KTRN yasobanuriye Abanyabugesera ibyiza bya internet ya 4G inishyurira mitiweli imiryango 100

Yanditswe na Evariste Nsengimana
Kuya 25 Ugushyingo 2017 saa 09:23
Yasuwe :
0 0

Ikigo gisakaza umuyoboro wa 4G LTE mu Rwanda, Korea Telecom Rwanda Networks (KTRN), cyasobanuriye abaturage bo mu Murenge wa Nyamata mu Karere ka Bugesera, serivisi gitanga kinabahishurira ibyiza bya internet ya 4G birimo umuvuduko wayo worohereza abayikoresha kubona ibyo bashaka mu gihe gito.

Kuri uyu wa Gatandatu, tariki ya 25 Ugushyingo 2017, nibwo KTRN yifatanyije n’abaturage b’i Nyamata mu muganda rusange usoza ukwezi k’Ugushyingo ahatewe ibiti, igikorwa cyakurikiwe no kubasobanurira serivisi zayo ndetse no kwishyurira ubwisungane mu kwivuza imiryango 100 itishoboye.

KTRN yatanze internet ya 4G ku buntu, inasobanurira ab’i Nyamata ko yagabanyije ibiciro 30% ku bikoresho byayo birimo telefone zigezweho za 4G zirimo Samsung Galaxy S7 na Nokia 3, akuma gasakaza 4G (mobile router) n’ibindi.

Iri gabanuka ryatangiye guhabwa abakiliya bagura ibikoresho byayo guhera kuwa 24 Ugushyingo rizarangira kuwa 22 Ukuboza 2017.

Iki kigo cyatangaje ko cyashyiriyeho amahirwe abakiliya bagura bimwe muri ibyo bikoresho birimo nka internet y’umuryango (home Broadband), kongezwa ibindi n’amahirwe yo gutombora televiziyo za rutura (flat screen) zo mu bwoko bwa Samsung.

Umukozi ushinzwe imenyekanishabikorwa muri KTRN, Mugisha Duncan, yavuze ko iki gikorwa cyo gusobanurira abaturage ibyiza bya 4G ari uburyo bwo gufasha Abanyarwanda kumenya imikorere yayo.

Yagize ati “Igikorwa turimo ni ukumernyekanisha internet ya 4G kuko aribwo ikiza, imaze imyaka itatu mu Rwanda. Abakiliya bari basanzwe bazi 3G ariko twe nk’ikigo gitanga umuyoboro wa internet twahisemo gutanga iya 4G. Ku babimenyereye, irihuta kurusha izindi kandi ushobora kuyikoresha ibintu byinshi cyane.”

Nyuma yo gusobanurirwa no gushyirirwa muri telefone internet ya 4G, Munyemana Gaston, yabwiye IGIHE ko yanyuzwe n’uburyo ikora.

Yagize ati “Ubundi iyo nakoreshaga, nakuraga indirimbo kuri internet (download) byagera hagati bigahagarara ariko iyi banshiriyemo irihuta kandi ko ahantu hose bambwiye ko ikora. Nabyishimiye cyane.”

KTRN ikora n’ibikorwa byo gufasha Abanyarwanda mu mibereho myiza, bivuye mu mafaranga ikura mu nyungu ibona.

Mugisha yagize ati “Turi Abanyarwanda kandi dukunda igihugu, tuba tugomba gusubiza abakiliya, tukanabereka ko tubakunda kandi tubitayeho. Niyo mpamvu uyu munsi twatanze ubwisungane ku miryango 100 kandi si ibyo byonyine hari n’ibindi tujya dukora dufatanyije na Leta muri gahunda zayo.”

Bimwe muri ibyo bikorwa harimo gutanga mudasobwa na internet y’ubuntu ku bigo bitandukanye n’ibindi.

KTRN ivuga ko ifite intego yo kugeza mu Rwanda hose umuyoboro wa internet ya 4G ku kigero cya 95% bitarenze uyu mwaka. Yiteguye gukomeza ubukangurambaga ahantu hatandukanye nko mu bigo by’abikorera n’ahandi.

Ku bindi bisobanuro, gana ku mucuruzi wa 4G ukwegereye cyangwa usure 4G square Kigali na Rubavu n’ahandi serivisi za 4G zitangirwa harimo Rwamagana, Musanze, Huye na Rusizi.

Abakozi b'Ikigo gisakaza umuyoboro wa 4G LTE mu Rwanda bifatanyije n'abaturage bo mu Murenge wa Nyamata mu muganda rusange
KTRN yatanze sheke y'ibihumbi 300 yo kugurira ubwisungane mu kwivuza ku miryango 100 itishoboye
Nyuma hatanzwe ibiganiro mu nama n'abaturage
Abakozi ba KTRN basobanurira abaturage imikorere ya 4G
Abaturage bahabwa ibisobanuro kuri serivisi za KTRN
Abantu batomboye ibikoresho bitandukanye birimo ibikombe imipira ingofero
Umukozi ushinzwe imenyekanishabikorwa muri KTRN, Mugisha Duncan, yavuze ko gusobanurira abaturage ari ukugira ngo Abanyarwanda bamenye ibyiza bya 4G

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza