Kwamamaza

Rwanda Online yateye ingabo mu bitugu ikoranabuhanga rizifashishwa mu buhinzi

Yanditswe kuya 21-09-2016 saa 15:06' na Tombola Felicie


Umuyobozi w’Ikigo Rwanda Online gifite mu nshingano zacyo urubuga rwa internet ‘Irembo’ rutangirwaho serivisi za Leta hagamijwe kuzihutisha binyuze mu ikoranabuhanga yatangaje ko bashyigikiye gahunda zo guteza imbere abaturage cyane cyane abahinzi bakorana n’Ikigo Nfrnds cyo muri Israel mu guhanahana amakuru.

Nfrnds ni ikigo cyo muri Israel cyatangije uburyo bwo kugeza ku baturage bataragerwaho na internet uburyo bwo kongera ubumenyi mu byo bakora binyuze mu kubona amakuru kuri telefoni zabo yaba ajyanye n’ubuhinzi, ubucuruzi, ndetse n’ibindi.

Iki kigo gikoresha ikoranabuhanga ridakenera internet haba mu buhinzi,mu bucuruzi, mu burezi , kubona amakuru y’iteganyagihe, amakuru asanzwe mu nzego zose z’ubuzima bwa buri munsi, bikaba bikorwa muri gahunda cyihaye yo gufasha miliyari enye z’abatuye Isi bataragerwaho n’ikoranabunga rigezweho kubona amakuru no gutera imbere.

Mu muhango wo gutanga imyampabushobozi ku banyeshuri 12 biga muri Kaminuza zitandukanye basoje amezi atatu y’amahugurwa yo kwihangira imirimo hakoreshejwe ikoranabuhanga ndetse no mu guhugurira abaturage kuyoboka ubu buryo bwo kubona amakuru ajyanye n’ibyo bifuza bakoresheje telefoni zisanzwe kandi badakeneye internet, Umuyobozi wa Rwanda Online, Uwajeneza Clement, yatangaje ko bashyigikiye ubu buryo bw’ikigo Nfrnds cyo muri Israel kuko byose bigamije iterambere ryihuse.

Yagize ati “Twishimiye iyi gahunda y’ikoranabuhanga bafite kuko ni akazi natwe dukora kandi twese tugamije iterambere ndetse no korohereza umuturage kubona ibyo akeneye atavunitse kandi adatakaje igihe.Kuba umuturage afite telefoni bizajya bimuhesha kubona amakuru adakeneye internet kandi ku giciro gito.”

Umuyobozi ushinzwe ubucuruzi n’Iterambere mu Kigo Nfrnds, Caylee Talpert, yatangaje ko bahisemo u Rwanda kuko hari aho rumaze kugera mu guteza imbere ikoranabuhanga.

Ati “Dukorera mu bihugu bitandukanye muri Afurika nka Uganda, Zimbabwe n’ibindi byinshi , umwaka ushize twaje mu Rwanda dusura KLab twaganiriye n’abantu batandukanye tubona ko u Rwanda rushyize imbere ikoranabuhanga niyo mpamvu twahisemo kuza gutanga amahugurwa mu rubyiruko ngo rwihangire imirimo kandi basobanurire abaturage ibyiza by’ubu buryo bwo kubona amakuru ajyanye n’ibyo bifuza hadakenewe internet.”

Yakomeje avuga ko Nfrnds yitaye cyane ku bantu bataragerwaho n’amakuru nk’abahinzi, abacuruzi bato n’abandi bose bashobora kuba badafite telefoni zigezweho na internet ariko bakaba bakenera amakuru.

Ati “Hari imibare umuntu akanda muri telefoni ye akagenda akurikiza amabwiriza,niba ashaka kumenya uko inyanya ziboneka kuva zihinzwe kugeza zisaruwe byose arabibona. Ku munsi ibyo washakisha byose umuntu akoresha amafaranga 21 gusa, ku cyumweru ni amafaranga 150, ku kwezi ni amafaranga 600.”

Shyaka Charles wasoje amahugurwa yatangaje ko aho bagiye bagera hose bamenyekanisha iyi gahunda abaturage babyishimiye kuko berekanaga ko byatuma barushaho kunoza ubuhinzi cyangwa ubucuruzi bakora.

Ati “Abaturage twasobanuriraga nko ku munsi w’umuganda wasangaga bishimye kuko hari nk’igihe ibihingwa birwara ntibamenye uko byagenze cyangwa bakabura uwo babaza ariko ubu bakaba bazajya babaza telefoni zabo.”

Nubwo iyi gahunda ngo ikiri mu igeragezwa abaturage 1400 bo mu turere dutandukanye bamaze kuyijyamo.

Abatarayisobanukirwa bakanda akanyenyeri 847 urwego (*847 #) ku bakoresha MTN bagakurikiza amabwiriza naho ku bakoresha Tigo ukanda akanyenyeri 265 (*265 # ) urwego nabwo ugakurikiza amabwiriza.

Abasoje amahugurwa bahawe ibihembo binyuranye hakurikijwe icyo umuntu yitwayemo neza, hanatanzwe ibihembo ku bagaragaje imishinga myiza y’uburyo bw’iki kigo Nfrnds bwakoreshwamo abaturage bakabona amakuru hadakenewe internet.

Umuyobozi Mukuru wa Rwanda Online, Uwajeneza Clement, avuga ko bashyigikiye ikigo cyo muri Israel giteza imbere ikoranabuhanga mu buhinzi
Umuyobozi ushinzwe ubucuruzi n'iterambere mu kigo Nfrnds, Caylee Talpert, asobanura imikorere yacyo
Alex Ntare, rwiyemezamirimo watumye abagize Nfrnds baza gukorera mu Rwanda
Patrick Buchana , rwiyemezamirimo ukiri muto, yabazaga ikibazo abasoje amahugurwa
Abasojwe amahugurwa bagaragaje ko bungutse ubumenyi mu byiciro bitandukanye
Abasoje amahugurwa bahawe impamyabushobozi

Amafoto: Mahoro Luqman


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved