Kwamamaza

Mbere ya 2018, mu Rwanda hazaba hakoreshwa icyogajuru mu kuyobora indege

Yanditswe kuya 6-09-2016 saa 08:42' na Philbert Hagengimana


Mbere y’uko umwaka wa 2018 ugera, mu Rwanda hazaba hatangiye gukoreshwa uburyo bugezweho mu kuyobora indege hakoreshejwe Satellite, bitewe n’uko ubwari busanzweho ngo butari bukijyanye n’igihe, bityo ibihugu bya EAC na byo bigasabwa kugendera ku ntambwe y’u Rwanda mu kwitegura gukoresha ubwo buryo.

U Rwanda ruri gutera imbere ku ntambwe ishimishije mu nzego hafi ya zose, aho mu ikoranabuhanga n’itumanaho rwamaze kuva mu buryo bushaje‘Analogue’ rukajya mu buryo bugezweho ‘Digital’. Ibyo kandi binajyana no kuba himakazwa ikoranabuhanga muri serivisi zose zitangwa mu gihugu.

Ni muri urwo rwego, no mu birebana no gutwara abantu n’ibintu, u Rwanda rugiye gutangira gukoresha uburyo bugezweho bw’icyogajuru ( satellite), ariko ngo bukazaba atari umwihariko warwo kuko ingendo z’indege zidakorerwa mu kirere cy’igihugu kimwe gusa, ari na yo mpamvu ishyirwa mu bikorwa ry’ubwo buryo rigomba kujyana n’umwete w’ibihugu by’ibituranyi.

Umunyamabanga wa Leta ushinzwe ubwikorezi muri Minisiteri y’Ibikorwa remezo, Dr.Alexis Nzahabwanimana, yatangaje ko imyiteguro yo gutangira gukoresha ubwo buryo bushya mu kuyobora indege irimbanije, ndetse ngo bitarenze umwaka wa 2018 buzaba bwatangiye.

Dr.Nzahabwanimana yagize ati “Ubu buryo buje gusimbura ubwo twakoreshaga mu kuyobora indege, aho ubu buzajya bukoresha satellite yonyine. Kuvugana n’abatwaye indege bizajya binyura kuri satellite, aho bazajya batubwira, natwe mu kubasubiza bikaba ari ho binyura hatagombye gukoresha ibindi byuma bishinze ku butaka.”

Ubusanzwe mu kuyobora indege hakoreshwa ibyuma bishinze ku butaka, aho abatwaye indege bavuganaga n’abashinzwe kubayobora, bigaca muri satellite bigakomereza mu byuma bishinze ku butaka (Antennes) no mu kubasubiza bikagenda bityo.

Icyakora ubwo buryo ngo burashaje n’ubwo nta mpanuka burateza, ndetse ngo ntibukijyanye n’igihe kuko butihuta cyane ko busaba kuvugisha indege imwe imwe, nyamara ingendo zo mu kirere zigenda ziyongera uko imyaka ishira.

Ubwo buryo bushya bwatekerejwe gukoreshwa bitewe n’uko mu kirere cya Afurika indege zigenda ziyongera, bityo ngo n’u Rwanda rukaba rudakwiye gusigara inyuma.

Imyiteguro irarimbanije

Dr.Nzahabwanimana yatangaje ko ibyuma bizakoreshwa byamaze kugera i Kigali, ndetse n’abakozi bazabikoresha ngo batangiye guhugurwa, ku buryo uwo mushinga wo kuyobora indege hakoreshejwe satellite gusa numara gutangizwa muri EAC, u Rwanda ruzahita rutangira kubukoresha.

Ni muri urwo rwego abashinzwe gushyira mu bikorwa uwo mushinga muri Afurika yose, EGNOS Africa Joint Programme Office, bateraniye i Kigali mu nama y’iminsi itatu ibahuje n’ibigo by’indege za gisivili, igamije kurebera hamwe intambwe yagenderwaho mu gushyira mu bikorwa uwo mushinga muri Afurika y’Iburasirazuba.

Iyo nama igamije gukangurira abayobora ibyo bigo by’indege za gisivili mu bihugu bya EAC ndetse na Repubulika Iharanira Demokarasi ya Congo (RDC), gukoresha ubwo buryo bushya bwo kuyobora indege, no gusuzuma intambwe ikwiye kugenderwaho mu kubushyira mu bikorwa.

Uwo mushinga muri Afurika y’Iburasirazuba na RDC ubumbiye mu cyiswe ‘Eastern Africa Module’, kigizwe n’ibihugu 12 ari byo: Ethiopia, Eritrea, Djibouti, Sudani, Sudani y’Epfo, Somalia, Kenya, Uganda, Tanzania, u Rwanda, u Burundi ndetse na Repubulika Iharanira Demokarasi ya Congo.

Ladislas Matindi, Umuyobozi wa EGNOS Africa Joint Programme Office (JPO)
Umwe mu bahagarariye ikigo gishinzwe indege za Gisivili muri Somalia
Abari bateraniye muri iyi nama basabye ko ibihugu byose byakwihutisha iyi gahunda nshya yo kuyobora indege

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved