RICTA yatangiye gufasha abacuruzi kubona imbuga za Internet ku buntu.

Yanditswe na Uwimana Abraham
Kuya 25 Mutarama 2021 saa 09:02
Yasuwe :
0 0

Mu ngamba nshya zashyizweho mu rwego rwo kwirinda ikwirakwira ry’icyorezo cya COVID-19 cyari gikomeje kuzamuka n’ubukana bwinshi, harimo gufunga ingendo zihuza uturere, ndetse na Guma mu rugo mu mujyi wa Kigali, bimwe mu bikorwa by’ubucuruzi byagizweho ingaruka n’izo ngamba kuko atari byose byakomeje kwemererwa gukora.

Muri ibi bihe bamwe mu bakora ibikorwa by’ubucuruzi bareba kure, bahisemo kudaheranwa no kwibaza uko bizagenda ahubwo bayoboka ikoranabuhanga, aho bashobora gukomereza imirimo yabo y’ubucuruzi nta nkomyi.

Mu rwego rwo kurushaho gufasha benshi mu bakora ibikorwa by’ubucuruzi muri ibi bihe Umujyi wa Kigali uri muri Guma mu rugo ndetse n’ingamba zikaba zarakajijwe mu gihugu hose, Ikigo gishinzwe guteza imbere ikoranabuhanga mu Rwanda (RICTA) hamwe n’abafatanyabikorwa batangiye kuborohereza kubona imbuga za Internet (website) ku buntu muri promotion ya “Zamuka na AkadomoRW.”

Umuyobozi wa RICTA, Ingabire Grace, yavuze ko babona ko iki ari igihe nyacyo ko buri mucuruzi atangira gutekereza ku gukoresha ikoranabuhanga mu kazi ke ka buri munsi, akaba ari yo mpamvu bahisemo kuborohereza.

Yagize ati “Turatekereza ko ari cyo gihe nyacyo abacuruzi bakagombye kwifashisha Ikoranabuhanga mu kazi kabo ka buri munsi. Gutunga no gukoresha urwo rubuga rwa Internet (website) ntabwo bisaba ubuhanga buhambaye, twateguye kandi n’inzobere muri iyo gahunda zibafasha muri rwo rugendo, mucuruzi tinyuka udusange turabigufashamo.”

Bamwe mu bafatanyabikorwa ba RICTA nabo bahamije ko ari ingenzi cyane gutunga urubuga rwa internet by’umwihariko ku bacuruzi, bityo babashishikariza kwihutira kugana RICTA kugira ngo ibibafashemo.

Mugira Davis yagize ati “Iyo ufite urubuga rugufasha kwagura amarembo y’ubucuruzi bwawe, rugufasha gutanga amakuru ku bashakisha ibicuruzwa cyangwa serivisi utanga bifashishije imbuga z’ishakiro nka Google byihuse, ikindi bikorohereza abakiliya bakugana bifuza guhaha bifashishije ikoranabuhanga.”

Naho Ivan yagize ati “Abakiliya benshi batekereza ko gutunga urubuga rwa Internet (website) bigoye, ariko ibyo siko bimeze, kuko tugerageza kubafasha mu buryo butandukanye kugira ngo bakomeze gukurikirana ubucuruzi bwabo, mu gihe twe turi kwita ku by’ikoranabuhanga ribafasha gutuma ubwo bucuruzi bwabo bugera kure.”

Iyi poromosiyo ya “Zamuka na AkadomoRW” izafasha abacuruzi 100 baziyandikisha mbere, kubakorera imbuga za Internet (websites) ku buntu, kugira ngo bashobore kuzifashisha bageza ibicuruzwa ku bakiliya babo no muri ibi bihe by’ingamba zidasanzwe zo kwirinda COVID-19.

Ushaka kwiyandikisha muri iyi poromosiyo kugira ngo afashwe kubona urubuga rwa Internet (website) yakwifashisha mu bucuruzi bwe, ashobora kwiyandikisha anyuze ku rubuga akadomo.rw, cyangwa agahamagara nimero 0788125078., ndetse no kuri WhatsApp 0781151371.

Poromosiyo ya Zamuka n'akadomoRW yaje kubera igisubizo abacuruzi muri ibi bihe by'ingamba z'idasanzwe zo kwirinda COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .