RICTA yashimiye Abafatanyabikorwa bitwaye neza mu 2019, inakomoza ku ngamba za 2020

Yanditswe na Iradukunda Serge
Kuya 30 Mutarama 2020 saa 01:49
Yasuwe :
0 0

Ikigo gihagarariye abakoresha internet no guteza imbere Indangarubuga y’u Rwanda [.RW], RICTA cyishimiye ibyo cyagezeho , gihemba abafatanyabikorwa bacyo bitwaye neza mu mwaka ushize wa 2019 ndetse kinabamurikira zimwe mu ngamba bafite mu mwaka wa 2020.

Ibi byabereye mu nama ngarukamwaka ihuza ubuyobozi bw’iki kigo n’abafatanyabikorwa bacyo kugira ngo basuzume uko umwaka wagenze bafate n’ingamba z’umushya.

Muri uyu mwaka iyi nama yahuje ibigo bikora imbuga za interinet bikanacuruza indangarubuga y’u Rwanda bitadukanye.

Umuyobozi wa RICTA, Ingabire Grace yavuze ko umwaka wa 2020 utangiye bishimira ko hari abantu batangiye kumva ibyiza biri mu gukoresha indangarubuga y’u Rwanda.

Yagize ati “Kuva ubukangurambaga bwa Nahisemo .RW bwatangira, twabonye ko abantu babimenye, hari Abanyarwanda benshi batari bazi uko ikora, na benshi batekerezaga ko wenda itagera ku Isi hose nk’uko bamwe babitekereza, muri rusange twabonye amahirwe yo kuganiriza Abanyarwanda no kubamenyesha ko .RW ihari”.

Ikindi RICTA yishimira n’uko ubu abakenera kugura indangarubuga y’u Rwanda bashobora kuyigura bakoresheje telefone cyangwa mudasobwa banyuze ku mbuga z’abasanzwe bayigurisha bikabafata iminota itarenze itanu, mu gihe mbere byabasabaga kujya aho bakorera bakoresha inzira zigatinda.

Umukozi w’ikigo gikora imbuga za Interinet, Spiderbit, Rukundo Alexis yavuze ko n’ubwo abantu bagenda bitabira gukoresha indangarubuga y’u Rwanda, hakiri imbogamizi ku myumvire ndetse n’ibijyanye n’igiciro cyayo ugereranyije n’izindi.

Ati “Imbogamizi zikirimo ni iz’ibiciro, abakiliya cyane cyane baza bareba ibiciro, iby’ indangarubuga y’u Rwanda bisa nk’aho bikiri hejuru ho gato y’ibisanzwe ku zindi ndangarubuga, indi ni uko abakiliya batarizera ko iyo indangarubuga yabasha kuyigeraho aho yaba ari hose ku isi ariko uko ubukangurambaga bugenda bwiyongera abantu bagenda babyumva”.

Muri iyi nama yahuje RICTA n’abafatanyabikorwa bayo, bunguranye ibitekerezo by’uburyo bashobora gukusanyiriza hamwe serivisi batanga harimo indagarubuga ya .RW, urubuga rwa interneti n’ububiko rw’urubuga kugira ngo borohereze abakiliya babagana ku bijyanye n’ibiciro.

Kuva ibikorwa byo gukangurira abantu gukoresha indangarubuga y’u Rwanda byatangira, umubare w’imbuga ziherwa na .RW zarazamutse zigera ku 4419 zivuye ku 3488.

Muri iyi nama kandi hahembwemo ikigo kigurisha imbuga za internet mu Rwanda no ku Isi cyitwa ‘Afriregister’ nk’umufatanyabikorwa wa RICTA witwaye neza mu mwaka ushize, naho Megabit ihembwa nk’umufatanyabikorwa mushya witwaye neza.

Umuyobozi wa RICTA, Ingabire Grace yavuze ko muri uyu mwaka bateganya gukoramo ibikorwa bitandukanye ndetse bakazarushaho gukorana n’abafatanyabikorwa batandukanye mu kurushaho kumvisha abantu akamaro ko gukoresha indangarubuga y’u Rwanda.

Ati “Muri uyu mwaka turimo turateganya ukuntu twakagura indangarubuga y’u Rwanda dufatanyije n’abafatanyabikorwa bacu mu kureba ukuntu twayimenyekanisha, na wa mucuruzi uri hasi, ejo ashobore kubona urubuga aho ashobora gucuruza, ishuri rishobore kugira urubuga rwa internet, aho umubyeyi ashobora kuvugana n’ishuri cyangwa n’ibindi bigo bisanzwe bashobore kugera kuri Internet kuko niyo si tugezemo”.

Umwaka wa 2020, ni umwaka RICTA izakomeza gukora inama zitandukanye zo guhuza abantu bakoresha izindi ndangarubuga zirimo .com na .net kugira ngo barusheho kumva akamaro ko gutunga indangarubuga y’u Rwanda (.Rw).

Abitabiye iyi nama bagize umwanya wo kungurana ibitekerezo ku ngamba za 2020
Ingabire Grace ashyikiriza igihembo umukozi w'ikigo gicuruza imbuga za Internet, Megabit
Umuyobozi wa RICTA Ingabire Grace ashyikiriza igihembo uhagarariye Afriregister umwe mu bafatanyabikorwa bitwaye neza mu 2019
Iyi nama yitabiriwe n'abafatanyabikorwa batandukanye ba Ricta
Rukundo Alexis iterambere ry'indangarubuga y'u Rwanda rikibangamiwe n'imyumvire ndetse n'igiciro kiri hejuru
Umuyobozi wa RICTA Ingabire Grace yavuze ko Abanyarwanda batangiye kumva akamaro ko gukoresha indangarubuga y'igihugu cyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza