RICTA n’abafatanyabikorwa basuzumye uko Internet n’ikoranabuhanga rigezweho byitabirwa mu Rwanda

Yanditswe na Ndayikunda Josué
Kuya 28 Ugushyingo 2019 saa 03:49
Yasuwe :
0 0

Ikigo gihagarariye abakoresha Ikoranabuhanga no guteza imbere Indangarubuga y’u Rwanda [.RW], cyitwa RICTA mu magambo ahinnye y’Icyongereza n’abandi bafatanyabikorwa bacyo, bateraniye mu nama yo kureba aho u Rwanda rugeze mu ikoreshwa rya Internet n’ikoranabuhanga rigezweho.

Iyi nama ngarukamwaka itegurwa na RICTA, n’abandi bafatanyabikorwa bafite aho bahuriye n’ikwirakwizwa rya internet.

Ibiganiro by’uyu mwaka bikaba byibanze ahanini ku kwimakazwa ikoranabuhanga rigezweho mu guhindura ubuzima bw’abanyarwanda bukaba bwiza kurushaho. Ikindi ni uko barebeye hamwe uko abanyarwanda bumva ibijyanye na internet, uko bayikoresha n’uko bayigeraho.

Umunyamabanga uhoraho muri Minisiteri y’Ikoranabuhanga mu Itumanaho na Inovasiyo, Irere Claudette, yasabye abitabiriye iyi nama kuzajya babanza kureba niba ingamba zifatwa mu ikoranabuhanga ziri mu nyungu z’abaturage.

Ati “Dukwiriye kureba neza niba ingamba, amahame n’amabwiriza dushyiraho biba birengera kandi byungura abaturage. Abaturage bacu nibashyirwa imbere, bazagira uruhare mu ikorwa ry’ibikoresho by’ikoranabuhanga bityo babe abaturage bakungahaye mu ikoranabuhanga rigezweho.”

Ku bijjyanye n’uko umubare munini w’abanyarwanda badafite ubumenyi ku ikoranabuhanga rigezweho, Umuyobozi wa RICTA, Ingabire Grace, yavuze ko umwaka utaha bafite gahunda yo kwigisha ubumenyi bw’ibanze kuri internet mu bigo by’amashuri na za kaminuza.

Yagize ati “Umwaka utaha dufite ibikorwa bitandukanye, aho tuzajya muri za kaminuza, mu mashuri abanza n’ayisumbuye, tukazatangira kwigisha ubumenyi bw’ibanze kuri murandasi ku buryo abantu bose guhera ku rwego rwo hasi baziyumvamo murandasi icyo ari cyo.”

Ingabire yongeyeho ko kwegereza abaturage ikoranabuhanga rigezweho bitari ukubakwirakwizamo imashini gusa cyangwa kubigisha uko bazifungura, ahubwo ari ukubigisha uburyo bazikoresha mu guhindura ubukungu n’iterambere ry’ubuzima bwabo.

Kugeza ubu abanyarwanda bafite ubumenyi ku ikoranabuhanga rigezweho bari munsi 10%, mu gihe imibare igaragazwa n’Ikigo cy’igihugu gishinzwe Ikoranabuhanga mu Itumanaho n’Isakazabumenyi (RISA) ivuga ko 52% aribo bakoresha Internet mu Rwanda.

Abitabiriye ibiganiro byo kureba uko internet n'ikoranabuhanga rigezweho rikoreshwa mu Rwanda
Habayeho umwanya wo kubaza ibibazo
Ibyumba mpahabwenge ni imwe mu ngamba zo guteza imbere ikoranabuhanga rigezweho yashyizweho
Ingabire Grace uyobora RICTA avuka ko umwaka utaha bazibanda ku kwigisha ubumenyi bw'ibanze kuri murandasi mu mashuri
Irere Claudette yavuze ko ibikorwa byose bigamije guteza imbere ikoranabuhanga rigezweho bikwiye kuba bishyira imbere abaturage
Iyi nama yari yitabiriwe n'ingeri zitandukanye
Ni inama yari yitabiriwe n'abafatanyabikorwa ba RICTA batandukanye
Hafashwe ifoto y urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza