Impamvu gukoresha ibikoresho by’ikoranabuhanga ari bibi ku bana bato

Yanditswe na Uwishyaka Jean Louis
Kuya 7 Gashyantare 2017 saa 02:44
Yasuwe :
0 0

Uko iminsi yicuma niko ikoreshwa ry’Ikoranabuhanga rigenda rifata indi ntera, aho ryifashishwa mu bikorwa bya buri munsi bitandukanye abantu bakora. Gusa n’ubwo bimeze bityo, hari ubwo rimwe na rimwe uburyo rikoreshwamo bushobora kugira ingaruka mbi ku kiremwa muntu cyane abana bato.

Mu ngo z’abantu basa n’abifashije haba mu Rwanda no mu mahanga, usanga batunze ibikoresho by’ikoranabuhanga birimo televiziyo, mudasobwa, telefone ngendanwa zigezweho n’ibindi. Ibyo bikoresho usanga bikoreshwa n’ingeri zinyuranye z’abagize umuryango ku buryo n’abana bato cyane hari igihe babigeraho.

Abahanga mu by’ubuzima bavuga ko ari byiza gukoresha ibikoresho by’ikoranabuhanga ariko bikaba ikizira cyane ku bana bato batarageza imyaka ibiri kuko bibagiraho ingaruka mbi zikomeye zituma badakura neza uko bikwiye mu buryo bw’imitekerereze, ibishobora kubokama no mu ishuri.

Ubwonko bw’umwana bushobora kwangirika

Ikinyamakuru Psychology Today, kivuga ko ikoreshwa ry’ikoranabuhanga ku mwana ukiri muto ari bibi cyane bitewe n’uko bigira uruhare mu guhindura imikorere y’ubwonko bwe bituma n’imitekerereze ye ihinduka. Bagaragaza ko iyo umwana akoresheje cyane ibikoresho by’ikoranabuhanga bisaba ubwonko bwe kwakira ibintu byinshi cyane bitandukanye n’ubushobozi bwe bigatuma ikigero cyo kwibuka kigabanuka cyangwa se bikamuviramo kujya yibagirwa.

Uretse kwibagirwa, ibi ngo bisa n’ibirema ubunebwe mu mwana ku buryo atabasha gusoma ibitabo kuko akenshi aba atekereza ku gikoresho asanzwe yifashisha.

Kubana n’abandi biragorana

Ikoreshwa ry’ikoranabuhanga mu gihe kirekire ku bana bato bigira ingaruka mbi bitari ku mitekerereze gusa ahubwo no muryo abana n’abandi.

Ubushakashatsi bwakorewe ku matsinda y’abana bari mu kigero cy’imyaka itandatu, bwerekanye ko umwana udakoresha igikoresho cy’ikoranabuhanga nibura mu minsi itanu atekereza neza kurusha umara iyi minsi ari kuri ibyo bikoresho. Bagaragaza kandi ko umwana muto ukoresha internet amasaha arenze ane atabaho neza mu buryo bw’imitekerereze nk’umwana uyikoresha mu gihe kitageze ku isaha imwe.

Izo mpuguke zivuga ko bitewe n’uko umwana wirirwa ku bikoresho by’ikoranabuhanga atagira umwanya wo kwegerana n’abandi, n’uburyo bwo kubana nabo bumugora ndetse n’indi myitwarire igahinduka.

Umubyibuho ukabije mu bana bato

Abahanga mu by’ubuzima bw’abana bavuga ko uko umwana amara igihe kinini yicaye akoresha bimwe mu bikoresho by’ikoranabuhanga bituma agira ikibazo cy’umubyibuho ukabije bitewe n’uko nta gihe agira cyo gukoreshwa imyitozo ngororamubiri.

Ikigo cy’Abanyamerika gishinzwe kwita ku buzima bw’abana bato, gitanga inama kivuga ko atari byiza na gato kwegereza umwana igikoresho cy’ikoranabuhanga atarageza imyaka ibiri. Ku bari hagati y’imyaka itatu n’itanu bo bemerewe nibura isaha imwe ku munsi yo kubikoresha naho abari hagati y’imyaka 6 na 18 bo bagirwa inama yo kudakoresha ibyo bikoresho hejuru y’amasaha abiri ku munsi.

Ababyeyi n’Abarezi bahwituwe

Rimwe na rimwe usanga ababyeyi cyangwa abarezi batita cyane ku buryo abana babo bakoresha ikoranabuhanga. Abahanga mu by’ubuzima bw’abana, bavuga ko niba ababyeyi cyangwa abarimu bifuza ko abana cyangwa abanyeshuri babo bakoresha ibyo bikoresho by’ikoranabuhanga mu buryo butabagiraho ingaruka mbi, bajya baba hafi y’abana babo bakamenya ibyo bari gukora kuri ibyo bikoresho ndetse byaba ngombwa muri za mudasobwa bagashyiramo uburyo bukumira abana ku mbuga zimwe na zimwe batifuza ko basura.

Ababyeyi barasabwa kujya baba hafi y’abana babo babafasha gusoma ibitabo binyuranye mu rwego rwo kubafasha gukura bazi neza gusoma no kwandika, mu gihe abarimu bo bibutswa ko bakwiye kujya baha abanyeshuri babo imikoro ibasaba gusoma inyandiko zanditswe ku mpapuro(hard copy) n’iyo kuganira hagati yabo ku ngingo runaka kugira ngo bakanguke mu bwenge no mu bitekerezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza