu zindi nzego z’iterambere rusange ry’abaturage.

Kimwe mu byitezweho kugabanya ubucucike muri gereza, ni ugukoresha inzogera zambikwa abahamwe n’ibyaha bagahabwa ahantu runaka badakwiye kurenga.

Aka kuma kazwi nka ‘ankle monitor/Surveillance électronique’ gakoreshwa n’inzego z’ubutabera iyo hari umuntu ukekwaho icyaha cyangwa cyaramuhamye, bashaka ko atarenga ahantu runaka kuko kaba gafite ikoranabuhanga rigahuza n’izo nzego, iyo uwakambitswe arenze aho bamubujije karasakuza kagatanga amakuru ku nzego zibishinzwe zikabimenya zikamufata.

Muri Nyakanga uyu mwaka, Minisitiri w’Ubutabera akaba n’Intumwa Nkuru ya Leta, Busingye Johnston, yabwiye Abadepite ko ako kuma gashobora kwambarwa mbere cyangwa nyuma y’uko umuntu ahamwa n’ibyaha kazafasha mu kugabanya abafungwa.

Ati “Itegeko riri gukorwa rizanagena uburyo bwo gukoresha akuma kifashisha ikoranabuhanga kagenzura abanyabyaha ku bahamijwe igifungo cyangwa abafunguwe batarangije igihano ariko bakigenzurwa. Gashobora kwambarwa mbere cyangwa nyuma y’uko ahamwa n’ibyaha.”

Yavuze ko ubwo buryo buzatuma hongerwa imbaraga mu bikorwa byo kugorora no gutegura abagororwa gusubizwa mu muryango.

Nonese ubu buryo bwitezwe gutangira gukoreshwa mu Rwanda mu minsi iri imbere, bukora bute, n’iki bushimwa cyangwa bunengwa?

Imibare yerekana ko mu 2005 abantu babarirwa mu 53 000 bari barambitswe aka kuma. Mu 2015 uyu mubare warenze abantu ibihumbi 125. Ni ukuvuga inyongera ya 136% mu myaka 10 gusa.

Benshi basanga aka kuma ari keza kuko uretse kugabanya ubucucike mu magereza gatuma umuntu aguma muri sosiyete, agakomeza kubana n’umuryango we. Gusa ku rundi ruhande ngo ikoranabuhanga ryako ntabwo rikora neza ku buryo gashobora kugira ingaruka ku wakambitswe.

Amateka yerekana ko igitekerezo cyo gukora aka kuma cyazanywe n’itsinda ry’abashakashatsi bo muri kaminuza ya Harvard mu 1960. Gashyirwa aho ukuguru guhurira n’ikirenge.

Sarah Faye Hanna w’imyaka 34 wo muri Leta ya Texas, yambitswe aka kuma mu gihano cy’agateganyo cy’imyaka itatu yakatiwe nyuma yo guhamwa n’icyaha cyo gutunga ibiyobyabwenge mu 2018.

Avuga ko akuma ke gafite ingano nk’iy’ipaki y’isigara. Kaka icyatsi igihe amerekezo yako ahari n’umutuku mu gihe kabuze amerekezo, bikabaho kenshi nta bushake yabigizemo.

Aka kuma gafite ikoranabuhanga rya ‘GPS’ ryemerera abakurikiranyweho ibyaha runaka kubonwa aho bari hose n’ababishinzwe. Uwambiswe aka kuma ahabwa ahantu runaka atagomba kurenga, yabirengaho kagatangira kuvuga cyangwa kakaba yanajwigira mu rwego rwo kwibutsa ukambaye ko yarenze aho yabwiwe.

Imbibi z’aho umugororwa wambitswe akuma atagomba kurenga zishobora kongerwa bitewe n’ibyo yumvikanye n’inzego z’ubutabera.

Gakoresha umurongo wa radio ufasha gutanga amakuru ku bagenzuzi. Iyo aka kuma gakuwemo cyangwa kagakubaganywa, ubuyobozi buhita bubibona ukambaye agatabwa muri yombi.

Hanna avuga ko iyo aka kuma kabuze ikoranabuhanga rya GPS, bimusaba kuzenguruka hafi aho arishakisha kugeza rigarutse. Yishyura amadolari 300 yo kugatunga.

Aka kuma kandi bisaba ko ukambaye agashyira ku muriro byibuze amasaha abiri buri munsi kugira ngo kabashe gukora. Iyo bitagenze gutyo, byereka abakurikirana umugororwa ko yavuye ku murongo akaba yatangira no gukurikiranwa. Gakozwe ku buryo ntacyo amazi agatwara, bisobanuye ko uwakambitswe yakogana.

Aka kuma gashobora gukora nabi. Mu gihe bibayeho uhamagara abayobozi ukabamenyesha kugira ngo utagwa mu bibazo byo gushinjwa kugakuraho. Tumwe kandi tugira uburyo bwo kumviriza, aho abantu bo mu bugenzuzi bwatwo bashobora kumviriza ibiganiro ukambaye agirana n’abandi.

Hari n’utugira uburyo bwo kugenzura ko ukambaye yanyoye inzoga, kakaba kahita kabyerekana mu gihe unyoye alcohol kandi umucamanza yarabikubujije.

Hirya no hino ku isi ibihugu byinshi byatangiye gukoresha ubu buryo kuko bigabanya umubare munini w’abafungiye muri za gereza. Ikindi ni uko ubu buryo bufasha ibihugu gusigasira ingengo y’imari igenda ku bagororwa.

Nko muri Leta zunze Ubumwe za Amerika bakoresha aka kuma kugira ngo abakambitswe bakoreshwe imirimo ifitiye igihugu akamaro.
Hari aho gukuraho aka kuma cyangwa kugakubaganya bituma ubikoze afungwa imyaka itanu cyangwa akishyura amande ya 5000$, cyangwa byombi.

Shubha Bala, umuyobozi w’ikigo cya Amerika gishinzwe iby’ikoranabuhanga na inovasiyo mu butabera, avuga ko utu twuma nubwo turuta kuba umuntu yafungwa dufite imbogamizi.

Bala avuga ko uwakambitswe abona ubutumwa bwinshi buri kanya bugamije kumenya aho aherereye, bityo bikaba byamubangamira.

Imwe mu mpamvu utu twuma tugenda dukwirakwira cyane hirya no hino ku isi, Bala avuga ko ari ukubera imbaraga z’ikigo kidukora kuko ngo dufite ubunararibonye buhagije mu bijyanye no gucunga imfungwa n’abagororwa.

Aka kuma kambikwa aho ukuguru guhurira n'ikirenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza