‘IYACU’, Urubuga nkoranyambaga nyarwanda rufite umwihariko wo kuba ihuriro ry’abacuruzi n’abaguzi

Yanditswe na Mukaneza M.Ange
Kuya 24 Mutarama 2018 saa 01:05
Yasuwe :
3 4

Uko ikoranabuhanga rya internet rigenda ritera imbere mu Rwanda ndetse n’umubare w’abarikoresha ukiyongera, niko Abanyarwanda biganjemo urubyiruko bagenda bashakisha uburyo baribyaza umusaruro bashaka ibisubizo by’ibibazo bigaragara mu muryango nyarwanda.

Imibare y’Ikigo cy’Igihugu kigenzura imirimo ifitiye igihugu akamaro, RURA igaragaza ko 45% by’Abanyarwanda bose bakoresha internet. Ni mu gihe umwaka wa 2017 warangiye 95 % by’igihugu bigezemo umuyoboro wa internet yihuta ya 4G.

Nubwo usanga hari abibanda ku gukora imbuga zihuza abantu, abandi bagakora izikorerwaho ubucuruzi n’ibindi, Murenzi Gustave na Mike Karangwa bo bahisemo guhuza ibi byombi, maze batangiza urubuga nyarwanda bahaye izina rya ‘IYACU’.

Mu kiganiro na IGIHE, Karangwa yavuze ko uru rubuga rwatangijwe kugira ngo Abanyarwanda n’abandi bakoresha ururimi rw’Ikinyarwanda bagire aho bahurira basangire ubushuti, ariko kandi banakore ubushabitsi hagati yabo.

Ati” Binyuze kuri IYACU ushobora gusangiza inshuti ubuzima bwawe binyuze mu mafoto, amashusho, amajwi ndetse n’ibindi, ariko kandi ushobora no kuba wagurisha cyangwa ukagura ibicuruzwa bitandukanye.”

Uretse kuba kugurisha cyangwa kugura bitagusaba kuba uri mu itsinda runaka nk’uko bikunze kuba bimeze ku zindi mbuga nkoranyambaga, ahubwo azajya anyura ahanditse ‘My Product’, agashyiraho igicuruzwa, uwifuza kwihahira na we anyure ku isoko ‘Market’; gukora ubu bucuruzi ntibigusaba ikiguzi na kimwe.

Karangwa yagize ati “Twizeye ko Abanyarwanda bazihutira gukoresha iyi serivisi y’isoko kuko izatuma babona abaguzi ku buryo bworoshye kandi bwihuse. Nta muntu n’umwe ukumiriwe kuri iri soko kuko icyo wifuza kugurisha cyose cyaba igishya cyangwa se icyakoreshejwe uzajya ugishyiraho kandi kibonwe na benshi ku buryo bworoshye.”

Uretse ibijyanye n’ubucuruzi kandi, gushyira amajwi n’amashusho kuri ‘IYACU’ biroroshye ndetse bitwara igihe gito, kuko bitagusaba kubanza kunyura ku zindi mbuga nka Youtube cyangwa Soundclouds nk’uko bigenda ku mbuga nkoranyambaga nyinshi.

Karangwa kandi avuga ko uru rubuga rwatangiye gukora tariki ya 12 Mutarama 2018 rutibagiwe abakunzi b’ibitabo, kuko bazajya babasha guhererekanya ibiri mu buryo bwa ‘Word’ na ‘PDF’ babinyujije ku nkuta zabo.

Kuba ‘IYACU’ ikoresha indangarubuga (domain name) ya .rw bituma umuntu acungirwa umutekano mu buryo bwizewe, kuko aba ari imbere mu gihugu bitandukanye n’uko bimeze ku zindi mbuga nkoranyambaga usanga ibyawe byose biriho bicungwa n’abantu bari ibwotamasimbi.

Gukoresha ‘ IYACU’ unyura kuri www.iyacu.rw, ushobora no kwifashisha porogaramu za telefoni zitwa IYACU Mobile App na IYACU Messenger biboneka kuri Google Play na App Store.

Iyacu ifasha mu gusangiza inshuti amafoto, amashusho, amajwi n'ibitabo ku buryo bworoshye
Iyacu ni urubuga rwakorewe guhuza abantu no kubafasha gukora ubucuruzi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza