Ikigo gikomeye cyo mu Bwongereza, Inmarsat, kigiye kubaka ikoranabuhanga muri Kigali mu mezi 12

Yanditswe na Rabbi Malo Umucunguzi
Kuya 11 Gicurasi 2017 saa 08:09
Yasuwe :
0 0

Ikigo cyo mu Bwongereza gisakaza ikoranabuhanga hifashishijwe icyogajuru, Inmarsat plc, cyasinye amasezerano na Guverinoma y’u Rwanda aho kigiye kubaka uburyo butandukanye bw’ikoranabuhanga mu Mujyi wa Kigali, bitewe n’umusaruro uzavamo bukazakwizwa mu gihugu hose no muri Afurika.

Kuri uyu wa Gatatu tariki 10 Gicurasi, ku munsi wa mbere w’inama ya Transform Africa 2017, hasinywe amasezerano atandukanye y’ubufatanye, hagati y’umuryango uharanira guteza imbere impinduka mu mibereho y’abatuye Afurika binyuze mu ikoranabuhanga, Smart Africa.

Ni nabwo hasinywe amasezerano hagati ya Guverinoma y’u Rwanda yari ihagarariwe na Minisitiri w’Urubyiruko n’Ikoranabuhanga, Jean Philbert Nsengimana na Inmarsat.

Aya masezerano agamije gufatanya mu ishyirwa mu bikorwa ry’imishinga itandukanye iteganywa muri gahunda y’igihugu y’ikoranabuhanga, izaba ikoresha itumanaho ry’ibyogajuru mu Mujyi wa Kigali mu gihe cy’amezi 12.

Umusaruro uzava muri icyo cyiciro cya mbere niwo uzatuma iryo koranabuhanga imishinga nk’iyo igezwa mu gihugu cyose, kimwe no mu bindi bihugu bya Afurika binyuze muri Smart Africa Alliance, ihurirwamo n’ibihugu byiyemeje gushyira mu bikorwa impinduka mu ikoranabuhanga.

Hari imishinga izibandwaho

Nk’uko ubuyobozi bwa Inmarsat bwabitangaje, mu mishinga iteganywa ku bufatanye na Guverinoma y’u Rwanda, harimo kubaka imirongo ya internet igenewe uduce runaka LoRaWAN (Low Power Wide Area Network).

Ni ukugira ngo harushweho kuboneka internet mu bice bitandukanye mu Muyi wa Kigali mu mezi 12 ari imbere, izagenda yifashishwa n’ibikoresho bitandukanye biyikeneye mu buryo buzwi nka Internet of Things (IoT).

IoT ni ukuba ibikoresho bitandukanye bibasha kwakira no kohereza amakuru mu ikoranabuhanga, nko mu buryo buzaba bufasha mu bidukikije nk’ibyuma bizajya bishyirwa ku nyubako ngo bigenzure ubuziranenge bw’umwuka, imodoka izashyirwamo internet y’icyogajuru ikayigeza mu gace ubusanzwe igoye kugeramo.

Izaba ishobora no gutanga ikoranabuhanga rikenewe mu buhinzi hagamijwe kongera umusaruro no kunoza imicungire y’amazi.

Harimo gufasha mu myigishirize aho Inmarsat iteganya guhugura ba rwiyemezamirimo n’abanyeshuri kurushaho kumva uko “Internet of Things” (IoT) ikora, aho iteganya amahugurwa y’amezi atatu kuri ba rwiyemezamirimo n’abanyeshuri.

Yitwa IoT igihe internet ishyizwe mu gikoresho gisanzwe kikabasha kwakira no kohereza amakuru, nk’aho ushobora gushyira ikoranabuhanga muri firigo, kubera internet ikaba yakoherereza nk’ubutumwa bugufi ikubwira nk’ikintu cyashizemo cyangwa kitameze neza.

Inmarsat plc itanga serivisi z’ikoranabuhanga ry’amajwi na internet kuva mu 1979, kuri za guverinoma n’ibigo byigenga.

Umuyobozi Mukuru wa Inmarsat, Rupert Pearce, yavuze ko ibihugu bya Afurika bifite ba rwiyemezamirimo benshi kandi bafite impano cyane cyane mu rwego rw’ikoranabuhanga, kandi biteguye gutanga umusaruro mu mpinduka mu ikoranabuhanga mu bihugu byabo.

Yagize ati “Ikintu cy’ibanze mu gufungura amahirwe yabo ni internet. Inmarsat, hamwe n’ikoranabuhanga ryayo rya mbere ku Isi ikoreshaho icyogajuru, itewe ishema no kuba yaratoranyijwe na Smart Africa Alliance na Repubulika y’u Rwanda mu kwerekana ubushobozi ifite mu gufungura amahirwe ya Afurika mu bukungu n’imibereho myiza.”

Minisitiri w’Urubyiruko n’Ikoranabuhanga, Jean Philbert Nsengimana, yabwiye Itangazamakuru ko igihugu gishyize imbere abikorera mu mishinga itandukanye y’ikoranabuhanga, ahubwo guverinoma zikazamo zishyiraho uburyo bworoshya ubucuruzi no guhanga udushya.

Yakomeje agira ati “Uyu ni umusingi ugiye gufasha Smart Africa na Guverinoma y’u Rwanda mu gufatanya gushakisha imishinga ikwiye gushyirwa mu bikorwa.”

Umunyamabanga Mukuru wa Smart Africa, Dr Hamadoun Touré, yavuze ko igihe cya Afurika kigeze ngo irusheho gutera imbere ishingiye ku bumenyi bw’abayituye, kuko abayobozi bakomeje kubaharurira amayira, asaba abikorera kurushaho gushora imari mu ikoranabuhanga.

Yakomeje agira ati “Muze mushore imari, mubonye inyungu yego, ariko muhange imirimo, muhe abandi amahirwe, muhange serivisi nshya, porogaramu nshya, ubundi dukomeze dutere imbere.”

Muri iyi nama kandi hasinywe andi masezerano hagati y’ikigo gitanga ubujyanama mu ikoranabuhanga rigezweho n’iterambere ry’imijyi, Anteverti Consulting SL, gikorera i Barcelona muri Espagne na Smart Africa, hagati y’umuyobozi Mukuru wa Antevert, Pilar Conesa n’Umunyamabanga Mukuru wa Smart Africa, Dr. Hamadoun Touré.

Harimo kandi amasezerano yashyizweho umukono hagati ya Smart Africa n’ikigo gitanga ibisubizo by’ikoranabuhanga, Global Voices Group yari ihagarariwe n’umuyobozi Mukuru wayo, Patrice Baker n’amasezerano ya Smart Africa na Microsoft.

Transform Africa 2017 yitabiriwe n’abantu bagera ku 3600 baturutse mu bihugu 81, ikaba itegerejwemo abakuru b’ibihugu na za guverinoma icyenda, ba Minisitiri bane bahagarariye ibihugu byabo.

Umuyobozi Mukuru wa Antevert, Pilar Conesa n’Umunyamabanga Mukuru wa Smart Africa, Dr. Hamadoun Touré basinya amasezerano
Umuyobozi Mukuru wa Inmarsat, Rupert Pearce, (iburyo) na Minisitiri w'Urubyiruko n'Ikoranabuhanga, Jean Philbert Nsengimana, nyuma yo gushyira umukono ku masezerano
Umunyamabanga Mukuru wa Smart Africa, Dr Hamadoun Touré
Pilar Conesa uyobora Anteverti yashyikirije Dr Touré uyobora Smart Africa, umwambaro wa FC Barcelona nk'ikipe akunda.

Amafoto: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza