Imiryango ya Sosiyete Sivile igiye guhabwa inkunga yo gukora imishinga mu baturage

Yanditswe na Cyprien Niyomwungeri
Kuya 2 Gashyantare 2017 saa 07:30
Yasuwe :
0 0

Imiryango itari iya leta mu Rwanda igiye guhabwa inkunga y’amafaranga azayifasha gukora ibikorwa bifitiye akamaro abaturage mu ngeri zitandukanye zirimo imiyoborere, imibereho myiza n’iterambere rusange.

Iyi nkunga izatangwa binyuze mu mashami y’Umuryango w’Abibumbye akorera mu Rwanda, iri mu rwego rwo kubaka ubufatanye hagati ya leta, abafatanyabikorwa n’abaterankunga mu kubaka igihugu no guteza imbere abaturage muri rusange.

Mu nama yo guhamagarira imiryango itari iya leta gutanga imishinga ngo ihatanire iriya nkunga, cyabaye kuri uyu wa Kane tariki 2 Gashyantare 2017, Ikigo cy’Igihugu cy’Imiyoborere, RGB n’Ishami ry’Umuryango w’Abibumbye rishinzwe iterambere, UNDP, basobanuye ko umushinga uzatsinda muri buri nkingi uzahabwa inkunga ya miliyoni 25 Frw yo gukora ibyo wiyemeje.

Inkingi 10 zizitabwaho mu gukora imishinga ihatana zirimo Uburenganzira bwa muntu, Uburinganire n’ubwuzuzanye, Ubumwe mu miryango, kurengera umwana, kurwanya ihohoterwa rishingiye ku gitsina n’irikorerwa abana, Ubufasha mu by’amategeko n’ubwunzi, Uburere mboneragihugu no kwigisha abantu akamaro ko gutora, Kuzamura imibereho y’abaturage n’ubuzima rusange.

Hari kandi kwegereza abaturage serivisi n’ubumenyi mu bijyanye n’ubuhinzi n’ubworozi, Guha abaturage uruhare mu bibakorerwa no kubagezaho serivisi nziza; Iterambere ry’amakoperative, urubyiruko, umurimo no guteza imbere umuco; gufasha mu kubaka ubushobozi bw’imiryango irimo n’ikora ibijyanye n’itangazamakuru no kubungabunga ibidukikije.

Umuyobozi Mukuru wa RGB, Prof.Shyaka Anastase, yibukije ko iyi nkunga itangwa kuko Sosiyete sivile ifite ububasha n’ubushobozi bwo gukora ibyo Abanyarwanda bakeneye kandi bibafitiye akamaro yaba mu miyoborere myiza, imibereho myiza n’ibindi.

Yasabye imiryango itari iya leta kwirinda guhimba imishinga bagahatana mu nkingi basanzwe bakoramo bafitiye ubumenyi n’ububasha.

Ati “Imishinga tuzazana twe kujya kuyihimba, niba udasanzwe ubikora byihorere kora ibyo usanzwe ukora ushoboye nibwo uzaba ufite agatege. Mwe gutera ibuye mu gihuru, mujye mu mishinga ifatika mumenyereye musanzwe mukora kandi irahari.”

Yakomeje avuga ko iki gikorwa kigiye gukorwa bwa kabiri, hari abafatanyabikorwa benshi bakomeje gukomanga bifuza kugitera inkunga, kuko icyiciro gishize cyabikoze neza ku buryo nta numwe utararangije gahunda yari yiyemeje nibura ku kigero cya 70%.

Umuhuzabikorwa w’amashami ya Loni mu Rwanda, Lamin Manneh, yasabye imiryango ya Sosiyete Sivile kuzirikana ko ifite ububasha bwo kugera kuri benshi kandi ifite ubushobozi bwo guhindura imibereho yabo, hitawe ku byo bakeneye.

Imiryango itari iya leta yemewe n’ishingiye ku idini izatanga imishinga yayo kugeza ku wa 28 Gashyantare 2017, nyuma hatoranywemo itsinda ihabwe inkunga. Imishinga izatsinda izakorwa mu mwaka umwe gusa.

Umuyobozi Mukuru wa RGB, Prof. Shyaka Anastase
Umuhuzabikorwa w’amashami ya Loni mu Rwanda, Lamin Manneh, yasabye imiryango ya Sosiyete Sivile kuzirikana ko ifite ububasha bwo kugera kuri benshi kandi ifite ubushobozi bwo guhindura imibereho yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza