Kwamamaza

Perezida Kagame yatangije ikoreshwa rya Drones muri serivisi z’ubuzima(Video)

Yanditswe kuya 14-10-2016 saa 12:10' na Philbert Hagengimana


Perezida Kagame yatangije ku mugaragaro ibikorwa byo gutwara amaraso mu bitaro hifashishijwe indege nto zizwi nka drones aho u Rwanda rwabaye igihugu cya mbere ku Isi gikoresheje iri koranabuhanga.

Umuhango wo gutangiza ku mugaragaro iri koranabuhanga wabaye mu gitondo cyo kuri uyu wa Gatanu tariki ya 14 Ukwakira 2016 mu Karere ka Muhanga ahari ikibuga cy’izi drones.

Kimwe n’ibindi bihugu bikiri mu nzira y’amajyambere, ibikorwa remezo birimo imihanda bijya biba imbogamizi ku kugeza amaraso kimwe n’ibindi bikoresho nkenerwa mu buryo bwihutirwa muri serivisi z’ubuvuzi.

Nubwo ntawe urapfa kubera ko yabuze amaraso, u Rwanda rwungutse uburyo bushya buje kunganira ubwari busanzwe bukoreshwa mu kugeza amaraso aho akenewe mu buryo bwihutirwa, ubwo bukaba ari ubwo gukoresha indege nto zitagira abapilote zizwi nka ‘Drones’.

Perezida Kagame yavuze ko zizafasha mu gukuraho imbogamizi zikomoka ku kuba hari uduce tumwe bigorana kugeramo mu buryo busanzwe.

Ati “Izi ndege zitagira abapilote zifite akamaro gakomeye haba mu bucuruzi no mu kongera imikorere myiza ya serivisi z’ubuvuzi. Twishimiye gutangiza uyu mushinga w’ikoranabuhanga no gukomeza gufasha n’abafatanyabikorwa kurushaho kuwunoza.”

‘Zips’ zikorwa n’uruganda Zipline rwo muri Leta ya California ho muri Leta Zunze ubumwe za Amerika, zikaba zitangiye gukoreshwa mu Rwanda ku bufatanye n’ikigo UPS na Gavi ndetse n’Ihuriro ry’Inkingo ku Isi (Vaccine Alliance), aba bakaba ari nabo bazafasha mu kuba Serivisi izo ndege zitanga zarenga kugemura amaraso, zikazajya zitwara n’ibindi nk’imiti n’inkingo.

Keller Rinaudo, Umuyobozi wa Zipline mu Rwanda yatangaje ko umushinga w’icyo kigo ugamije gukemura ikibazo cy’abantu bajya bapfa ku Isi kubera kubura ibikoresho nkenerwa byihutirwa muri serivisi z’ubuvuzi.

Ati “Kubura ubushobozi bwo kugeza ibikoresho by’ubuvuzi ku baturage bakeneye ubutabazi, byatumye abantu bagera kuri miliyoni ku Isi bapfa, kandi iyo babona ubutabazi bwihuse bari gukira. ‘Zips’ zizafasha gukemura icyo kibazo bya burundu.”

Ku zindi serivisi izo ndege zishobora gutanga, Umuyobozi wa Zipline yavuze ko “agatinze kazaza ari amenyo ya ruguru”, anashimira ko “u Rwanda rubaye Nyambere ku Isi” mu gukoresha iryo koranabuhanga, ariko ngo hari n’ibindi bihugu byinshi nka USA birimo gusaba ko iryo koranabuhanga ryahagezwa bagatangira kurikoresha.

Agaciro k’umushinga n’inyungu yawo mu mafaranga ntibizwi…

Mu Kiganiro n’abanyamakuru, Minisitiri w’Ubuzima, Dr.Diane Gashumba wari kumwe na Minisitiri w’Urubyiruko n’Ikoranabuhanga, Jean Philbert Nsengimana ndetse na Keller Rinaudo, Umuyobozi wa Zipline, babajijwe akamaro k’izo ndege mu mafaranga ndetse n’agaciro k’umushinga, ariko ibisubizo ntibyakagaragaza.

Minisitiri Dr.Gashumba yagize ati “Akamaro kawo ni uko igihe cyakoreshwaga ngo amaraso abe ageze ku murwayi kizagabanuka, kikava ku masaha hagati y’abiri (2) n’ane (4) kikagera ku minota hagati ya 15 na 25. Ubuzima bw’umurwayi buza imbere y’amafaranga.”

Yakomeje avuga ko uretse igihe imodoka yamaraga mu nzira itarageza amaraso ku murwayi n’icyo umurwayi yamaraga mu bitaro kizagabanuka, bityo icyo yamaraga adakora kimwe n’abarwaza be, ibyamugendagaho byose bizagabanuka."

“Nta munyarwanda wapfaga kubera kubura amaraso, kuko nk’uko mubizi RBC (Ikigo cy’igihugu gishinzwe ubuzima) n’Ikigo cy’igihugu gishinzwe gukwirakwiza amaraso, bifite amashami hose mu gihugu, ku buryo nta mibare dufite igaragaza ko hari abapfaga kubera kubura amaraso.”

Yakomeje ashima ko icyo kigo gikora neza, ati “Ahubwo icyo dukwiye kureba ni ugucunguza uburyo umwete, cyane ko ubushakashatsi bwakozwe bwagaragaje ingaruka zishobora guturuka ku gutinda kubona serivisi.”

Minisitiri Gashumba yasabye ko harebwa inyungu kurusha amafaranga u Rwanda rwashoyemo, dore ko Umuyobozi wa Zipline yavuze ko ibindi bihugu byinshi byasabye ko byagezwamo iryo koranabuhanga, bityo u Rwanda rukaba rwaba aho ibyo bihugu bishobora kwitoreza, ibyo bikaba byakwinjiza amafaranga.

Ubushobozi bw’iyo ndege burahagije nubwo itwara ikiro kimwe n’inusu

Ku mpungenge z’uko ubushobozi bwo kwikorera bw’iyo ndege bushobora kuba buke ugereranyije n’umubare w’abashobora gukenera serivisi itanga, Minisitiri Jean Philbert Nsengimana yatangaje ko nta wukwiye kuzigira, kuko ikiro n’inusu Zip itwara kirahagije.

Ati “Ikiro n’inusu ako kadege gatwara kirahagije, kuko muri icyo kiro n’inusu hashobora kugendamo igice cy’amaraso, ibinini byavura benshi icya rimwe, inkingo ndetse n’indi miti ishobora kuramira umuntu.”

Icyakora ngo hari no gukorwa ubundi bushakashatsi ku buryo haboneka n’indege yajya igera kure kandi igatwara byinshi kuruta Zip yikorera ikiro n’inusu kandi ikagenda ibirometero 75 by’umurambararo, ikanagera ku butumburuke bw’ibirometero 150.

Perezida Kagame atangiza igikorwa cyo kugurutsa Drone
Drone imaze kuguruka, bayitegereza mu kirere
Perezida Kagame ageza ijambo ku bitabiriye umuhango wo gutaniza ikoreshwa rya Drones
Keller Rinaudo, Umuyobozi wa Zipline mu Rwanda yatangaje ko umushinga w’icyo kigo ugamije gukemura ikibazo cy’abantu bajya bapfa ku Isi kubera kubura ibikoresho nkenerwa
Abayobozi barimo n'ab'amadini bri bitabiriye umuhango wo gutangiza ikoreshwa rya Drones
Perezida Kagame asuhuza bamwe mu bitabiriye uyu muhango
Minisitiri w'Ubuzima, Dr Gashumba Diane(wa kane uturutse iburyo) n'abandi bayobozi bitabiriye uyu muhango

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved